Read gitonga 2 ŴaKaronga 1 Bible Online

2 ŴaKaronga 1 - gitonga bible

2 ŴaKaronga 1

¹Pavuli pa nyifwa yaku Ahabu, Moabu wangugarukiya Yisraele.

²Sono Ahaziya wanguwa kuporota pa dangazi mu chipinda chake cha pachanya mu Samaria, ndipo wangutama, viyo wangutuma mathenga wakuti, “Rutani, kafumbeni kwaku Bala-zebubi,[1] chiuta waku Ekroni, vinu ndikachilanga ku utenda uwu.”

³Kweni mungelo wa Ambuya wanguti kwaku Eliya mu Tishibi, “Soka ukwere kwachikumana ndi mathenga gha karonga waku Samaria, ndipo ukaghafumbe, ‘Kumbi nchifukwa chakuti mulivi Chiuta mwaku Yisraele po muruta kwachifumba Bala-zebubi chiuta waku Ekroni?

⁴Viyo atiti Ambuya, Kuti ukasikangapo cha pa chita po wagona, kwakuneneska ukafwanga.’ ” Viyo Eliya wanguruta.

⁵Mathenga ghanguwere ku karonga, ndipo iyo wanguti kwaku gho, “Mwaweriyanji?”

⁶Iwo ŵanguti kwaku iyo, “Kunguza munthu kuzachikumana nafwe, ndipo wangunena nafwe, ‘Wereni ku karonga yo wakutumani, mukamunene kuti, Viyo ndimo akambiya Ambuya, Kumbi nchifukwa chakuti mulivi Chiuta mwaku Yisraele, kuti mutuma kwachifumba kwaku Balazebubi, chiuta waku Ekroni? Pa chifukwa ichi kuti ukasikangapo cha pa chita po wagona, kwakuneneska ukafwanga.’ ”

⁷Wanguti kwaku wo, “Wenga uli munthu yo wanguza kukumana namwe ndi kukuneniyani vinthu ivi?”

⁸Ŵangumwamuka kuti, “Wanguvwara raya la weya, ndi lamba wachikumba mu chiwunu chake.” Ndipo iyo wanguti, “Ndi Eliya muTishibi.”

⁹Sono karonga wangumutumiya nduna ya nkhondo ya liŵanja la machumi ghankhonde ndi ŵanthu ŵake machumi ghankhonde. Ŵangukwere kwaku Eliya, mweniyo wanguja pachanya pa kamtunthu, ndi ŵanguti kwaku iyo, “Wa munthu waku Chiuta, karonga watiti, ‘Usike.’ ”

¹⁰Kweni Eliya wangwamuka nduna ya nkhondo ya liŵanja la machumi ghankhonde, “Asani ine nde munthu waku Chiuta, moto usike kutuliya kuchanya ku kupirizga iwe ndi ŵanthu ŵako.” Sono moto ungusika kutuwa kuchanya, ndipo ungumara iyo ndi ŵanthu ŵake machumi ghankhonde.

¹¹Karonga wanguwerezgapo kumutumiya nduna yinyake ya liŵanja la machumi ghankhonde ndi ŵanthu ŵake, ndipo wangukweriyako, wanguti kwaku iyo, “Wa munthu waku Chiuta we, ili ndi langulu la karonga, ‘Usike ruŵi!’ ”

¹²Kweni Eliya wanguŵamuka, “Asani ine nde munthu waku Chiuta, usike moto kutuliya kuchanya kukumara, iwe ndi ŵanthu ŵako machumi ghankhonde.” Sono moto waku Chiuta ungusika kutuliya kuchanya ungumumara iyo ndi ŵanthu ŵake.

¹³Karonga wangutuma so nduna ya nkhondo ya liŵanja la machumi ghankhonde ndi ŵanthu ŵake. Ndipo nduna yachitatu ya ŵanthu machumi ghankhonde yingukweriyako, wanguza ndi kujikama makongono ghake paurongo paku Eliya ndi wangumuŵeyere kuti, “Wa munthu waku Chiuta, nditukupempha, umoyo wangu ndi umoyo wa ŵateŵeti yaŵa uŵe wakuzirwa mu maso ghako.

¹⁴Ehe, moto ungusika kutuwa kuchanya ndi kupirizga ŵarongozgi ŵaŵi ŵakudanga ŵa ŵankhondo machumi ghankhonde ndi machumi ghankhonde ghawo. Sono zomera kuŵa wakuzirwa mu maso ghako umoyo wangu.”

¹⁵Ndipo mungelo wa Ambuya wanguti kwaku Eliya, “Sika rutanga pamoza nayo, ungamopanga cha.” Viyo wangusoka wangusika pamoza nayo kuya ku karonga,

¹⁶wanguti kwaku iyo, “Ambuya atiti, ‘Watuma mathenga kwachifumba kwaku Balazebubi chiuta waku Ekroni, kumbi nchifukwa chakuti mulivi Chiuta mwaku Yisraele kufumba iyo cho wangakamba? Chifukwa cho kuti ukasikangapo cha pachita cho ugonapo, kweni nadi ukafwanga.’ ”

¹⁷Viyo wangufwa kwakuyana ndi mazu gha Ambuya gho wangukamba Eliya. Yehoramu mwana munyake, wangusere ufumu mu malo ghake, mu chirimika chachiŵi chaku Yehoramu mwana waku Yehosafati, karonga waku Yuda, chifukwa Ahaziya wenga mwana munthurumi.

¹⁸Sono machitidu ghose ghaku Ahaziya ghenigho wanguchita, kumbi asi ghakulembeka mu Buku la vyakuchitika vya ŵaKaronga ŵaku Yisraele?