Read gitonga 2 ŴaKaronga 16 Bible Online

2 ŴaKaronga 16 - gitonga bible

2 ŴaKaronga 16

¹Mu chirimika cha chumi pachanya vinkhonde ndi viŵi chaku Peka mwana waku Remaliya, Ahazi mwana waku Yotamu, karonga waku Yuda, wangwamba kuwusa.

²Ahazi wenga wavirimika machumi ghaŵi wachamba kuwusa, wanguwusa virimika chumi pachanya nkhonde ndi chimoza mu Yerusalemu. Ndipo wengavi kuchita cho chenga chamampha mu maso gha Ambuya Chiuta wake, uli ndimo wiske davidi wanguchitiya,

³kweni wangwenda mu nthowa ya ŵakaronga ŵaku Yisraele. Ndipo wangocha chingana ndi mwana wake kupereka mpasku, kwakuyana ndi unyakazi wakuchitika ndi mitundu yo Ambuya angudikiska paurongo pa waYisraele.

⁴Wangupereka sembe ndi kocha vyachema pa malo gha pachanya, ndipa mitunthu, ndi msina mwa muti wose uŵisi.

⁵Rezini karonga wa Siriya ndi Reka mwana waku Remaliya, karonga waku Yisraele, ŵangukwera kwachirwa ndi Yerusalemu, ndipo ŵanguzinga Ahazi kweni ŵangutondeka kumuthereska.

⁶Pa nyengo yiya karonga wa Edomu wanguwezge Elata kwaku Edomu, wangudikiskamo ŵaYuda mu Elata, ndipo ŵaEdomu ŵanguza ku Elata, kweniko ŵanguja mpaka zuŵa lino.

⁷Viyo Ahazi wangutuma mathenga kwaku Tiglati-pileseri karonga wa Asiriya, kuti, “Nde mteŵeti wako ndi mwana wako munthurumi. Ukwere kuno kuzachindipozomoska ku janja la karonga wa Siriya ndi ku janja la karonga wa Yisraele wo ŵalimbana nane.”

⁸Ahazi wanguto so siliva ndi golide vyo vingusanirika mu nyumba ya Ambuya ndi mu mbiku za nyumba ya karonga, wangutuma chaulera ku karonga wa Asiriya.

⁹Ndipo karonga wa Asiriya wangumuvwiya, wanguruta kwachirwana ndi Damasko, ndi wanguwukwamphuwa, wanguyora ŵamikoli kuya nawo ku Kiri, ndipo wangubaya Rezini.

¹⁰Wanguti waruta ku Damasko karonga Ahazi kwachikumana ndi Tiglati-pileseri karonga wa Asiriya, wanguwona jochero lo lenga mu Damasko. Ndipo karonga Ahazi wangutuma kwaku Uriya mzukuru chikozgu cha jochero ndi kaŵiru kake kwakuyana limu mu kaŵidu kake kose.

¹¹Ndipo Uriya mzukuru wanguchita jochero, kwakuyana ndi vyose vyo karonga Ahazi wangutuma kutuliya ku Damasko, viyo Uriya wangulizenga karonga wenga wandafike kutuwa ku Damasko.

¹²Ndipo karonga wanguti waza kutuwa ku Damasko, wangulilereska. Pavuli wangundere kufupi ku jochero, ndi wangukwera pachanya pake,

¹³wangochapo mpasku wake wakocha ndi mpasko waufwa, wangupunguliyapo mpasku wake wa kumwa, ndipo wangudapo ndopa za mpasku wake wachimangu pa jochero.

¹⁴Ndipo jochero la mkuŵa lo lenga paurongo pa Ambuya wangulituzgapo pa maso pa nyumba, pa malo gha pakati pa jochero lake ndi nyumba ya Ambuya, ndipo wanguliŵika kurchiri ku nkhonde kwa jochero lake.

¹⁵Ndipo karonga wangulanguliya Uriya, kuti, “Pachanya pa jochero likuru wochiyengepo mpasku wa mlenji, ndi mpasku wa ufwa wa mazulo, ndi mpasku wakocha wa karonga, ndi mpasku wake wa ufwa, pamoza ndi mpasku wakocha wa ŵanthu wose ŵa charu ichi, ndimpasku wawo wa ufwa, ndi mpasku wawo wakumwa, upunguliyengepo ndopa zose za mpasku wakocha, ndi ndopa zose za sembe: kweni jochero la mkuŵa likaŵanga langu la kufumbiyapo.”

¹⁶Uriya mzukuru wanguchita vyose ivi, uli ndimo karonga Ahazi wangumulanguliya.

¹⁷Sono karonga Ahazi wangudumuwako marundi gha vyakumapo ndipo wangutuzgapo vyakusambiyamo, paku vyo, wangupawuskako nyanja ku ng'ombe za mkuŵa zo zenga kusi kwake, wanguŵika pachanya pa chiguŵa cha mya.

¹⁸Malo ghakudingang'amo pa sabata gho ghanguzengeka mukati mu nyumba ya karonga, ndi khomo la kubwalo la kuserepo karonga ŵangutuzgamo mu nyumba ya Ambuya, chifukwa cha karonga wa Asiriya.

¹⁹Sono machitidu ghose ghaku Ahazi gho wanguchita asi ghakulembeka mu Buku la Machitudu gha ŵaKaronga ŵaku Yuda?

²⁰Ndipo Ahazi wangula pamoza ndi awiske, ndipo wanguŵikika pamoza ndi awiske mu msumba waku Davidi; ndipo Hezekiya mwana wake wanguwusa mu malo ghake.