Read gitonga 2 ŴaKaronga 20 Bible Online

2 ŴaKaronga 20 - gitonga bible

2 ŴaKaronga 20

¹Mu mazuŵa ghanigha Hezekiya wangutama ndipo wenga pafupi kufwa. Ndipo Yesaya mchimi mwana waku Amozi wanguza kwaku iyo, ndi wangunena nayo, “Viyo atiti Ambuya, ‘Rongoso umampha nyumba yako, pakuti ukafwanga, kuti ukachilanga cha.’ ”

²Sono Hezekiya wangulazga chisku chake ku chimati, wanguromba ku Ambuya wakuti,

³“Kumbukani sono, Ambuya, nditukuŵeyereni mwenimo ndayende paurongo pinu mu ukongorekwa ndi mtima wose, ndipo ndachita cho nchamampha mu maso ghinu!” Ndipo Hezekiya wanguliya kwakuŵaŵa.

⁴Ndipo Yesaya wenga wandatuwe mu chipinda chapakati, mazu gha Ambuya ghanguza kwaku iyo:

⁵“Ng'anamukiya kuvuli, ndipo ukakambe kwaku Hezekiya fumu ya ŵanthu ŵangu, ‘Viyo atiti Ambuya Chiuta waku Davidi ausu: ndavwa kuromba kwako, ndawona masozi ghako, ehe, ndikakuchizganga, pa zuŵa la chitatu ukarutanga ku nyumba ya Ambuya.

⁶Ndipo ndikakusazgiyangako virimika chumi ndi vinkhonde ku umoyo wako. Ndikakutaskanga iwe ndi msumba uwu ku janja la karonga wa Asiriya, ndipo ndikavikiriyanga msumba uwu pa chifukwa chaku ine ndamweni ndipa chifukwa cha mteŵeti wangu Davidi.’ ”

⁷Yesaya wanguti, “Toni chiŵande cha nkhuyu, ndipo ŵachilarika pachanya pa chitufya, mwakuti wachire.”

⁸Hezekiya wanguti kwaku Yesaya, “Nchisimikizgu chikaŵanga chine chakulongo kuti Ambuya akandichizganga, ndi kuti ndikayanga ku nyumba ya Ambuya pa zuŵa la chitatu?”

⁹Yesaya wanguti, “Chisimikizgu ndi ichi kwaku iwe chakutuliya ku Ambuya, kuti Ambuya akachitangadi chinthu cho apangana: kumbi chiduzi chingaruta ku nthazi thaliku la maphazi chumi pamwenga kuwere vuli thaliku la maphazi chumi?”

¹⁰Ndipo Hezekiya wangwamuka, “Nchinthu chiyuyu kuti chiduzi chiŵe chitali pathaliku la maphazi chumi, nkhunono kuchiwezge vuli pa thaliku la maphazi chumi.”

¹¹Ndipo Yesaya mchimi yo wangubongole ku Ambuya, ndipo ŵanguwezge chiduzi kuvuli pathaliku la maphazi chumi, penipo chingurutiliya pasi pa nthowa ya makwerero ghaku Ahazi.

¹²Pa nyengo yiya Merodaki-baladani mwana waku Baladani karonga wa Babiloni, wangutuma nthumi ndi ŵakarata ndi chaulera kwaku Hezekiya, pakuti wanguvwa kuti wangutama.

¹³Ndipo Hezekiya wanguŵalonde, ndipo wanguŵalongo nyumba ya mbiku, siliva, golide, vyakununkhira, ndi mafuta ghakuzirwa, vidya vyake vya nkhondo, vyose vyo vingusanirika mu nkhokwe zake za mu nyumba zake; pengavi kamoza mu nyumba yake pamwenga mu charu cha muwusu wake keniko Hezekiya wengavi kuŵalongo.

¹⁴Penipo Yesaya mchimi wanguza ku karonga Hezekiya, wanguti kwaku iyo, “Ŵakambanji ŵanthu yaŵa kwaku iwe? Ndipo ŵatuliya pani?” Hezekiya wanguti, “Ŵatuwa ku charu chakutali, watuwa ku Babiloni.”

¹⁵Iyo wanguti, “Ŵawonamunji mu nyumba yako?” Hezekiya wangwamuka, “Ŵawona vyose vyenivyo vye mu nyumba yangu; palivi kamoza kamu nyumba zangu zankhokwe keniko ndilivi kuŵalongo.”

¹⁶Sono Yesaya wanguti kwaku Hezekiya, “Ivwa mazu gha Ambuya:

¹⁷‘Ehe, mazuŵa ghakazanga, penipo vyose vyo vye mu nyumba yako, ndi vyose vyo ausu ŵangulonga kufika msana wale, vyazamuyoreke ku Babiloni; palivi ko kakasiyikanga,’ atiti Ambuya.

¹⁸Ndipo ŵanyake ŵa ŵana ŵako wo ŵapapika ndi iwe, ŵazamuyoreka kuruta nawo, ndipo ŵamukuŵa ŵamithenu mu nyumba ya ukaronga ya karonga wa Babiloni.”

¹⁹Sono Hezekiya wanguti kwaku Yesaya, “Mazu gha Ambuya gho wakamba ngamampha.” Pakuti wangughanaghana kuti, “Na kwati, asani kukaŵanga chimangu ndi uja wakufwasa mu mazuŵa ghangu?”

²⁰Machitidu ghanyake ghaku Hezekiya, ndi kulimba kwake kose, ndimo wanguchitiya thaŵali ndi msisi ya maji kutole maji mu msumba asi vikulembeka mu Buku la Machitidu gha ŵakaronga ŵaku Yuda?

²¹Hezekiya wangula pamoza ndi awiske, ndipo Manase mwana wake wanguwusa mu malo ghake.