Read gitonga 2 ŴaKaronga 22 Bible Online

2 ŴaKaronga 22 - gitonga bible

2 ŴaKaronga 22

¹Josiya wenga wa virimika vinkhonde ndi vitatu mu umoyo wake wachamba kuwusa, ndipo wanguwusa virimika machumi ghatatu pachanya chimoza mu Yerusalemu. Zina la nyina lenga Jedida mwana munthukazi waku Adaya waku Bozkata.

²Wanguchita cho chenga chakurunjika mu maso gha Ambuya, wangwenda munthowa zose zaku Davidi awiske, ndipo wengavi kung'anamukiya ku marghe pamwenga ku maze.

³Mu chirimika cha chumi pachanya vinkhonde ndi vitatu cha karonga Josiya, karonga wangutuma Shafani mwana waku Azaliya, mwana waku Meshulamu mlembi, ku nyumba ya Ambuya ya kuti,

⁴“Kwere kwaku Hilkiya mzukuru mura, kuti waŵelenge unandi wa ndrama zenizo zapaskika mu nyumba ya Ambuya, zenizo ŵakusunga mbuli ŵalonda ku ŵanthu,

⁵ndipo zipaskike mu janja la ŵanchito wo ŵasunga nyumba ya Ambuya; iwo ŵazipaske ku ŵanchito wo ŵepa nyumba ya Ambuya, ŵakulongoso nyumba yo,

⁶ŵeniwo mba kukhoma, ŵakuzenga, ŵakusema mya, ndi kuguliya mathabwa ndi mya yakuswa yakulongosole nyumba.

⁷Kweni iwo ŵareke kufumbika mo zatayikiya ndrama zo zapaskika mu janja lawo pakuti ŵachita mu ukongorekwa.”

⁸Ndipo Hilkiya mzukuru mura yo wanguti kwaku Shafani mlembi, “Ndasaniya buku la dangu mu nyumba ya Ambuya.” Hilkiya wangupaska buku lo kwaku Shafani, wanguliŵerenga.

⁹Ndipo Shafani wanguza ku karonga, wangunene karonga, “Ŵateŵeti ŵinu ŵamara zose ndrama zo zingusanirika mu nyumba, ndipo ŵazipaska mu janja la ŵanchito wo ŵaphwere nyumba ya Ambuya.”

¹⁰Sono Shafani mlembi wangunene karonga, “Hilkiya mzukuru wandipaska buku.” Shafani wanguliŵerenga paurongo pa karonga.

¹¹Ndipo penipo karonga wanguvwa mazu gha buku la dangu, wanguparuwa vivwalo vyake.

¹²Ndipo wangulanguliya Hilkiya mzukuru, ndi Ahikamu mwana waku Shafani, ndi Akiboru mwana waku Mikaya, ndi Shafani mlembi, ndi Asaya mteŵeti wakaronga, kuti,

¹³“Rutani kafumbeni ku Ambuya gha paku ine ndi pa ŵanthu, ndi ghapaku Yuda yose, pa mazu gha buku ili lasanirika, pakuti ngukuru ukari wa Ambuya paku ifwe, chifukwa ausefwe ŵalivi kuvwiya mazu gha buku ili, kuchita kwakuyana ndi vyose vyo vyalembeke paku ifwe.”

¹⁴Viyo Hilkiya, Ahikamu, Akiboru, Shafani, ndi Asaya ŵanguruta kwaku Hulda mchimi munthukazi, muwoli waku Shalumu mwana waku Tihava mwana waku Harhasi, wakusunga vyakuvwara (panyengo iyi wajanga mu Yerusalemu mu chigaŵa cha chiŵi); ndipo ŵangurongoronayo.

¹⁵Ndipo iyo wanguti kwaku wo, “Viyo atiti Ambuya, Chiuta waku Yisraele, ‘Umunene munthu yo watuma iwe kwaku ine.

¹⁶Viyo atiti Ambuya, Awona, ndikatolenga chiheni pa malo yagha ndipa ŵakujamo ŵake, mazu ghose gha buku ili gho karonga waku Yuda waŵerenga.

¹⁷Chifukwa ŵandijowo ine ndikuwoche vya chema kuŵachiuta ŵanyake, mwakuti ŵandisosomole ine ku ukari ndi nchitu zose za manja ghawo, chifukwa cho ukari wangu ukakolenga pa malo yagha, ndipo kuti ukazimwikanga cha.

¹⁸Kweni nge nkhu karonga waku Yuda, yo wakutumani kuzachifumba Ambuya, viyo ndimo mukakambiye kwaku iyo, Viyo atiti Ambuya, Chiuta waku Yisraele: kwakuyana ndi mazu gho wavwa,

¹⁹chifukwa mtima wako wenga wakuzomera, ungujiyuyuwa paurongo pa Ambuya, unguti wavwa mo ndingukambiya kumikana ndi malo yagha, ndi kumikana ndi ŵakujamo mwaku gho, kuti ŵakaŵanga mapopa ndi thembu ndipo iwe unguparuwa vivwaro vyako ndipo unguliya paurongo pangu, Ine nane ndakuvwa, atiti Ambuya.

²⁰Chifukwa cho, ehe, ndikakuwunjikanga pamoza ndi ausu, ndipo ukasikiyanga ku muunda wako mu chimangu, ndipo maso ghako kuti ghakawonanga mauheni ghose gho ndikatolenga pa malo yagha cha.’” Ndipo ŵanguwezge mazu ku karonga.