Read gitonga 2 ŴaKaronga 24 Bible Online

2 ŴaKaronga 24 - gitonga bible

2 ŴaKaronga 24

¹Mu mazuŵa ghake Nebukadanezara karonga waku Babiloni wangukweriyako, ndipo Yehoyakimu wanguŵa mteŵeti wake virimika vitatu, ndipo wanagung'anamukako ndi kumugarukiya.

²Ndipo Ambuya angutuma maŵanja gha ŵaKaldiya ŵaSiriya, ŵaMoabu ndi maŵanja gha ŵa Amoni ghanguza kurwana ndi Yuda kuwupasuwa. Kwakuyana ndi mazu gha Ambuya gho angurongolole mu ŵateŵeti ŵawo ŵamchimi.

³Kwakuneneska ichi chinguza paku Yuda, pakulangulika ndi Ambuya, kumutuzgapo pa maso ghawo kwakuyana ndi maulakwi ghaku Manase ndi vyose vyo wanguchita,

⁴ndipo so pa chifukwa cha ndopa zambura mlando, paku vyo Ambuya kuti angukhumba kugowoke cha.

⁵Sono machitidu ghanyake ghaku Yehoyakimu, ndi vyose vyo wanguchita, ehe vikulembeka mu Buku la Machitidu gha ŵakaronga ŵaku Yuda?

⁶Viyo Yehoyakimu wangugona pamoza ndi awiske, ndipo Yehoyakini mwana wake wanguwusa mu malo ghake.

⁷Ndipo karonga wa Egipiti wengavi kuza so kutuwa ku charu chake, pakuti karonga wa Babiloni wanguto vyose vyo vyenga vya karonga wa Egipiti kwamba ku kamsinje ka Egipiti kufika ku msinji wa Efrate.

⁸Yehoyakini wenga wa virimika chumi pachanya vinkhonde ndi vitatu wachamba kuwusa, ndipo wanguwusa myezi yitatu mu Yerusalemu. Zina la nyina lenga Nehushata mwana munthukazi waku Elnatani wa mu Yerusalemu.

⁹Ndipo wanguchita uheni mu maso gha Ambuya kwakuyana ndi vyose vyo awiske wanguchita.

¹⁰Pa nyengo yiya ŵateŵeti ŵaku Nebukadanezara karonga wa Babiloni ŵangukwere ku Yerusalemu, msumba unguzingika.

¹¹Ndipo Nebukadanezara wanguza ku msumba wo ŵeche kuwuzinga ŵateŵeti ŵake.

¹²Ndipo Yehoyakini karonga waku Yuda wangujipereka ku karonga wa Babiloni, iyo mweneko, anyina ŵateŵeti ŵake mafumu ghake ndi ŵamazaza ŵapa nyumba ya ukaronga wose wangujipereka. Karonga waku Babiloni wangumuko umkoli mu chirimika cha chinkhonde ndi vitatu cha muwusu wake,

¹³ndipo wangunyamuwa vyamu mbiku ya nyumba ya Ambuya, ndi vyamu mbiku ya nyumba ya karonga, wangudumuwa tumana-tumana viyaŵi vyose vya golide mu kasopi wa Ambuya vyo karonga Solomoni wangupanga uli ndimo Ambuya angumupangizgiya pakudanga.

¹⁴Wanguruta ndi ŵanthu wose mu Yerusalemu, mafumu ghose, vinkhara vyose vyanthazi, vikwi chumi vya ŵamkoli, ŵamisiri wose ŵa vyakusema-sema, ndi ŵasuzi; pengavi wakujariva vuli, kweni ŵanthu ŵauli-uli ŵa charu cho ndiwo ŵangusiyika.

¹⁵Yehoyakini wanguruta nayo ku Babiloni pamoza ndi anyina, mafumu, ŵawoli ŵa karonga, ŵamazaza, ndi ŵakuzirwa ŵa charu cho ŵanguŵatore ku umkoli kutuwa ku Yerusalemu kuruta ku Babiloni.

¹⁶Ndipo karonga wa Babiloni wanguza ndi ŵakukoreka vinkhara vyanthazi vikwi nkhonde ndi viŵi, ŵakusema ndi ŵasuzi, chikwi chimoza, wose yaŵa ŵenga ŵanthazi ndi ŵakuziŵa kupota homwa.

¹⁷Karonga wa Babiloni wangumika Mataniya, msibweni waku Yehoyakini kuŵa karonga mu malo ghake, ndipo wangusintha zina wangudanika Zedekiya.

¹⁸Zedekiya wenga wa virimika machumi ghaŵi ndi chimoza mu ula wake po wanguŵa karonga, ndipo wanguwusa virimika chumi ndi chimoza mu Yerusalemu. Zina la nyina Lenga Hamutala mwana munthukazi waku Yeremiya waku Libna.

¹⁹Ndipo wanguchita uheni mu maso gha Ambuya kwakuyana ndi vyose vyo wanguchita Yehoyakini.

²⁰Pakuti chifukwa cha ukari wawo chingufiskika ichi mu Yerusalemu ndi Yuda Ambuya anguŵadikiska pa maso ghawo. Ndipo Zedekiya wangugaruka ku karonga wa Babiloni.