Read gitonga 1 Mikoka 13 Bible Online

1 Mikoka 13 - gitonga bible

1 Mikoka 13

¹Ndipo Davidi wakambiskananga ndi ŵarongozgi ŵa vikwi ndi ŵa machumi, ndi ŵarongozgi wose.

²Ndipo wanguti ku wumba wose waku Yisraele, “Asani nchamampha kwinu, ndi asani ndi khumbu la Ambuya Chiuta widu, tiyeni titume ku ŵanyidu kosekose wo ŵalivi kuza mu charu chose cha Yisraele, ndipo so ku ŵazukuru ndi ku ŵaLevi mu mizi yawo ndiso mu vigaŵa vyawo, mwakuti ŵaziwungani kunu pamoza nafwe.

³Ndipo tikato Bokosi laku Chiuta widu tizi nalo kuno kwidu, pakuti tengavi kufumba ndi lo mu mazuŵa ghaku Sauli.”

⁴Wumba wose unguzomera kuti kuchitike viyo, chifukwa chinthu yichi chenga chamampha mu maso gha ŵanthu wose.

⁵Viyo Davidi wanguwunjika ŵaYisraele wose kutuwa ku Sehori waku Egipiti kuzachifika ndi kukusere kwa Hamati kwachito bokosi laku Chiuta.

⁶Davidi ndi ŵaYisraele wose ŵanguruta ku Bala ndiku Kiriyati Jearimi waku Yuda kwachito bokosi laku Chiuta, yo wadanika ndi zina lakuti Ambuya, yo waja pa chitengu pachanya pa makerubi.

⁷Ndipo wangupinga bokosi laku Chiuta pa gareta lifya, kulituzga mu nyumba yaku Abinadabi, ndipo Uza ndi Ahio ŵendeskanga gareta.

⁸Davidi ndi ŵaYisraele wose ŵakondwanga paurongo paku Chiuta ndi nthazi zawo zose ndi kumba ndi zing'oma, ndi ŵazeze, ndi bangwe ndi mbata.

⁹Ŵanguti ŵafika pa mbuli waku Kidoni, Uza wangunyoloska janja lake kunderezga bokosi chifukwa ng'ombe zinguguŵa.

¹⁰Ndipo ukale wa Ambuya ungukole paku Uza, ŵangumkoso chifukwa wangukwaska bokosi ndi janja lake, ndi wangufwiya penipa paurongo paku Chiuta.

¹¹Ndipo Davidi wangukaripa chifukwa Ambuya angukoso Uza. Viyo malo gha ghangudanika Perezi-Uza[3] mpaka kunu kule.

¹²Davidi wangopa zuŵa liya, ndipo wanguti, “Kumbi ndingaruta nalo uli bokosi laku Chiuta ku muzi kwidu?”

¹³Viyo Davidi kuti wanguritole bokosi ku muzi wake cha ku msumba waku Davidi, kweni wangulipatuskiya ku nyumba yaku Obededomu muGiti.

¹⁴Bokosi laku Chiuta linguja ndi ŵamunyumba yaku Obededomu mu nyumba yake kwa myezi yitatu, ndipo Ambuya angutumbika ŵamunyumba yaku Obededomu ndi vyose vyo ŵenga navyo.