Read gitonga 1 Mikoka 14 Bible Online

1 Mikoka 14 - gitonga bible

1 Mikoka 14

¹Hiramu karonga wa Turo wangutuma mathenga kwaku Davidi, ndi miti ya milanji, ŵakusema mya ndi miti kwachimzenge nyumba.

²Ndipo Davidi wanguteska kuti Ambuya angumukhozga kuŵa karonga wa ŵaYisraele, ndi kuti ufumu wake ungukuwa ukongwa chifukwa cha ŵanthu ŵake ŵaYisraele.

³Davidi wanguto so ŵanthukazi ŵanyake mu Yerusalemu ndi kupapa ŵana ŵanyake ŵanthurumi ndi ŵanthukazi.

⁴Yagha ndi mazina ghaŵana wo wenga mawo mu Yerusalemu: Shamuwa, Natani, Solomoni,

⁵Ibibara, Elisua, Elipelete,

⁶Noga, Nafegi, Tafiya,

⁷Elishama, Beliyada, ndi Elifelete.

⁸Ndipo ŵanguti ŵavwa ŵaFilisti kuti Davidi wangupakika kuŵa Karonga waku Yisraele yose, ŵaFilisti wose ŵanguruta kwachipenja Davidi. Davidi wanguvwa ndi wanguruta kwachirwana nawo.

⁹ŴaFilisti ŵanguza ndi ŵanguduma mu dambo laku Refaimu.

¹⁰Davidi wangufumba kwaku Chiuta, “Kumbi nkharutanga kurwana ndi ŵaFilisti? Kumbi mukaŵaperekanga mu janja langu?” Ndipo Ambuya anguti kwaku iyo, “Rutanga, ndikaŵaperekanga mu janja lako.”

¹¹Ndipo ŵanguruta ku Bala-perazimu, ndi ŵanguŵapunda kwenikuwa, ndipo Davidi wanguti, “Chiuta ndi janja wafyo ŵarwani ŵangu nge nkhupongole kwa maji.” Chifukwa yichi malo gha ghangudanika Balaperazimu.

¹²Ndipo ŵangusiya ŵaChiuta ŵawo penipa. Davidi wangulangula, ndipo ŵanguwocheka.

¹³Pa nyengo yinyake so ŵaFilisti ŵanguduma so mu dambo.

¹⁴Ndipo penipo Davidi wangufumba so kwaku Chiuta, Chiuta wanguti kwaku iyo, “Kuti utenere kulondo pavuli pawo cha, kweni ukaŵazunguliye ndipo ukazi kwaku iwo kutuliya ku miti ya malibani.

¹⁵Ndipo penipo wamkuvwa miswayo ya michapo muchanya mwa miti ya malibani, ruta ndi karwe nkhondo Chifukwa Chiuta wakudanjiriya kwachikoso nkhondo ya ŵaFilisti.”

¹⁶Davidi wanguchita nge ndimo Chiuta wangumulanguliya, ndipo wangukoso nkhondo ya ŵaFilisti kutuwa ku Gibeoni mpaka ku Gezere.

¹⁷Ndipo mbiri yaku Davidi yinguwanda mu vyaru vyose, ndipo Ambuya anguchitiska mitundu yose kumopa iyo.