Read gitonga 1 Mikoka 15 Bible Online

1 Mikoka 15 - gitonga bible

1 Mikoka 15

¹Davidi wangujizenge zinyumba mu msumba wake msumba waku Davidi, ndipo wangunozga malo ghakujamo bokosi laku Chiuta ndi wangulijinthiya hema.

²Viyo Davidi wanguti, “Paulevi yumoza wakwene kupinga bokosi laku Chiuta, kweni ŵaLevi pe ndiwo ŵakalipenganga, chifukwa Ambuya akuŵasankha kupinga bokosi lawo ndi kuŵateŵete iwo muyaya.”

³Davidi wanguwungang'a ŵaYisraele wose ku Yerusalemu kwachitore bokosi la Ambuya ku malo ghake ghenigho wangulinozge.

⁴Ndipo Davidi wanguwungang'a pamoza ŵana ŵaku Aroni ndi ŵaLevi:

⁵ku ŵana ŵaku Kohati, Uriele wakudanga, ndi ŵabali ŵake machumi pe chumi pachanya machumi ghaŵi (120);

⁶ku ŵana ŵaku Merari, Asaya wakudanga ndi ŵabali ŵake machumi pe chumi ghaŵi pachanya machumi ghaŵi (220);

⁷ŵana ŵaku Gershomu, Yoele wakudanga, ndi ŵabali ŵake machumi pe chumi pachanya machumi ghatatu (130);

⁸ku ŵana ŵaku Elizafani, Shemaya, wakudanga, ndi ŵabali ŵake machumi pe chumi ghaŵi (200);

⁹ku ŵana ŵaku Hebroni, Elieli wakudanga, ndi ŵabali ŵake machumi ghankhonde ndi ghatatu (80);

¹⁰ku ŵana ŵaku Uziele, Aminadabu wakudanga, ndi ŵabali ŵake machumi pe chumi pachanya chumi limoza ndi ŵaŵi (112).

¹¹Ndipo Davidi wangudana Zadoki ndi Abiatara ŵazukuru, ndi ŵaLevi, Uriele, Asaya, Yoele, Shemaya, Elieli ndi Aminadabu,

¹²ndi wanguti kwaku iwo, “Ndimwe ŵarongozgi ŵa nyumba za auskemwe za ŵaLevi, jipatuliskeni, imwe ndi ŵabali ŵinu, mwakuti mukatore bokosi la Ambuya, Chiuta waku Yisraele ku malo ghenigho ndalilongosole.

¹³Chifukwa mwengavi kulinyamuwa pakudanga, Ambuya Chiuta widu wangutikalipiya Chifukwa kuti tinguliphwere cha kwakuyana ndi nthowa yo yikulangulika.”

¹⁴Viyo ŵazukuru ndi ŵaLevi ŵangujipatuliska kwachito bokosi la Ambuya, Chiuta waku Yisraele.

¹⁵Ndipo ŵaLevi ŵangupinga bokosi laku Chiuta pa maphewa ghawo ndi minthambi nge ndimo Mosese wangulanguliya kwakuyana ndi mazu gha Ambuya.

¹⁶Davidi wangulanguliya ŵarongozgi ŵa ŵaLevi kumika ŵabali ŵawo nge mbakumba wo ŵatenere kumba ukongwa ndi vyakumbiya, ŵazeze, ŵabangwi, ndi vimbumbuli kukwezge mazu gha chimwemwe.

¹⁷Viyo ŵaLevi ŵangumika Hemani mwana waku Yoele, ndi ku ŵabali ŵake Asafu mwana waku Berekiya ndi ku ŵana ŵaku Merari, ŵabali ŵawo Etana mwana waku Kishaya;

¹⁸pamoza ndi iwo ŵabali ŵawo ŵa mzeri wachiŵi, Zekariya, Yaziele, Shemiramota, Yeheili Uni, Eliyabi, Benai, Maseya, Matatiya, Elifelehu, ndi Mikineya ndi ŵalinda malikomo Obededomu, ndi Yeliele.

¹⁹Ŵakumba, Hemani, Asafi ndi Etani,

²⁰Zekeriya, Azieli, Shemiramoto, Yehiele, Uni, Eliyabu, Maseya, ndi Benai, ndiwo ŵambanga ŵazeze kwakuyana ndi Alamoti;

²¹kweni Matatiya, Alifilehu, Mikineya Obededomu, Yeieli, ndi Azaziya ŵenga ŵakulongozga ndi ŵabagwe kwakuyana ndi Sheminite.

²²Kenaniya, murongozgi wa ŵaLevi mu kumba watenere kuŵasambizga mu kumba, pakuti wanguziŵa kambidu.

²³Berekiya ndi Elkana ŵenga ŵalinda likomo la bokosi la Ambuya.

²⁴Shebaniya, Yoshafati, Netanele, Amasai, Zekariya, Benai, ndi Eliezere, ŵazukuru ŵatenere kumba mbata paurongo pa bokosi laku Chiuta. Obededomu, ndi Yehiya nawo so ŵenga ŵalinda likomo ku bokosi.

²⁵Viyo Davidi, ndi ŵara ŵa ŵaYisraele, ndi ŵakulangula ŵa vikwi ŵanguruta kwachito bokosi la phanganu la Ambuya kutuwa ku nyumba yaku Obededomu ndi kukondwa.

²⁶Ndipo pa chifukwa chakuti Ambuya angovwa ŵaLevi wo ŵapinganga bokosi la phanganu la Ambuya, ŵangupereka sembe za nkhuzi zinkhonde ndi ziŵi, ndi ŵana ŵa mberere ŵankhonde ndi ŵaŵi.

²⁷Davidi wanguvwara munjirira wa bafuta wakoloŵa wakutowa, ŵaLevi nawo viyo wose wo ŵangupinga bokosi, ndi ŵakumba, ndi Kenaniya murongozgi wa kambidu ku ŵakumba ndi Davidi wanguvwara Efodo wa Bafuta.

²⁸Viyo ŵaYisraele wose ŵanguto bokosi la phanganu la Ambuya ndi kukambura ndi kumba kwa mbata ndi malipenga, ndi vimbumbuli ndi ŵangumba ukongwa ndi ŵazeze ndi ŵabangwe.

²⁹Penipo lafikanga bokosi la phanganu la Ambuya mu msumba waku Davidi, Mikala mwana munthukazi waku Sauli wangulingizga ku bwalo pa dangazi, ndipo wanguwona karonga Davidi wachivina ndi kukondwa, ndipo wangumuyeya mu mtima wake.