Read gitonga 1 Mikoka 19 Bible Online

1 Mikoka 19 - gitonga bible

1 Mikoka 19

¹Pavuli paku ichi Nahasi karonga wa ŵaAmoni wangufwa, ndipo mwana wake wanguwusa mu malo ghake.

²Ndipo Davidi wanguti, “Ndilongonge lisungu kwaku Hununi mwana waku Nahasi, chifukwa awiske ŵangulongo lisungu kwangu.” Viyo Davidi wangutuma mathenga kwachimsangaruska chifukwa cha nyifwa yaŵa wiske. Ndipo ŵateŵeti ŵaku Davidi ŵanguza kwaku Hanuni mu charu cha Amoni kuzachimsangaruska.

³Kweni ŵakaronga ŵaAmoni ŵanguti kwaku Hanuni, “Kumbi ughanaghana kuti, chifukwa Davidi watuma ŵasangaruski kwaku iwe, ndikuti watumbika ausu? Kumbi kuti ŵateŵeti ŵake kuti ŵaziya kupenjapenja ndi kunanga ndi kupachiya charu cha?”

⁴Viyo Hanuni wanguto ŵateŵeti ŵaku Davidi ndi wanguŵameta, ndi kucheketa malaya ghawo pakati, mu viwunu vyawo, ndi wanguŵareka kuti ŵarutenge;

⁵ndipo ŵanguruta. Penipo Davidi wanguziŵiska za ŵanthu yaŵa ŵenga ndi soni zikuru. Ndipo karonga wanguti, “Tandarani mu Yeriko mpaka yime myembe yinu, sono ndipo muzenge kunu.”

⁶Penipo ŵaAmoni ŵanguteska kuti ŵajitinkhiska kwaku Davidi, Hanuni ndi ŵaAmoni ŵangutuma ndrama za siliva chikwi chimoza (1,000) ku Mesopotamia, Aramayaka, ndi ku Zoba,

⁷zakubwereke magareta vikwi machumi ghatatu pachanya viŵi (32,000) ndi karonga waku Maka ndi ŵankhondo ŵake, wo ŵanguza ndi kugoŵa paurongo pa Medeba. Ndipo ŵaAmoni ŵanguwungana pamoza kutuwa ku misumba yawo, ndi ŵanguza kunkhondo.

⁸Penipo Davidi wanguvwa ichi, wangutuma Yoabu, ndi nkhondo yose ya ŵanthu ŵakulimba.

⁹ŴaAmoni ŵangutuwa ndi ŵangujalika umampha nkhondo panthazi pa likomo la msumba, ndipo ŵakaronga wo ŵanguza ŵanguŵa pakuŵija ku dondo.

¹⁰Penipo Yoabu wanguwona kuti nkhondo yingumikana ndi iyo kunthazi ndi kuvuli, wangusankhamo ŵanyake ŵa ŵanthu ŵakusankhika ŵa ŵaYisraele, ndi wanguŵandandiska umampha kumikani ndi ŵaSiriya;

¹¹ŵanyake ŵa ŵanthu ŵake wo ŵangujapo wanguŵaŵika pasi paku Abishai mbali wake, ndi wangujilongoso kurwana ndi ŵaAmoni.

¹²Ndipo wanguti, “Asani ŵaSiriya ŵanditondenge, iku ukandovyanga; kweni asani ŵaAmoni ŵakutondenge, ndikakuwovyanga.

¹³Khwima mtima, timiliye ŵanthu ŵakwidu ndi misumba yaku Chiuta widu, ndipo Ambuya achite cho nchamampha kwaku iwo.”

¹⁴Viyo Yoabu ndi ŵanthu wo ŵenga ndi iyo ŵangundere kufupi pa maso pa ŵaSiriya kurwana nawo; ndipo iwo ŵanguthaŵa pa maso pake.

¹⁵Ndipo penipo ŵaAmoni ŵanguwona kuti ŵaSiriya ŵathaŵa nawo viyo ŵanguthaŵa pa maso paku Abishai, mbali waku Yoabu, ndi ŵangusere mu msumba. Viyo Yoabu wanguza ku Yerusalemu.

¹⁶ŴaSiriya ŵanguti ŵawona kuti ŵapundika ndi ŵaYisraele wangutuma mathenga kwachito ŵaSiriya wo ŵenga kusirgha kwa msinji wa Efrate, ndi Shofaki wakulamula nkhondo yapa Hadadezere ndiyo so wenga murongozgi wawo.

¹⁷Ndipo penipo Davidi wanguziŵiskika ndi ichi wanguwunganiska ŵaYisraele wose pamoza, ndi wangwambuka msinji wa Yordane, ndi wanguza kwaku iwo, ndi wangujarika umampha nkhondo kurwana nawo. Penipo Davidi wangundandiska ŵankhondo ŵake umampha kuthyana ndi ŵaSiriya, ŵangurwana nayo.

¹⁸Ndipo ŵaSiriya ŵanguthaŵa pa maso pa ŵaYisraele; Davidi wangubaya ŵaSiriya ŵapa magareta vikwi vinkhonde ndi viŵi (7,000) ŵasilikali ŵakwenda pasi vikwi machumi ghanayi (40,000) ndiso wangubaya Shofaki wakulamula nkhondo yawo.

¹⁹Penipo ŵateŵeti ŵaku Hadadezere ŵanguwona kuti ŵangupundika ndi ŵaYisraele, ŵanguchita chimangu ndi Davidi, ndi ŵanguŵa ŵanthu ŵake, viyo ŵaSiriya ŵangukhumba cha kuŵawovya so ŵaAmoni.