Read gitonga 1 Mikoka 20 Bible Online

1 Mikoka 20 - gitonga bible

1 Mikoka 20

¹Mu maliwondwe ku umari wa chirimika, pa nyengo yeniyo ŵakaronga ŵarutiya ku nkhondo, Yoabu wangurongozga nkhondo ndi wanguparghang'a charu cha ŵaAmoni, ndipo ŵanguza ndi kugoŵe Raba. Kweni Davidi wanguja ku Yerusalemu, Yoabu wangukoso Raba ndi wanguŵathereska.

²Davidi wanguto mphumphu ya karonga wawo ku mutu wake; wangusaniya kuti uzitu wake wenga mweso umoza wa golide, ndipo mwaku yo wenga mwa wakuzirwa, ndipo unguŵikika pa mutu waku Davidi. Wanguwe ndi vyuma vinandi vyakuskoŵeka vya msumba wo.

³Wangutuzga so ŵanthu wo ŵenga mwenimuwa, ndi wanguŵagwiriska nchitu ndi ŵasowo, mapiki, ndi zimbavi, viyo ndimo Davidi wanguchitiya ndi misumba yose ya ŵaAmoni. Davidi ndi ŵanthu wose ŵanguwere ku Yerusalemu.

⁴Pavuli paku ivi, kunguyuka nkhondo ndi ŵaFilisti pa Gezere; pa nyengo yeniyo Sibekai muHusati wangubaya Sipai yo wenga yumoza wa mphapu ya vinkhara vitali; ndipo ŵaFilisti ŵanguthera.

⁵Kunguŵa so nkhondo ndi ŵaFilisti; Elhanani mwana waku Jairo wangubaya Lahimi, mbali waku Goliati muGiti mweniyo ruti la mkondo wake lenga nge ndi munthambi wa wakutunga.

⁶Kunguŵa so nkhondo ku Gati kweniko kwenga munthurumi wa msinkhu utali, mweniyo wenga ndi minwe yinkhonde ndi umoza ku janja limoza ndi ku linyake nako viyo; ndi vikumbo vinkhonde ndi chimoza ku rundi limoza ndi ku linyake nako viyo, vyose pamoza vyenga machumi ghaŵi pachanya vinayi (24), ndipo nayo viyo wenga mphapu ya vinkhara vitali,

⁷wachitonyora ŵaYisraele, Yonafani mwana waku Shimaya, mbali waku Davidi wangumubaya.

⁸Yaŵa ŵenga mphapu ya vinkhara vitali vyamu Gati; ndipo ŵangubayika ndi janja laku Davidi ndi so janja la ŵateŵeti ŵake.