Read gitonga 1 Mikoka 23 Bible Online

1 Mikoka 23 - gitonga bible

1 Mikoka 23

¹Penipo mazuŵa ghaku Davidi ghanguŵa ghanandi ndi wangukota, wangumika Solomoni mwana wake kuŵa karonga waku Yisraele.

²Davidi wanguwunganiska ŵarongozgi wose ŵaku, Yisraele, ndi ŵazukuru ndi ŵaLevi.

³ŴaLevi ŵa virimika machumi ghatatu (30) ndi pachanya pake, ŵanguŵerengeka, unandi wawo wenga vikwi machumi ghatatu ndi vinkhonde ndi vitatu (38,000).

⁴Davidi wanguti, “Vikwi machumi ghaŵi ndi vinayi (24,000) ŵaku wo, Ŵakaŵanga ŵakuwona kendeskedu ka nchitu mu nyumba ya Ambuya, vikwi vinkhonde ndi chimoza (6,000) ŵakaŵanga ŵarongozgi ndi ŵeruzgi,

⁵vikwi vinayi (4,000) ŵalinda malikomo, ndi vikwi vinayi (4,000) ŵakambanga mathamiku ku Ambuya ndi vyakumbiya vyo ndikupangiya kumbiya mathamiku.”

⁶Ndipo Davidi wanguŵagaŵa mu vigaŵa kwakulingana ndi ŵana ŵaku Levi: Gershomu, Kohati, ndi Merari.

⁷Ŵana ŵaku Gershomu ŵenga Ladani ndi Shimei.

⁸Ŵana ŵaku Ladani: Yehiele, wakudanga, Zetamu, ndi Yoele, ŵatatu.

⁹Ŵana ŵaku Shimei: Shelomoti, Haziele, ndi Harani, ŵatatu. Yaŵa ndiwo ŵarongozgi ŵa nyumba za auskeu ŵaku Ladani.

¹⁰Ŵana ŵaku Shimei Yahati, Ziza, Yeusi, ndi Beriya. Yaŵa ŵanayi ŵenga ŵana ŵaku Shimei.

¹¹Yahati wenga wakudanga, Ziza wenga wachiŵi; kweni Yeusi ndi Beriya kuti ŵenga ndi ŵana ŵanandi cha, chifukwa ichi ŵanguŵerengeke pamoza kuŵa nyumba ya auskeu yumoza.

¹²Ŵana ŵaku Kohati: Amramu, Izhara, Hebroni, ndi Uzieli, ŵanayi.

¹³Ŵana ŵaku Amramu: Aroni ndi Mosese. Aroni wangupaturikiya kuti wapatuwe vinthu vyakupaturika ukongwa, mwakuti iyo ndi ŵana ŵake ŵawochenge vyakununkhira muyaya paurongo pa Ambuya, kumuteŵete iyo ndi kupereka vitumbiku mzina lake muyaya.

¹⁴Kweni ŵana ŵake Mosese, munthu waku Chiuta wangusazgikana ndi fuku laku Levi.

¹⁵Ŵana ŵaku Mosese: Gershomu; ndi Eliezeri:

¹⁶Ŵana ŵaku Gershomu: Shebueli murongozgi.

¹⁷Ŵana ŵaku Eliezeri: Rehabiya murongozgi, Eliezeri wanguŵavi ŵana ŵanyake, kweni ŵana ŵaku Rehabiya ndiwo ŵenga ŵanandi.

¹⁸Ŵana ŵaku Izhara; Shelomoti murongozgi.

¹⁹Ŵana ŵaku Hebroni: Yeriya murongozgi, Amariya wachiŵi, Jehazieli wachitatu, ndi Jekameyamu wachinayi.

²⁰Ŵana ŵaku Uziele: Mika murongozgi ndi Ishiya wachiŵi.

²¹Ŵana ŵaku Merari: Mahili ndi Mushi. Wana ŵaku Mahili: Eliazara ndi Kishi.

²²Eleazara wangufwa wambura ŵana ŵanthurumi, kweni ŵana ŵanthukazi pe; ŵasiŵani ŵawo, ŵana ŵanthurumi ŵaku Kishi, ndiwo ŵanguŵato.

²³Ŵana ŵaku Mushi: Mahili, Edere, ndi Yeremoti, ŵatatu.

²⁴Yaŵa ndiwo ŵenga ŵana ŵaku Levi kwakulingana ndi nyumba za auskeu, ŵarongozgi ŵa nyumba za auskeu, nge ndimo ŵangurembeke kwakulingana nge ndimo ŵanguŵerengeke ndi mazina ghawo kwamba kuŵa virimika machumi ghaŵi (20) vya ura mpaka ku ŵapachanya pawo ŵeniwo ŵachitanga mlimu wa nyumba ya Ambuya.

²⁵Pakuti Davidi wanguti, “Ambuya, Chiuta waku Yisraele wapaska chimangu ku ŵanthu ŵake; ndipo ŵaja mu Yerusalemu muyaya.

²⁶Viyo ŵaLevi kuti ŵapingenge so cha hema lakuwunganamo pamwenga viyaŵe vye vyose vya mlimu wake.”

²⁷Chifukwa pa mazu ghakumariya ghaku Davidi ŵaLevi ŵanguŵerengeka kwamba ku ŵavirimika machumi ghaŵi (20) vyaura mpaka ku ŵapachanya pawo.

²⁸Kweni mlimu wawo uŵenge kovya ŵana ŵaku Aroni kuchita mlimu wa nyumba ya Ambuya, kuphwere maluluwa ndi vipinda, kuphoto vinthu vyose vyakupaturika, ndi nchitu ye yose ya mlimu wa nyumba yaku Chiuta;

²⁹kovya so kurongoso chiŵande ndi ufwa wa mpasku, ndi tumabulunga twa chiŵande chambura mtupu, mpasku wakubika, mpasku wakusazgika ndi mafuta, ndi vyakupimiya vyose vya unandi pamwenga ukuru.

³⁰Ndipo ŵakamanga mlenji wose, kuwonga ndi kuthamika Ambuya, ndi mazulo napo viyo,

³¹ndipo pepose po sembe yakocha yiperekeka ku Ambuya pa masabata, mu maliŵali, ndi mu mazuŵa gha madghera, kwakulingana ndi unandi waku vyo vinkhumbikwa rutaruta pa maso pa Ambuya.

³²Viyo ŵakasunganga hema lakuwunganamu, ndi malo ghakupaturika, ndipo ŵateŵetiyenge ŵana ŵaku Aroni, ŵabali ŵawo mu mlimu wa nyumba ya Ambuya.