Read gitonga 2 Mikoka 1 Bible Online

2 Mikoka 1 - gitonga bible

2 Mikoka 1

¹Solomoni mwana waku Davidi wanguchinthiskika mu ufumu wake, ndipo Ambuya, Chiuta wake wenga nayo ndipo wangumukuzga ukongwa.

²Ndipo Solomoni wangukamba ndi ŵaYisraele wose, ndi ŵakulamula ŵa vikwi ndi ŵa machumi pe chumi, ndi ŵeruzgi, ndi ŵarongozgi mu Yisraele yose, ndi ŵara ŵa nyumba za auskeu.

³Viyo Solomoni ndi mzinda wose wo wenga pamoza nayo ŵanguruta ku malo gha pachanya ghaku Gibeoni; chifukwa cha hema lakuwunganamo laku Chiuta lo Mosese mteŵeti wa Ambuya wangujintha kali mu bozwa.

⁴(Kweni Davidi wanguto bokosi laku Chiuta kutuwa ku Kiriati-Jearimu, ndi kuza nalo ku malo gho Davidi wangulilongosole, chifukwa wangulikhome hema mu Yerusalemu.)

⁵Ndipo so jochero la mkuŵa lo Bazaleli, mwana waku Uri, mwana waku Huri wanguchita lenga kweniko paurongo pa chihema cha Ambuya. Ndipo Solomoni ndi mzinda wa ŵanthu ŵangukhumba kukumana nawo Ambuya.

⁶Ndipo Solomoni wangukwere ku jochero la mkuŵa paurongo pa Ambuya, lenilo lenga mu hema lakuwunganamo, ndi wanguperekapo sembe zakocha chikwi chimoza (1,000).

⁷Mu usiku uwa Ambuya anguwoneka kwaku Solomoni, ndi anguti kwaku iyo, “Pempha cho ndingakupaska.”

⁸Ndipo Solomoni wanguti kwaku Chiuta, “Mungurongo chanju chikuru ndi chakufikapo kwaku Davidi ada, ndipo mwandimika kuŵa karonga mu malo ghawo.

⁹Ambuya Chiuta, sono lifiskike phanganu linu kwaku Davidi, pakuti mwandimika kuŵa karonga wa ŵanthu wo ŵenge ndi fuvu la charu mu unandi wawo.

¹⁰Mundipaske zeru, ndi mziŵiru sono, mwakuti ndituwe ndi ndisere paurongo pa ŵanthu yaŵa, chifukwa ndiyani wangaziŵa kuwusa ŵanthu ŵinu ŵanandi nge ndi yaŵa?”

¹¹Chiuta wangumwamuka Solomoni wanguti, “Chifukwa ichi chenga mu mtima wako, kuti wapempha uromba, vyuma, kutumbikika, pamwenga umoyo waku wo ŵatikutinkha cha, ndipo kuti wapempha nanga mbumoyo utali cha, kweni wajipemphe zeru, ndi mziŵiru, mwakuti uwuse ŵanthu ŵangu paku wo nditukumika kuŵa karonga.

¹²Zeru ndi mziŵiru vyapaskika kwaku iwe. Ndikupaskenge so uromba, vyuma, ndi kutumbikika, vyo palivi yumoza wa ŵakaronga wo ŵanguŵako paurongo pako wanguŵa navyo, ndipo so pakaŵangavi yumoza waku wo ŵakazanga pavuli pako yo wakaŵanga navyo.”

¹³Viyo Solomoni wangutuwako ku malo gha pachanya ku Gibeoni ku hema lakuwunganamo ndi wanguza ku Yerusalemu ndi wanguŵausa ŵaYisraele.

¹⁴Solomoni wanguwunganiska pamoza magareta ndi ŵanthu ŵakukwera pa ŵakavalo; ŵenga ndi magareta chikwi chimoza ndi machumi pe chumi ghanayi (1,400), ndi ŵanthu ŵakukwera pa ŵakavalo vikwi chumi ndi viŵi (12,000) ŵeniwo wanguŵaŵika mu misumba ya magareta ndipo iyo karonga wenga mu Yerusalemu.

¹⁵Ndipo karonga wanguchita siliva ndi golide vinandi nge ndi mya mu Yerusalemu, ndi so miti ya milanji yinandi nge ndi miti ya mikuyu mu dambo mu unandi wake.

¹⁶Ndipo Solomoni wadaniskanga ŵakavalo ŵakutuwa ku Egipiti ndi ku Kue, ndipo ŵamalonda ŵa karonga ŵaŵarondiyanga kutuwa ku Kue, kuŵagula pa mtengo wakutemeka.

¹⁷Wangudaniska gareta kutuwa ku Egipiti pa mtengo wa ndrama za siliva machumi pe chumi ghankhonde ndi limoza (600) ndi kavalo wapa mtengo wa ndrama za siliva machumi pe chumi pachanya machumi ghankhonde (150); ndipo wanguŵatumizgiya ŵakaronga wose ŵa ŵaHiti ndi ŵa ŵaSiriya.