Read gitonga 2 Mikoka 10 Bible Online

2 Mikoka 10 - gitonga bible

2 Mikoka 10

¹Rehoboamu wanguruta ku Shekemu, chifukwa ku Shekemu ndiko ŵanguza ŵaYisraele wose kumuvwarika ufumu.

²Ndipo Yeroboamu mwana waku Nebati wanguti wavwa ndi ichi (pakuti wenga ku Egipiti kweniko wanguthaŵiya kopa Solomoni), Yeroboamu wanguweko ku Egipiti.

³Ndipo ŵangutuma munthu kwachimudana. Viyo Yeroboamu ndi ŵaYisraele wose ŵanguza ŵangurongoro ndi Rehoboamu kuti,

⁴“Ausu ŵanguzitiska goŵa paku ifwe, sono iwe uyuyuske nchitu zizitu za ausu, ndi goŵa lizitu lo ŵangutizitiska nalo, ndipo ifwe tikutakatakiyenge.”

⁵Iyo wanguti kwakuwo, “Mukawe so pavuli pa mazuŵa ghatatu.” Viyo ŵanthu ŵanguruta.

⁶Ndipo karonga Rehoboamu wanguchita wupu ndi madoda gho ghamanga paurongo paku Solomoni awiske ŵeche ŵamoyo, wanguti, “Kumbi fundu yo mutindipangizga njakuti uli yo ine ndimukenge ŵanthu yaŵa?”

⁷Iwo ŵanguti kwaku iyo, “Asani uŵenge ndi ulemu ku ŵanthu yaŵa ndikuŵakondweska kurongoro mazu ghamampha kwaku iwo, ŵaŵenge ŵateŵeti ŵako muyaya.”

⁸Kweni iyo wangujowo fundu yo madoda ghangumpangizga, wangufumbana ndi ŵanyamata ŵanthanga yake wo wenga nawo pamoza.

⁹Ndipo wanguti kwaku iwo, “Kumbi fundu yinu njine mo tingamukiya ŵanthu wo ŵarongoro nane kuti, yuyuska goŵa lo ausu ŵangutizitiska nalo?”

¹⁰Ndipo ŵanyamata wo ŵakuliyanga pamoza ndi iyo ŵanguti, “Ukaŵamuke viyo ŵanthu wo ŵakambanga ndi iwe kuti, ‘Ausu ŵanguzitiska goŵa lidu, iwe utiyuyuske’; ukanene iwo, kuti, ‘Chikumbu changu chimana chiŵenge chikhomi kuruska chiwunu cha ada.

¹¹Chingana ada ŵangumpingizgani goŵa lizitu ndisazgiyengepo pa goŵa linu. Ada ŵamkwechuwaninga ndi vikoti, kweni ine ndimpumeninga ndi vipiriri.’ ”

¹²Yereboamu ndi ŵanthu wose ŵanguza kwaku Rehoboamu pa zuŵa la chitatu nge ndimo karonga wangukambiya kuti, “Mukaze so kuno pa zuŵa la chitatu.”

¹³Ndipo karonga wangwamuka kwa ukari, wangujowo fundu ya madoda.

¹⁴Wanguŵamuka kwakuyana ndi fundu ya ŵanyamata kuti, “Ada ŵanguzitiska goŵa linu, kweni ine ndisazgiyengepo; ada ŵangumpumani ndi vikoti kweni ine ndimpumeninge ndi vipiriri.”

¹⁵Viyo karonga kuti wanguvwa gha ŵanthu cha, fundu iyi yinguturiya kwaku Chiuta mwakuti Chiuta wafiske mazu ghake gho wangukamba ndi Ahija mu Shiloni kwaku Yereboamu mwana waku Nebati.

¹⁶Viyo ŵaYisraele wose ŵanguti ŵawona kuti karonga wengavi kuŵavwiya, ŵanguti kwaku iyo, “Kumbi tendi phande uli mwaku Davidi? Tilivi chihara mu mwana waku Jese. Munthu yose waku imwe warutenge ku hema lake mwa ŵaYisraele mwe! Sono yilereskeni mwija nyumba yinu imwe a Davidi.” Viyo ŵaYisraele wose ŵanguruta ku mahema ghawo.

¹⁷Kweni ŵaYisraele wo ŵanguja mu misumba yaku Yuda ndiwo ŵanguwusika ndi Rehoboamu.

¹⁸Viyo karonga Rehoboamu wangutuma Hadoramu mura wa msonkho wa paku wo wachichizgikanga pakuteŵeta, ndipo ŵaYisraele ŵangumudina ndi mya ndi wangufwa. Ndipo karonga Rehoboamu wangukwera magareta ruŵiruŵi, ndi wanguthaŵiya ku Yerusalemu.

¹⁹Viyo ndimo ŵaYisraele ŵangugarukiya kutuwa ku nyumba yaku Davidi mpaka zuŵa lino.