Read gitonga 2 Mikoka 11 Bible Online

2 Mikoka 11 - gitonga bible

2 Mikoka 11

¹Ndipo Rehoboamu wanguti wafika ku Yerusalemu wanguwunganiska ŵaYuda ndi ŵaBenjamini, ŵanthurumi ŵakusankhika vikwi machumi pe chumi ndi machumi ghankhonde ndi ghatatu (180,000) ŵankhondo, kurwa ndi Yisraele kuti ŵawezge so ufumu kwaku Rehoboamu.

²Kweni mazu gha Ambuya ghanguza kwaku Shemaya munthu waku Chiuta kuti,

³“Kamba ndi Rehoboamu mwana waku Solomoni karonga waku Yuda, ndi ku ŵaYisraele wose ŵaku Yuda ndi ŵaku Benjamini, kuti,

⁴‘Ambuya atiti, Mungarutanga chingana nkhuti mukarwanenge ndi ŵanyinu, weni munthu yose ku nyumba yake, chifukwa chinthu ichi chachitika ndi ine.’ ” Viyo ŵanguvwiya mazu gha Ambuya, ŵanguwe ŵangureka kwachirwa ndi Yeroboamu.

⁵Rehoboamu wanguja mu Yerusalemu, wanguzenga mizi ya malinga mwaku Yuda yakutaskikiyamo.

⁶Wanguzenga Betelehemu Etama, ndi Tekoa,

⁷Betezuru, Soko ndi Adulamu,

⁸Gati, Meresha, ndi Zifi,

⁹Adiramu, Lakishi, ndi Azeka,

¹⁰Zora, ndi Ajaloni, ndi Hebroni, mizi ya malinga mwaku Yuda ndi mwaku Benjamini.

¹¹Wanguyikhozga ukongwa, wanguŵikamo ŵachirongozgi ŵankhondo, ndi vyakurgha, ndi mafuta, ndi vinyo.

¹²Ndipo mu mizi yose wanguŵikamo nguru ndi mikondo, wanguyikhozga ukongwa. Viyo wenga ndi Yuda ndi Benjamini ŵakumiya iyo.

¹³Ŵazukuru ndi ŵaLevi ŵa mwaku Yisraele yose ŵangumziya, kuturiya mu malo ghose ko ŵajanga.

¹⁴Kweni ŵaLevi ŵangureka vigaŵa vyawo ndi minda yawo ŵanguza ku Yuda ndi Yerusalemu, chifukwa Yeroboamu ndi ŵana ŵake ŵanthurumi ŵanguŵataya kuti ŵareke kuchitiya Chiuta vya uzukuru,

¹⁵ndipo wangujisankhiya yija ŵazukuru ŵa malo gha pachanya ndi ŵa mizimu yiheni, ndi ŵa mathole ghakusongono gho iyo wanguchita.

¹⁶Ndipo wo ŵanguŵika mitima yawo pakupenja Ambuya Chiuta waku Yisraele, kutuwa mu mitundu yose yaku Yisraele ŵanguza ku Yerusalemu kuzachibayiya sembe Ambuya Chiuta, wa mbuya.

¹⁷Viyo ŵangukhozga ufumu waku Yuda, ndipo mu virimika vitatu ŵangumkhozga so Rehoboamu chifukwa wendanga mu nthowa yaku Davidi ndi Solomoni.

¹⁸Ndipo Rehoboamu wanguto Mahalati mwana waku Yerimoti mwana waku Davidi ndi waku Abihaili mwana waku Eliabu mwana Jese;

¹⁹ndipo ŵangumpapiya ŵana, Yereshi, ndi Shemaria, ndi Zahamu.

²⁰Pavuli pake wanguto Maka mwana waku Absolomu, yo wangumbariya Abija, ndi Atai, ndi Ziza, ndi Shelomoti.

²¹Rehoboamu wangwanja Maka mwana waku Absolomu kwakuruska ŵawoli ŵake wose ndi mbirigha (wenga ndi ŵawoli chumi pachanya ŵankhonde ndi ŵatatu (18) ndi mbirigha machumi ghankhonde ndi limoza (60) ndipo wenga ndi ŵana ŵanthurumi machumi ghaŵi pachanya ŵankhonde ndi ŵatatu (28) ndi ŵana ŵanthukazi machumi ghankhonde ndi limoza (60)).

²²Ndipo Rehoboamu wanguŵika Abija mwana waku Maka kuŵa murongozgi mu ŵana ŵanyake, chifukwa watinge wamvwalike ufumu.

²³Wenga ndi zeru mukuchita kwake, wangumbininiska ŵana ŵake wose mu vyaru vyaku Yuda ndi Benjamini, ku mizi yose ya malinga; wanguŵapaska vyakurgha vinandi; ndi kuŵatoreska ŵanthukazi.