Read gitonga 2 Mikoka 15 Bible Online

2 Mikoka 15 - gitonga bible

2 Mikoka 15

¹Mzimu waku Chiuta wanguza paku Azaria mwana waku Odedi;

²ndipo wanguruta kwa chikumana ndi Asa, ndipo wanguti kwaku iyo, “Mundivwe Asa ndi Yuda yose ndi Benjamini: Ambuya ŵe namwe penipo mweche nawo, Asani mutumpenja mumusaniyenge, kweni asani mutumjowo nayo wamjowoninga.

³Yisraele wanguja nyengo yitali wambura Chiuta wa uneneska, ndi wambura mzukuru wakusambizga, ndi kwambura dangu.

⁴Kweni ŵati ŵang'anamukiya kwa Ambuya Chiuta waku Yisraele mu suzgu yawo ndikumpenja, ŵangumsaniya.

⁵Mu nyengo yiya kwengavi chimangu kwaku yo watuwanga ndi kwaku yo waserenga, kweni utimbanizi ukuru unguwiya wose wo ŵajanga mu charu.

⁶Wangupasurana, mtundu ungupasuwa mtundu unyake, msumba ungupasuwa msumba unyake chifukwa Chiuta wanguŵasuzga ndi chisuzgu che chose.

⁷Kweni imwe khwimani gwa, manja ghinu ghareke kutomboroka, chifukwa nchitu yinu yiŵenge ndi mphoto yake.”

⁸Ndipo Asa wanguti wavwa mazu yagha gha uchimi waku Azaria mwana waku Odedi, wangukhwima mtima, wangutuzga unyakazi ndi vikozgo mu charu chose chaku Yuda ndi Benjamini, ndi mizi yo wanguronda ku mapiri ghaku Efraimu, ndipo wangunozgaso Jochero laku Chiuta lo lenga pa maso pa khomo la nyumba yaku Chiuta.

⁹Ndipo wanguwunganiska Yuda yose ndi Benjamini, ndi ŵalendo pamoza nawo, kuturiya kwaku Efraimu, ndi kwaku Manase, ndi kwaku Simeoni, chifukwa ŵanandi ŵangumziya kutuwa kwaku Yisraele pa ŵanguti ŵawona kuti Ambuya Chiuta wake wenga nayo.

¹⁰Wanguwungana mu Yerusalemu mu mwezi wachitatu, mu chirimika cha chumi ndi vinkhonde (15) cha muwusu waku Asa.

¹¹Ndipo ŵangupereka sembe kwaku Chiuta zuŵa liya, za mskowo wo ŵanguza nawo, ng'ombe machumi pe chumi ghankhonde ndi ghaŵi (700) ndi mberere vikwi vinkhonde ndi viŵi (7,000).

¹²Ndipo ŵangupangana phanganu kuti ŵaŵapenje Ambuya Chiuta, wa ŵambuyawo, ndi mtima wawo wose ndi umoyo wawo wose;

¹³ndipo so kuti yose yo warekenge kupenja Ambuya Chiuta waku Yisraele wabayike, chingana wangaŵa mwana pamwenga mura, pamwengamunthurumi pamwenga munthukazi.

¹⁴Ndipo ŵangurapa kwaku Chiuta, ndi mazu ghakuru, ndi chiwawa ndi zimbata ndi ŵabangwi.

¹⁵Ndipo ŵaYuda ŵangusekere pa rapu, chifukwa ŵangurapa ndi mtima wawo wose, ŵangumpenja ndi khumbo lawo lose ndipo ŵangumsaniya, ndipo Chiuta wanguŵapaska chipumulo kwakuzunguliya.

¹⁶Chingana ndi Maka ŵanyina, Asa wanguŵatuzgamo mu ufumukazi wawo chifukwa ŵanguchita chikozgu cha Ashera. Asa wangudumuliya pasi chikozgu ndi kuchipikitapikita, ndi kuchocha ku msinji Kidroni.

¹⁷Kweni malo ghapachanya ghangutuwamo cha mu Yisraele. Kweni ndipuuli mtima waku Asa wenga umphyemphyemo mazuŵa ghake ghose.

¹⁸Ndipo wanguserezga mu nyumba yaku Chiuta vinthu vyo awiske ŵanguvipatuwa pamoza ndivyo iyo nayo wanguvipatuwa, siliva ndi golide ndi vyakutakatakiya.

¹⁹Kuti kwenga so nkhondo cha mpaka kufikiya ku chirimika cha machumi ghatatu ndi vinkhonde (35) cha muusu waku Asa.