Read gitonga 2 Mikoka 22 Bible Online

2 Mikoka 22 - gitonga bible

2 Mikoka 22

¹Ndipo wo ŵanguja mu Yerusalemu ŵangumika Ahaziya kwangu wake, kuŵa karonga mu malo ghake; chifukwa ŵanthu wo ŵanguza ndi Arabu ku msasa ŵangukoso ŵaku ŵake wose. Viyo Ahaziya mwana waku Yehoramu wanguwusa.

²Ahaziya wenga ndi virimika machumi ghanayi pachanya viŵi wachamba kuwusa, ndipo wanguwusa chirimika chimoza mu Yerusalemu, Zina la anyina lenga Ataliya, mzuku waku Omri.

³Nayo so wangwenda mu nthowa za nyumba yaku Ahabu, chifukwa anyina ndiwo ŵangumpanga fundo yakuchita uheni.

⁴Wanguchita uheni pa maso ghaku Chiuta nge mba nyumba yaku Ahabu; chifukwa ndiwo ŵenga ŵaupu wake pavuli ŵati ŵafwa awiske kufikiya kupharghaniko lake.

⁵Wangwenda mu fundo zawo, wanguruta ndi Yehoramu mwana waku Ahabu karonga waku Yisraele kwachirwana nkhondo ndi Hazaeli karonga waku Siriya ku Ramoti-gileada. Ndipo ŵaSiriya ŵanguhoma Yoramu.

⁶Wanguwerere kwachichizgika ku Yezerele chifukwa cha mabala gho ŵangumhoma ku Rama wachirwana ndi Hazaeli karonga waku Siriya. Ndipo Ahaziya, mwana waku Yehoramu karonga waku Yuda, wanguruta kwa chiwona Yoramu mwana waku Ahabu ku Yezrele chifukwa wangutama.

⁷Pharghaniko laku Ahaziya lenga laku Chiuta, chifukwa chakuza chiwona Yoramu. Chifukwa wanguti waza, mbwenu waruta pamoza ndi Yehoramu kwachirwana ndi Yehu mwana waku Nimishi, yo Chiuta wangumika ndi kumpaka kuti waparghang'e nyumba yaku Ahabu.

⁸Ndipo kunguŵa po Yehu wafiskanga cheruzgu pa nyumba yaku Ahabu, wangusaniya ŵakaronga ŵaku Yuda, ndi ŵana ŵa ŵabali ŵaku Ahaziya ŵamteŵetiyanga Ahaziya, ndipo wanguŵabaya.

⁹Wati wachita viyo wangumpenja Ahaziya wangukoreka wachibisama mu Samaria, wanguza nayo kwaku Yehu, wangumbaya. Ŵangumuŵika, chifukwa ŵanguti “Ndi mzukuru waku Yehoshafati yo wangurembe Chiuta ndi mtima wake wose.” Ndipo nyumba yaku Ahaziya yengavi Yumoza wanthazi wakuti wangasunga ufumu.

¹⁰Ataliya nyina waku Ahaziya wanguti wawona kuti mwana wake wafwa wangusoka kunanga mphapu yose ya ufumu waku Yuda.

¹¹Kweni Yehoshafati, mwana munthukazi wakaronga, wanguto Yoashi mwana waku Ahaziya, wangumuba kumtuzgamo mukati mu ŵana ŵa karonga wo ŵenga pafupi kubayika, wangumuŵika mu chipinda chakugonamo pamoza ndi wakumlera. Viyo Yehoshafati mwana munthukazi wa karonga Yehoramu muwoli Yehoyada msukuru, wangumubisa chifukwa wenga mzichi waku Ahaziya, kuti Ataliya wereke kumbaya;

¹²ndipo wanguja nawo wakubisika mu nyumba yaku Chiuta virimika vinkhonde ndi chimoza, Ataliya weche kuwusa charu.