Read gitonga 2 Mikoka 3 Bible Online

2 Mikoka 3 - gitonga bible

2 Mikoka 3

¹Solomoni wangwamba kuzenga nyumba ya Ambuya mu Yerusalemu pa phiri Moria, kweniko Ambuya anguwoneke Davidi wiske, pa malo ghenigho Davidi wangulongosole mbuli waku Orani mu Yebusi.

²Wangwamba kuzenga pa zuŵa la chiŵi la mwezi wa chiŵi mu chirimika cha chinayi cha muwusu wake.

³Vipimu vyaku Solomoni pakuzenganyumba yaku Chiuta ndi ivi; utali wake mu mikono kwakulingana ndi chipimu chakudanga wenga mikono machumi ghankhonde ndi limoza (60) usani wake machumi ghaŵi (20).

⁴Utali wa kanyondo ka nyumba ko kenga ku maso kwa nyumba wenga nge mbusani wa nyumba mikono machumi ghaŵi, ndi utali wakusoka kwake wenga mikono machumi pe chumi pachanya machumi ghaŵi (120). Wangukuruŵa mukati mwake ndi golide lakutowa.

⁵Malo gha pakati ghanguchingika ndi miti ya milombwa ndi wanguyimata ndi golide lakutowa, wanguzgangamo vinthuthuzi vya chikozgu cha miti ya migwalangwa pamoza ndi maunyoro.

⁶Wangutozga nyumba ndi kaŵikidu ka mya yakuzirwa. Golide lenga laku Paravaimu.

⁷Viyo wangumata nyumba ndi golide, nchindamilo, mizati, vimati vyake, ndi visasa vyake, ndipo wangulemba makerubi pa vimati.

⁸Ndipo wanguchita malo ghakupaturika; utali wake wenga wakuyana ndi usani wa nyumba, wo wenga mikono machumi ghaŵi, ndi usani wake wenga mikono machumi ghaŵi, wangughamata ndi matalente[1] gha golide lamampha machumi pe chumi ghankhonde ndi limoza (600).

⁹Uzitu wa mizumali wenga myeso machumi ghankhonde (50) gha golide, ndipo wangumata vipinda vya pachanya ndi golide.

¹⁰Ndipo mu malo ghakupaturika wanguchitamo makerubi ghaŵi gha miti, ndi wangughakuruŵa ndi golide.

¹¹Mapapa gha makerubi ghose pamoza mu utali, ghenga mikono machumi ghaŵi (20), phapa limoza mikono yinkhonde kugota ku chimati cha nyumba, ndipo phapa lake linyake la mikono yinkhonde lingugota ku phapa la kerubi munyake;

¹²ndipo phapa la kerubi uyu limoza, la mikono yinkhonde lingukwasa chimati cha nyumba, ndipo phapa linyake so la mikono yinkhonde lingulungika ku papha la kerubi wakudanga.

¹³Mapapa gha makerubi ghangutandauka mikono machumi ghaŵi (20). Makerubi ghangumiliya ndi marundi ghawo, visko vya wo vingurazga ku malo gha pakati,

¹⁴ndipo so wanguwomba saru yakuchinga ya thonje lifipa nge ndi mtambo, ndi lakufyuŵara, ndi lichesamu, ndi la bafuta wakutowa, wanguzgangamo makerubi mwaku yo.

¹⁵Ku maso kwa nyumba wanguchitako mizati yiŵi yo yenga mikono machumi ghatatu pachanya yinkhonde (35). Utali wake mu wima, ndi chapachanya pa mzati we wose chenga mikono yinkhonde.

¹⁶Wanguchita maunyoro nge ndi mukanda ndi wangughaŵika mu mitu ya mizati: wanguto ŵazobala ndi kuŵaŵika pamoza ndi maunyoro.

¹⁷Mizati iyi wanguyijintha ku maso kwa nyumba yakupaturika. Umoza kuchiri ku malaŵi, ndi unyake kuchiri ku nkhonde. Wakuchiri ku malaŵi wangudana zina Yakini ndi wakuchiri ku nkhonde wanguwudana Boazi.