Read gitonga 2 Mikoka 30 Bible Online

2 Mikoka 30 - gitonga bible

2 Mikoka 30

¹Hezekiya wangutuma mazu ku ŵaYisraele wose ndiso wangulemba ŵakarata kwaku Efraimu ndi Manase kuti ŵaze ku nyumba ya Ambuya ku Yerusalemu kuzachichitiya phaska Ambuya Chiuta waku Yisraele.

²Pakuti karonga ndi mafumu ghake, ndi wumba wose mu Yerusalemu ŵanguchita upu kuŵa ndi phaska mu mwezi wa chiŵi,

³chifukwa ŵangutondeka kuŵa nalo munyengo yake pakuti ŵazukuru kuti ŵangujipaturiska ŵanandi ŵakukwana cha, chingana mbanthu kuti ŵanguwungana cha mu Yerusalemu,

⁴ndipo fundu iyi yinguŵa yamampha ku karonga ndi ku wumba wose.

⁵Viyo ŵangukhozga fundu kumemeza mu Yisraele yose, kutuwa ku beresheba kufika ku Dani, kuti ŵanthu ŵaze ndi ŵazachichitiya phaska Ambuya, Chiuta waku Yisraele ku Yerusalemu pakuti ŵengavi kulichita pa mzinda ukuru nge ndimo likulangulikiya.

⁶Viyo methenga ghanguruta mu Yisraele yose ndi Yuda ndi ŵakarata ŵakutuwa ku karonga ndi mafumu ghake, kwakuyana nge ndimo karonga wangulanguliya, kuti, “Mwa ŵaYisraele, wereni ku Ambuya, Chiuta waku Abrahamu, Yisaki ndi Yisraele, mwakuti awere so kwaku wo ŵajako ŵaku imwe, wo ŵapozomoka ku manja gha ŵakaronga ŵaku Asiriya.

⁷Mureke kuŵa nge mbauskemwe ndi ŵabali ŵinu, wo ŵanguŵa ŵambura chigomezgu mu Ambuya, Chiuta wa auskeu, viyo kuti wanguŵapasuwa, nge ndimo muwone.

⁸Sono mureke kungangamiska mitima yinu nge ndimo auskemwe ŵanguŵiya, kweni mujipereke ku Ambuya, ndi muzi ku malo ghawo ghakupaturika, ghenigho aghapatuliskiya ku nchitu yawo kwa muyaya, ndi muŵateŵete Ambuya Chiuta winu, mwakuti ukari wawo wakofya utuweko kwaku imwe.

⁹Chifukwa asani mu were ku Ambuya, ŵabali ŵinu, ndi ŵana ŵinu ŵasaniyenge lisungu kwaku wo ŵakuŵako umkoli, ndi ŵakaweriyanga ku charu ichi. Chifukwa Ambuya Chiuta winu ngwalisungu ndi ngwaulemu, ndipo kuti wakang'anamuliyanga chisku chake kunyake kutuwako kwaku imwe cha, asani imwe muwere.”

¹⁰Viyo mathenga ghanguruta ku msumba ndi msumba mu charu chose cha Efraimu ndi Manase ndi mpaka ku Zebuluni, kweni ŵanguŵaseka ndi kuŵayeya, ndi ŵanguŵawoya.

¹¹Kweni ŵanthu ŵamanavi ŵaku Ashere, ŵaku Manase, ndi ŵaku Zebuluni ndiwo ŵangujiyuyuwa ndi ŵanguza ku Yerusalemu.

¹²Janja laku Chiuta lenga so paku Yuda kuŵapaska mtima umoza kuchita cho karonga ndi mafumu ghangulangula mu mazu gha Ambuya.

¹³Ndipo ŵanthu ŵanandi ŵanguwungana mu Yerusalemu kuŵa ndi dghera la chiŵande chambura mtupu mu mwezi wachiŵi, kunguŵa wumba ukuru.

¹⁴Ŵangwamba kuteŵeta ndi kutuzga jochero lo linguŵa mu Yerusalemu, ndi majochero ghose ghakochiyapo vyakununkhira, ŵanguvito ndi kuvipong'a mu dambo la Kidroni.

¹⁵Ndipo ŵangubaya mwana wa mberere pa phaska pa zuŵa la chumi ndi ghanayi (14) la mwezi wachiŵi. Ŵazukuru ndi ŵaLevi ŵangulengeskeka viyo ŵangujipatuliska, ndi ŵanguza ndi sembe zakocha ku nyumba ya Ambuya.

¹⁶Ŵanguto nchitu zawo za masiku ghose kwakuyana ndi dangu laku Mosese munthu waku Chiuta, ŵazukuru ŵanguwazga ndopa zo ŵanguronda kutuwa ku manja gha ŵaLevi.

¹⁷Chifukwa ŵengamo ŵanandi mu wumba, wo kuti ŵangujipatuliska cha, chifukwa ichi, ŵaLevi ŵangubaya mwana wa mberere wa phaska chifukwa cha munthu yose yo wenga wambura kutozgeka kuti waŵe wakupaturika wa Ambuya.

¹⁸Pakuti ŵanandi ŵa mzinda wa ŵanthu, kuti ŵangujitozga cha, nge mbaku Efraimu, Manase, Isakara, ndi Zebuluni, kweni ndipuuli ŵangurgha phaska kwakuruska mo kungulembeke. Chifukwa Hezekiya wanguŵarombe kuti, “Ambuya mbamampha agowoke munthu we yose,

¹⁹mweniyo wapenja Chiuta, Ambuya, Chiuta wa awiske, nanga wangureka kutozgeka kwakuyana ndi marangu ghakutozgeka gha malo ghakupaturika.”

²⁰Ndipo Ambuya anguvwa Hezekiya ndi anguchizga ŵanthu.

²¹Viyo ŵanthu ŵaku Yisraele wo ŵenga mu Yerusalemu ŵangusunga dghera la chiŵande chambura mtupu mazuŵa ghankhonde ndi ghaŵi ndi likondwa likuru, ŵaLevi ndi ŵazukuru ŵanguthamika Ambuya zuŵa ndi zuŵa, kumbiya Ambuya ndi mitima yawo yose.

²²Ndipo Hezekiya wangukamba kwakuchiska ukongwa ku ŵaLevi wo ŵangurongo vinjeru mu mlimu wa Ambuya. Viyo ŵanthu ŵangurgha kurgha kwa dghera kwa mazuŵa ghankhonde ndi ghaŵi kupereka sembe ya chimangu ndi kupereka viwongo ku Ambuya Chiuta wa auskeu.

²³Viyo wumba wose unguzomerezgana kusunga dghera kwa mazuŵa ghankhonde ndi ghaŵi; viyo ŵangusunga dghera kwa mazuŵa ghankhonde ndi ghaŵi ndi likondwa.

²⁴Pakuti Hezekiya karonga waku Yuda wangupaska wumba nkhuzi chikwi (1,000) ndi mberere vikwi vinkhonde ndi viŵi (7,000) za sembe, ndipo mafumu ghangupaska unganu nkhuzi chikwi chimoza (1,000) ndi mberere vikwi chumi (10,000). Ŵazukuru ŵangujipatuliska ŵanandi ukongwa.

²⁵Wumba wose waku Yuda, ŵazukuru, ndi ŵaLevi, ndi wumba wose wo ungutuwa ku Yisraele, ndi ŵalendo wo nawo ŵangutuwa ku charu chaku Yisraele, ndi ŵalendo wo ŵanguja mu Yuda ŵangukondwere.

²⁶Viyo mwenga chimwemwe chikuru mu Yerusalemu.

²⁷Ndipo ŵazukuru ndi ŵaLevi ŵangusoka ndi ŵangutumbika ŵanthu, ndipo mazu ghawo ghanguvwika, ndi rumbo lawo lingukwere ku malo ghake ghakupaturika gha kuchanya.