Read gitonga 2 Mikoka 31 Bible Online

2 Mikoka 31 - gitonga bible

2 Mikoka 31

¹Sono vinguti vyamarapo vyose ivi, ŵaYisraele wose wo ŵengapo ŵanguruta ku misumba yaku Yuda ndi ŵanguswa vikozgo ndi kudumuliya pasi ŵachiuta ndi ŵangubwanganduwa malo gha pachanya ndi majochero mu Yuda yose, mu Benjamini, mu Efraimu ndimu Manase, mpaka ŵangubwanganduwa vyose. Viyo ŵanthu wose ŵaku Yisraele ŵanguwere ku misumba yawo, munthu yose ku malo ghake.

²Ndipo Hezekiya wanguŵika vigaŵa vya ŵazukuru ndi ŵaLevi vigaŵa ndi vigaŵa, we yose kwakuyana ndi mlimu wake, ŵazukuru ndi ŵaLevi ku mlimu wasembe zakocha, ndi mpasku wa chimangu, kuteŵete mu malikomo gha malo gha Ambuya, kuwonga ndi kuthamika.

³Muthulu wa karonga, wo ungutuwa ku usambasi waku iyo mweneko ungunozgeke sembe yakocha ya mlenji ndi mazulo, ndipo sembe yakocha ya masabata, ndi ya kuŵalikakwa myezi, ndi ya dghera lakutemeka, nge ndimo kukulembeke mu dangu la Ambuya.

⁴Ndipo so wangulanguliya ŵanthu wo ŵajanga mu Yerusalemu kupereka phande lakwenere ŵazukuru ndi ŵaLevi mwakuti ŵajipereke ku dangu la Ambuya.

⁵Sosonukweni langulu linguti lawandiskika kose-kose, ŵaYisraele ŵangupereka vuna ya trigu yinandi yakudanga, vinyo, mafuta, uchi, ndi vyose vyakutuwa mu minda, ndipo ŵangupereka vya chichumi vinandi ukongwa.

⁶Ndipo ŵaYisraele ndi ŵaYuda wo ŵajanga mu misumba yaku Yuda nawo so ŵanguza ndi vyachichumi vya ng'ombe ndi mberere, ndi vinthu vyakupaturika vyo vingupaturiskikiya ku Ambuya, Chiuta wawo ndi ŵanguviwunjika mu zindundu.

⁷Mu mwezi wachitatu wangwamba kuwunjika umampha umampha zindundu, ndi ŵangumarizga mu mwezi wachinayi.

⁸Penipo karonga Hezekiya ndi mafumu ghake ŵanguza kuzachiwona zindundu, ŵanguthamika Ambuya ndi ŵanthu ŵawo ŵaYisraele,

⁹Hezekiya wangufumba ŵazukuru ndi ŵaLevi zapa zindundu.

¹⁰Azariya mzukuru mura yo wenga wa mbumba yaku Zadoki, wangumwamuka kuti, “Kwamba po ŵakwambiya kuza ndi mithulu ku nyumba ya Ambuya, targha kwakufikapo, ndipo tendi vinandi vyakujako, chifukwa Ambuya atumbika ŵanthu ŵawo, viyo tendi vinthu vinandi mu nkhokwe vyakujapo.”

¹¹Viyo karonga Hezekiya wanguŵalanguliya kulongoso vipinda mu nyumba ya Ambuya; ndipo ŵanguvilongoso.

¹²Ŵanguza nayo mithulu kwamagomekezgeka, vyachichumi ndi vinthu vyakupaturika. Wakulamula mura waku vyo wenga Konaniya muLevi. Simeyi mbali wake, wenga wachiŵi;

¹³Yehieli, Azaziya, Nahati, Asahali, Yerimote, Yozabadi, Elieli, Ismachiya, Mahati, ndi Benai ŵenga ŵakuwona ŵanyawo, ŵakovya Konaniya ndi Simeyi mbali wake, ŵakusankhika ndi Hezekiya karonga, ndi Azariya wakulamula mura wa nyumba yaku Chiuta.

¹⁴Kore mwana waku Imna mu Levi, mlonda wa likomo laku vuma wenga msungi mura wa mpasku wawanangwa wakuperekeka kwaku Chiuta, kugaŵa phande la muthulu wakuŵikikiya Ambuya, ndi mpasku wakupaturika.

¹⁵Edeni, Miniyamini, Yeshua, Shemai, Amariya ndi Shekaniya ŵamovyanga kwamagomekezgeka mu msumba ya ŵazukuru, kupereka maphande ku ŵabali ŵawo, ŵara ndi ŵamana, kwakuyana ndi vigaŵa,

¹⁶kweni wo ŵakulembeka pe pa kawi kawo, ŵanthurumi kutuwa ku ŵavirimika vitatu vya ura mpaka ku ŵapachanya pawo, wose wo ŵangusere mu nuumba ya Ambuya nge ndimo mlimu wa zuŵa ndi zuŵa wakhumbikiyanga kuchitikiya ndi iwo kwakiyana ndi nchitu zawo pa vigaŵa vyawo.

¹⁷Kuŵelengeka kwa ŵazukuru kwenga kwakuyana ndi nyumba za auskeu, za ŵaLevi, kutuwa ku ŵavirimika machumi ghaŵi mu ura mpaka ku ŵapachanya pawo, kwenga kwakuyana ndi nchitu zawo pa vigaŵa vyawo.

¹⁸Ŵazukuru ŵangulembeka pamoza ndi ŵana ŵawo wose, ŵawoli ŵawo, ŵana ŵawo ŵanthurumi, ndi ŵana ŵawo ŵanthukazi, wumba wose, chifukwa ŵenga ŵamagomekezgeka pakujisunga ŵarunji.

¹⁹Ndipo ŵana ŵaku Aroni, ŵazukuru wo ŵenga mu minda ya charu cha masanga cha misumba yawo, kwenga ŵanthurumi mu misumba, wo ŵangumikika pakuzumbulika mazina kugaŵa phande ku munthurumi we yose mukati mu ŵazukuru, ndi kwaku we yose mukati mu ŵaLevi yo wangulembeka.

²⁰Viyo karonga Hezekiya ndimo wanguchitiya mu Yuda yose, ndipo wanguchita cho chenga chamampha, ndi chakurunjika, ndi chamagomekezgeka mu maso gha Ambuya Chiuta wake.

²¹Nchitu ye yose yo wanguchita mu mlimu wa nyumba ya Ambuya wanguchita kwakuyana ndi dangu ndi malangulu, wakupenja Chiuta wake, wanguchita ndi mtima wake wose ndi wangusakata.