Read gitonga 2 Mikoka 35 Bible Online

2 Mikoka 35 - gitonga bible

2 Mikoka 35

¹Josiya wanguchitiya Ambuya phaska mu Yerusalemu wangubaya mbere ya phaska pa zuŵa la chumi ndi chinayi la mwezi wakundanga.

²Wanguŵika ŵazukuru mu malo ghawo, wanguŵachiskiya ku uteŵeti wawo wa nyumba ya Ambuya.

³Ndipo wanguti ku ŵaLevi wo ŵasambizganga Yisraele yose, wo ŵenga ŵakupaturikiya ku Ambuya, wanguti, “Ŵikani bokosi lakupaturika mu nyumba yo Solomoni mwana waku Davidi, karonga waku Yisraele wanguzenga; lireke kuŵa katundu pa maphewa ghinu sono. Sono tatariyani Ambuya Chiuta winu, ndi ŵanthu ŵake wose ŵaYisraele;

⁴mujirongoso kwakulingana ndi nyumba za auskemwe, mo viriri vigaŵa vinu, nge ndimo wangulembe Davidi karonga waku Yisraele, ndi kulingana ndi vilayizgu vyaku Solomoni mwana wake.

⁵Mani mu malo ghatuŵa, kwakulingana ndi kagaŵidu ka nyumba za auskemwe ndi ŵabali ŵinu ŵanthu ŵamu charu; ndipo ndi chigaŵa chaku yose wamu mbumba za auskeu ŵa ŵaLevi.

⁶Mubaye mberere ya phaska ndi mujipaturiske, mulongosore ŵanyinu mwakuti ŵachite kwakulingana ndi mazu gha Ambuya kwaku Mosese.”

⁷Ndipo Josiya wangupaska ŵanthu vyakuŵeta, ŵana ŵa mberere ndi ŵana ŵambuzi ŵaŵenge sembe ya phaska yaku wose wo ŵenga penipo, vikwi machumi ghatatu (30,000) ndi ng'ombe vikwi vitatu (3,000); zose zamu uromba wa Karonga.

⁸Ŵakaronga ŵake so ŵangupaska ŵanthu kwawanangwa, ndi ku ŵazukuru ndi ku ŵaLevi. Hilikiya ndi Zekariya ndi Yehieli, ŵamirizi ŵa nyumba yaku Chiuta, ŵangupereka vyawanangwa vya phaska ku ŵazukuru vikwi viŵi pachanya machumi pe chumi ghankhonde ndi limoza (2,600) mberere zimana-zimana ndi ng'ombe machumi pe chumi ghatatu (300).

⁹Konaniya nayo so, ndi Shamaya, ndi Natanaeli ŵabali ŵake, ndi Hashabia, ndi Yoyeli, ndi Yozabadi, ŵara ŵa ŵaLevi, ŵangupereka ku ŵaLevi vya sembe za phaska tumberere ndi tumbuzi vikwi vinkhonde (5,000) ndi ng'ombe machumi pe chumi ghankhonde (500).

¹⁰Chinguti chanozgeka chisopo, ŵazukuru ŵanguma mu malo ghawo ndi ŵaLevi mu vigaŵa vyawo, kwakulingana ndi langulu la karonga.

¹¹Ndipo ŵangubaya phaska, ŵazukuru ŵangumija ndopa zo ŵanguronde ku ŵaLevi pakufuŵa nyama zo.

¹²Ŵangusazapo sembe yakocha kuti ŵapereke kwakulingana ndi nyumba ndi mbumba za ŵanthu nge nkhagaŵikiro kawo, kupereka kwa Ambuya nge ndimo kukurembeke mu buku laku Mosese. Viyo pe ndimo ŵanguchitiya ndi ng'ombe.

¹³Ndipo ŵangocha phaska pa moto kwakulingana ndi dangu, vyawanangwa vyakupaturika ŵangubika mu viŵiya, mu vyakufwapuska, mu misuku, ŵangugaŵiya ŵanthu ruŵi-ruŵi.

¹⁴Pavuli ŵangujinozge ŵija ndi ŵazukuru, chifukwa ŵazukuru ŵana ŵaku Aroni ŵangutangwamika ndi kupereka sembe zakocha ndi za mafuta mpaka usiku, viyo ŵaLevi ŵangujinozge ŵija ŵazukuru ŵana ŵaku Aroni.

¹⁵Ndipo ŵakumba ŵana ŵaku Asafi ŵenga mu malo ghawo kwakulingana ndi dangu laku Davidi, ndi Asafi, ndi Hemani, ndi Yedutuni muwona wa karonga, ŵalinda ŵa malikomo ghose ŵengavi kutuwapo pa nchitu yawo chifukwa ŵanyawo ŵaLevi ŵanguŵarongosore.

¹⁶Ndipo mlimu wose wa Ambuya ungurongosoreka zuŵa liya, kusunga phaska ndi kupereka sembe zakocha pa jochero la Ambuya kwakulingana ndi langulu la karonga Josiya.

¹⁷Ndipo ŵaYisraele wo ŵengapo ŵanguchita phaska nyengo yiya, ndi dghera la chiŵande chambura mtupu, mazuŵa ghankhonde ndi ghaŵi.

¹⁸Kwengavi phaska lakulingana ndi liya linguchitika mwaku Yisraele kutuwa ku mazuŵa ghaku Samuele mchimi, chingana ndi ŵakaronga wose ŵaku Yisraele ŵengavi kuchitapo phaska ndi ŵaLevi ndi wose wo ŵengapo, ŵaYuda ndi ŵaYisraele ndi ŵamu Yerusalemu.

¹⁹Phaska lo linguchitika mu chirimika cha chumi ndi vinkhonde pachanya vitatu cha muwusu waku Josiya.

²⁰Pavuli paku chenichi Josiya wanguti warongoso kasopi, Neko karonga waku Egipiti wanguza kupota nkhondo ndi Karchemishi ku Efrate. Ndipo Josiya wangutuwa kurwa nayo.

²¹Kweni wangutuma mathenga kwaku iyo kuti, “Kumbi nde nawe ndi kanthu uli iwe karonga waku Yuda? Kuti le ndaziya iwe cha kweni nyumba yiya nditambana nayo. Ndipo Chiuta wandilanguya kuti ndendeske. Reka kwambana nayo Chiuta yo wendi ine, vinu wangakupankhuwa.”

²²Kweni Josiya wangukhumba kureka cha, wangujibisa mwakuti wavwani nayo. Kuti wanguvwiya cha mazu ghaku Neko gho ghangutuwa mu mlomo waku Chiuta, ndi ŵangurwana nkhondo pa dambo laku Megido.

²³Ŵamauta ŵangumulasa Josiya, viyo karonga wanguti ku ŵanthu ŵake, “Ndituzgenipo chifukwa ndahomeka ukongwa.”

²⁴Ndipo ŵanthu ŵake ŵangumutuzgamo mu gareta ŵangumuŵika mu gareta lake lachiŵi ŵanguza nayo ku Yerusalemu. Ndipo wangufwa, ŵangumuŵika mu muunda ya ambuyake, Yuda yose ndi Yerusalemu wangumtenjere Josiya.

²⁵Yeremiya nayo wangumtenjere Josiya; ndipo ŵakumba wose ŵanthurumi ndi ŵanthukazi ŵamumbiyanga Josiya mukutenje kwawo mpaka kuno kule. Wanguchita chitenje nge ndi dangu mwaku Yisraele; wonani vikulembeka mu Buku la Chitenje.

²⁶Ndipo nchitu zinyake zaku Josiya ndi umampha wake kwakulingana ndivyo vikulembeka mumarangu gha Ambuya;

²⁷ndi milimu yake yo wanguchita yakudanga ndi yakumariya, yikulembeka mu Buku la ŵaKaronga ŵaku Yisraele ndi Yuda.