Read gitonga Ezra 5 Bible Online

Ezra 5 - gitonga bible

Ezra 5

¹Ndipo ŵamchimi, Hagayi, ndi Zekariya mwana waku Ido, ŵanguchima ku ŵaYuda ŵamu Yuda ndi Yerusalemu mu zina laku Chiuta waku Yisraele yo wenga pachanya pawo.

²Ndipo Zerubabele mwana waku Sealatiele ndi Yeshua mwana waku Yozadaka ŵangusoka, ŵangwamba kuzenga nyumba yaku Chiuta mu Yerusalemu; ndi ŵamchimi ŵaku Chiuta ŵenga pamoza nawo kuŵawovya.

³Pa nyengo yo kunguŵaziya tatenayi mumirizi wa chigaŵa cha sirgha la msinji, ndi Setarabozenayi ndi ŵanyawo. Wangukamba kuti, “Kumbi ndiyani yo wamulanguliyani kuzenga nyumba iyi ndi kumara chiliŵa ichi?”

⁴Ŵanguŵafumba so kuti, “Kumbi mazina ghawo mbayani wo ŵazenga nyumba?”

⁵Kweni jiso laku Chiuta wawo lenga pa ŵara ŵaku Yuda, ndipo ŵamirizi yaŵa ŵengavi kuŵakanizga mpaka makani ghakafike kwaku Dariusi ndipo ŵavwe kwamuka kwake mu kalata.

⁶Mazu gho Tetanayi mumirizi wa sirgha liya msinji, ndi Setarabozenayi ndi ŵanyake ŵara mu vigaŵa vya sirgha liya msinji, ŵangutuma ku karonga Dariusi,

⁷ŵangutuma kalata, ŵangulemba kuti, “Ku karonga Dariusi chimangu chose.

⁸Kuziŵike ku karonga kuti tinguruta ku charu chaku Yuda, ku nyumba yaku Chiuta Mkuru, yo yizengeka sono ndi mya yikuru ndi miti yiŵikika pa viliŵa. Nchitu yitenda mwa ruŵi, yilivi kulondeka kutuwa mu manja ghawo.

⁹Ndipo tinguŵafumba ŵara ŵawo kuti, ‘Wamulanguliyani njani kuzenga nyumba iyi, ndi kumara viliŵa ivi?’

¹⁰Tinguŵafumba so mazina ghawo kuti timuneniyeni imwe, kuti tighalembe mazina ghaku wo ŵenga ŵarongozgi ŵawo.

¹¹Ndipo pakwamuka ŵanguti, ‘Te ŵanchitu ŵaku Chiuta wa kuchanya ndi wa charu chapasi. Tizenga so nyumba yo yinguzengeka virimika vinandi vyarutapo, yeniyo karonga mkuru waku Yisraele wanguzenga ndi kuyimarizga.

¹²Kweni chifukwa ŵambuyafwe ŵangutundiriska Chiuta wa kuchanya, wanguŵapereka ku umkoli mu janja laku Nebukadanezara karonga waku Babiloni muKaldiya yo wangubwanganduwa nyumba iyi ndi kutole ŵanthu ku Babiloni.

¹³Ndipuuli mu chirimika chakudanga chaku Sirusi karonga waku Babiloni, uyo Sirusi wanguchita dangu kuti nyumba yaku Chiuta yizengeke so.

¹⁴Ndipo viyaŵi navyo vya golide ndi siliva vyamu nyumba yaku Chiuta, vyo Nebukadanezara wanguto, kuvituzga mukasopi yo wenga mu Yerusalemu, wanguviŵika mu nyumba ya ŵachiuta ŵaku babiloni. Kweni Sirusi karonga waku Babiloni wanguvituzga mu nyumba ya ŵachiuta mu Babiloni, ndipo wanguvipereka ku munthu zina lake Shesebazara, yo wangumuŵika kuŵa mumirizi.

¹⁵Wanguti kwaku iyo, To viyaŵi ivi, rutanga, upinge, ukaviŵike mu kasopi yo wemu Yerusalemu; ndipo nyumba yaku Chiuta yizengeke so mu malo ghake.

¹⁶Ndipo Shesebazara wanguza ndi kuŵika chiŵanja cha nyumba yaku Chiuta yo yemu Yerusalemu, kutuwa pa nyengo yiya kufika kunu ku sono yeche kuzengeka, ndipo yindamare.’

¹⁷Viyo asani kungamuŵiyani kwamampha karonga wapenje mu vyakulembapo vyose vya karonga mu Babiloni. Kuwoneke pamwenga dangu lingumikika ndi karonga Sirusi kuti yizengeke nyumba iyi yaku Chiuta ku Yerusalemu. Ndipo Karonga watitumiye mazu kutinene cho karonga wakamba kuti chichitike pa mlando uwu.”