Read gitonga Nehemiya 8 Bible Online

Nehemiya 8 - gitonga bible

Nehemiya 8

¹Ndipo ŵanthu wose ŵanguwungana ndi mtima umoza pa bwalo la paurongo pa Likomo la Maji: ndipo ŵangunene Ezra mlembi yo kwachito buku la dangu laku Mosese lo Ambuya angupaska kwaku Yisraele.

²Ndipo Ezra mzukuru yo wanguza nalo dangu ku unganu wo, ŵanthurumi ndi ŵanthukazi ndi wose wo ŵavwanga ndi kuwamo pa zuŵa lakudanga la mwezi wa chiŵi.

³Ndipo wanguŵerenga mwenimo wachirata maso ku bwalo paurongo pa Likomo la Maji kwamba pa mlenji-lenji mpaka ndi msana pakati, pa maso pa ŵanthurumi ndi ŵanthukazi ndi wose ŵeniwo ŵaŵangamo; ndipo makutu gha ŵanthu wose ghangutegherezga ku buku la dangu.

⁴Ezra mlembi yo wanguma pa chiguŵa cha miti cho ŵangulongosore mlimu wenuwu, ndipo pamoza nayo panguma Matatiya, Shema, Anaiya, Uriya, Hilkiya, ndi Maseya ku janja lake lakurghiya, ndi Pedaya, Mishaele, Malkiya, Hashumu, Hashabadani, Zekariya, ndi Meshulama ku janja lake la maze.

⁵Ndipo Ezra wangujura buku liya pa maso gha ŵanthu wose pakuti iyo wenga pachanya pa ŵanthu wose; ndipo wanguti walijura ŵanthu wose ŵanguma.

⁶Ndipo Ezra wangutumbika Ambuya Chiuta mura; ndipo ŵanthu wose ŵangwamuka, “Ameni, Ameni,” ŵangusoska manja ghawo; ndipo ŵanguŵerama mitu yawo ndi ŵangusopa Ambuya ndi visku vyawo kavunama pasi.

⁷Ndipo Yeshua, Bani, Sherebiya, Jamini, Akubu, Shabatai, Hodiya, Maseya, Kelita, Azariya, Yozabadi, Hanani, Pelaya, ŵaLevi, ŵangovya ŵanthu kuwamo dangu, penipo ŵenga ŵeche mu malo ghawo.

⁸Ndipo ŵanguŵerenga khwerukhweru mu buku lo vya mu dangu laku Chiuta, ndipo ŵanguŵabanuwa chinjeru viyo kuti ŵanthu ŵanguwamo vyo vinguŵerengeka.

⁹Ndipo Nehemiya yo wenga mweruzgi mura, ndi Ezra mzukuru ndi mlembi, ndi ŵaLevi ŵeniwo ŵangurunguchizga ŵanthu, ŵanguti ku ŵanthu wose, “Zuŵa ndakupaturika ku Ambuya Chiuta winu; mungatenjenga chingana nkhuliya cha.” Pakuti ŵanthu wose ŵaliyanga ŵanguti ŵavwa mazu gha dangu lo.

¹⁰Sono ŵanguti kwaku wo, “Rutaninga kwinu, kargheninga mafuta ndi kamweninga vinyo wakunowa ndipo vinyake mukatumiyenge yo walivi kujilongosore; pakuti zuŵa ili ndakupaturika ku Ambuya widu; ndipo mungaŵanga ŵachitima cha, pakuti chimwemwe cha Ambuya ndi nthazi yinu.”

¹¹Viyo ŵaLevi ŵanguchetamiska ŵanthu, ŵanguti, “Chetamani, pakuti zuŵa ili ndakupaturika, mungaŵanga ŵachitima cha.”

¹²Ndipo ŵanthu ŵanguruta kwawo kwachirgha ndi kumwa ndi kwachituma vinyake ndi kwachichita chimwemwe chikuru, pakuti ŵanguwamo mazu gho ghangutaulika kwaku iwo.

¹³Pa zuŵa la chiŵi mitu ya zinyumba za auskeu ya ŵanthu wose, pamoza ndi ŵazukuru ndi ŵaLevi, ŵanguziya pamoza kwaku Ezra mlembi yo kuzachisambira mazu gha dangu lo.

¹⁴Ndipo ŵangusaniya kuti ghakulembeka mu dangu lenilo Ambuya angulanguliya mwaku Mosese kuti ŵaYisraele ŵajenge mu misasa pa nyengo ya dghera la mwezi wa chinkhonde ndi chiŵi,

¹⁵ndipo kuti ŵataulenge ndi kumemeza mu mizi yawo ndi mu Yerusalemu, kuti, “Rutani ku mitunthu ndi mukazi ndi mphanda za olive, olive wamu dondo, ndi za miti ya maluŵa, ndi kanchindu, ndi miti yinyake ya mani kuzachichita misasa uli ndimo kukulembeke.”

¹⁶Viyo ŵanthu ŵanguruta ndi ŵanguza navyo ndi ŵangujichitiya misasa, we yose pa mtenje wake, ndimu mabwalo ghawo ndi mu mabwalo gha nyumba yaku Chiuta, ndi mu bwalo la Likomo la Maji ndi mu bwalo la Likomo laku Efraimu.

¹⁷Ndipo wumba wose waku wo ŵanguweko ku umkoli ŵanguchita misasa ndi ŵanguja mwenimo; pakuti kutuwa ku mazuŵa ghaku Yeshua mwana munthurumi waku Nuni kufika ku zuŵa ili ŵaYisraele ŵengavi kuchitapo viyo. Ndipo penga chimwemwe chikuru ukongwa.

¹⁸Ndipo zuŵa ndi zuŵa kwamba pa zuŵa lakudanga mpaka ku zuŵa lakumariya, ŵanguŵerenga mu buku la dangu laku Chiuta, ŵangusunga dghera mazuŵa ghankhonde ndi ghaŵi: ndipo pazuŵa la chinkhonde ndi chitatu penga unganu wakutemeka, kwakulingana ndilangulu.