Read gitonga Estere 4 Bible Online

Estere 4 - gitonga bible

Estere 4

¹Mordikayi wanguti waziŵa vyose vyo vinguchitika wanguparuwa vyakuvwara vyake, wanguvwara chigudulu ndi wangujidiriya vyoto, wangutuwa mu msumba kuliya ndi kubangura pachanya kwa kuŵaŵa mtima,

²wanguza kwakuratana ndi likomo la karonga, pakuti kwengavi yumoza wanguziŵa kusere pa likomo la karonga yo wanguvwara chigudulu.

³Ndipo mu chigaŵa chose cha charu mo mungufika dangu la karonga ndi langulu lake mwenga chitenje mukati mu ŵaYuda ndi kukana kurgha ndi kuliya masozi ndi kubongo; ŵanandi ŵangugona mu vyoto.

⁴Viyo ŵamwali ŵaku Estere ndi vidandani ŵanguza ŵangumunene, fumukazi yingupwetekeka ukongwa mu mtima, ndipo yingutuma chakuvwara kwachivwarika Mordikayi ndi kumzuwa chigudulu, kweni kuti wanguchironde cha.

⁵Viyo Estere wangudana Hataki yumoza wa ŵateŵeti ŵa karonga wo ŵangutondoleka kumtakatakiya, wangumpaska mazu kwachikamba kwaku Mordikayi, kuti waziŵi nchine, ndipo chifukwa chake nchakuti uli.

⁶Hataki wanguruta kwaku Mordikayi ku luluwa la msumba kwakuthoŵana ndi likomo la karonga,

⁷ndipo Mordikayi wangumkonkhome vyose vyo vingumwiya, ndi unandi wa ndrama zo Hamani wangupangana kuti waperekenge ku nyumba ya chuma ya karonga kuti wabayike ŵaYuda wose.

⁸Ndipo so Mordikayi wangumpaska kalata wa langulu lo lingupaskika mu Susa la kubayiya ŵaYuda, kuti ŵakamrongo Estere, ndi kumkonkhome, ndi kumpangizga kuti wakasere ku karonga kuŵaŵeyerere ndi ku ŵapemphe ŵa mtundu ŵake.

⁹Ndipo Elataki wanguza ndi kumkambiya Estere mazu ghaku Mordikayi.

¹⁰Estere wangukamba ndi Hataki, wangumpaska mazu kuruta nagho kwaku Mordikayi,

¹¹kuti, “Ŵa nchitu wose ŵa karonga ndi vyaru vyose vya karonga ŵaziŵa kuti munthu yose, munthurumi pamwenga munthukazi, yo wasere ku luluwa la mkati wambura kudanika dangu ndimoza ndakuti wabayike, asani karonga walivi kumsoske nthonga ya ufumu ya golide kuti waŵe ndi umoyo. Ndipo ine ndirivi kudanika kwachisere ku karonga mazuŵa machumi ghatatu.”

¹²Ndipo wangumunene Mordikayi mazu ghaku Estere.

¹³Penipo Mordikayi wanguŵanene kuti ŵamumuke Estere kuti, “Reka ku ghanaghana kuti utaskikenge mu nyumba ya karonga kwakuruska ŵaYuda ŵanyake wose.

¹⁴Chifukwa asani ujenge chete nyengo iyi utaski ndi chipozomosku cha ŵaYuda vituriyenge kunyake, kweni iwe ndi ŵamunyumba ya ausu mukabayikanga. Kumbi njani waziŵa vinu iwe waza ku ufumu uwu chifukwa cha nyengo nge ndi iyi?”

¹⁵Ndipo Estere wanguŵatuma kuwezge Mordikayi mazu yagha ghakuti,

¹⁶“Ruta ukawunganiske ŵaYuda wose wo ŵemu msumba wa Susa, mufunge kurgha ndi kumwa mazuŵa ghatatu, usiku ndi msana. Ine ndi ŵateŵeti ŵangu ŵanthukazi nafwe tikafunganga kwakulingana ŵaka. Sono pavuli ndamsere ku karonga nanga ichi nchakupambana ndi dangu; ndipo asani nkhufwa, ndifwenge ŵaka.”

¹⁷Viyo Mordikayi wanguruta, wangwachichita vyose nge ndimo Estere wangumlanguliya.