Read gitonga Estere 9 Bible Online

Estere 9 - gitonga bible

Estere 9

¹Mu mwezi wa chumi ndi yiŵi, wo ndi mwezi wa Adara, pa zuŵa la chumi ndi ghatatu la mwezi weniwo, penipo dangu la karonga ndi langulu lake lenga pafupi kuti lifiskike, mu zuŵa lo ŵarwani ŵa ŵaYuda ŵangugomekezga kupunda ŵaYuda kweni kungung'anamuka, zuŵa lo ndilo ŵaYuda ŵanguthereske ŵarwani wo ŵanguŵatinkha.

²ŴaYuda ŵanguwungana pamoza mu mizi yawo mu vigaŵa vyose vya vyaru vya karonga Ahaswerusi, kuŵayukiya wo ŵakhumbanga kuŵapweteka, ndipo kwengavi yumoza yo wanguziŵa kumikisirana nawo, chifukwa chofyu chawo chinguwiya ŵanthu wose.

³Ndipo mafumu ghose gha vigaŵa, ndi ŵachirongozgi, ndi ŵara ndi ŵamirizi ŵa karonga ŵangovya ŵaYuda chifukwa cha kopa Mordikayi.

⁴Chifukwa Mordikayi wenga mura mu nyumba ya karonga, mbiri yake yinguvwika mu vyaru vyose; chifukwa Mordikayi uyu wakuliyanga-kuliyanga.

⁵Viyo ŵaYuda ŵangubaya so ŵarwani ŵawo ndi lipanga, kubaya ndi kunanga, ŵanguchita mo ŵangukhumbiya pe ndiwo ŵanguŵaŵemba.

⁶Ndipo mu msumba wa Susa ŵaYuda ŵangubaya ndi kunanga ŵanthurumi machumi pe chumi ghankhonde (500).

⁷Ndipo so ŵangubaya Parshan-data, Dalfoni, ndi Aspata,

⁸ndi Porata ndi Adalia, ndi Aridata,

⁹ndi Parmasha, ndi Arisai, ndi Aridai, ndi Vaizata.

¹⁰Ŵana ŵanthurumi chumi ŵaku Hamani mwana waku Hamedata, mphindikwa ya ŵaYuda: kweni vinthu vyawo kuti ŵanguskoŵa cha.

¹¹Pa zuŵa lenili unandi wa ŵakubayika mu Susa ungutoreke ku karonga.

¹²Ndipo karonga wanguti kwaku Estere fumukazi, “Mu Susa, ŵaYuda ŵabaya ndi ŵananga ŵanthurumi machumi pe chumi ghankhonde (500) ndi ŵana chumi ŵaku Hamani. Manyi ŵachita uli mu vyaru vyose vya karonga! Kumbi sono pempho lako ndine? Kukuchitikiyenge. Kumbi pempho lako linyake ndine? Kukufiskikiyenge.”

¹³Ndipo Estere wanguti, “Asani chikondweskenge karonga wazomere, kuti ŵaYuda wose ŵamu Susa ŵachite so mawa kwakulingana ndi dangu la msana wale. Ndipo ŵana chumi ŵaku Hamani ŵapayikike pa muti.”

¹⁴Ndipo karonga wangulangula kuti kuchitike viyo, mazu ghangutuwa mu Susa, ndipo ŵana chumi ŵaku Hamani ŵangupayikika.

¹⁵ŴaYuda wo ŵenga mu Susa nawo ŵanguwungana pa zuŵa la chumi ndi ghanayi la mwezi Adara, ŵangukoso ŵanthu ŵanthurumi machumi pe chumi ghatatu mu Susa, kweni vyawo kuti ŵanguskoŵa cha.

¹⁶Kweni ŵaYuda ŵanyake wo wenga mu vyaru vinyake vya karonga ŵanguwungana pamoza kuvikiriya umoyo wawo ndipo ŵangupumuwa ku ŵarwani ŵawo, ŵangukosopo, vikwi machumi ghankhonde ndi ghaŵi pachanya vinkhonde vyaku wo ŵanguŵaŵemba, kweni vyawo kuti ŵanguskoŵa cha.

¹⁷Cho chenga pa zuŵa la chumi, ndi ghatatu la mwezi Adara, ndipo pa zuŵa la chumi ndi ghanayi ŵangupumuwa, ŵangulichita kuŵa zuŵa la dghera ndi la likondwa.

¹⁸Kweni ŵaYuda ŵamu Susa ŵanguwungana pa zuŵa la chumi ndi ghatatu ndi la chumi ndi ghanayi, ŵangupumuwa pa la chumi ndi ghankhonde kuŵa zuŵa la dghera ndi likondwa.

¹⁹Chifukwa ichi ŵaYuda ŵamu mizi yambura malinga, ŵangulichita zuŵa la chumi ndi ghanayi la mwezi Adara kuŵa zuŵa la likondwa ndi la dghera zuŵa lamampha, lakutumirana twamampha-twamampha.

²⁰Ndipo Mordikayi wangulemba vinthu ivi ndi kutuma ŵakalata ku ŵaYuda wose ŵamu vyaru vyose vya karonga Ahaswerusi, ŵapafupi ndi ŵakutali;

²¹kuŵalanguliya ichi kuti ŵasungengi zuŵa la chumi ndi ghanayi la mwezi Adara ndi la chumi ndi ghankhonde lake, chirimika ndi chirimika,

²²pakuti ndi mazuŵa mwaku ghenigho ŵaYuda ŵangupumuwa ku ŵarwani ŵawo mwezi weniwo chitima chawo chingusanduka chimwemwe, ndi kutenje kungusanduka zuŵa lamampha; kuti ŵaghasunge kuŵa mazuŵa gha dghera, ndi chimwemwe, ndi ghakutumirana vyawezi ndi kupaska ŵasauchi vyawanangwa.

²³Viyo ŵaYuda ŵanguzomera kuchita nge ndimo ŵangwambiya, ndimo Mordikayi wanguŵalembe.

²⁴Chifukwa Hamani mwana waku Hamedata mu Agagi, mphindikwa ya ŵaYuda wose wanguchitiya chiwembu ŵaYuda kuŵananga ndi wangupong'a Puri, yo ndi mphenduzga, ku kuŵadina ndi kuŵamara;

²⁵kweni penipo Estere wanguza paurongo pa karonga wangulangula mu ŵakalata kuti chiŵembu chiheni cho wanguchitiya ŵaYuda chiwere pa mutu wa mweneko, ndi kuti iyo ndi ŵana ŵake ŵapayikike pa muti.

²⁶Pa chifukwa ichi ŵangudana mazuŵa yagha Purimu[4] zina lakutuliya ku mazu Puri. Ndipo so chifukwa cha mazu ghose gho ghangulembeka mu kalata uyu, ndi vyo ŵanguviwona mu mlando uwu, ndi vyo vinguŵaŵiya,

²⁷ŵaYuda ŵangumika ichi, ŵangujilapizga ŵija ndi mphapu yawo ndi wose wo ŵangujibatika kwaku iwo, mwakuti chireke kutondeka, ŵatenere kusunga mazuŵa yagha ghaŵi kwakulingana ndi cho chalembeka, ndi kwakulingana ndi nyengo yawo ya kutemeka, chirimika ndi chirimika;

²⁸ndikuti mazuŵa yagha ghakumbukikenge ndi kusungika mu migoneze yose, mu mbumba yose, mu vyaru vyose ndi mu mizi yose, ndi kuti mazuŵa yagha gha Purimu ghareke kujoworeka mu ŵaYuda pamwenga kuruwika kwa mazuŵa yagha mu mbeu yawo.

²⁹Viyo Estere fumukazi, mwana waku Abihayeli, ndi Mordikayi mu Yuda, wangulemba ndi mtufu wose kukhozga kalata uyu wachiŵi wa Purimu.

³⁰Ŵangutuma ŵakalata ku ŵaYuda wose mu vyaru machumi pe chumi pachanya machumi ghaŵi ndi vinkhonde ndi viŵi (127) vya ufumu waku Ahaswerusi mazu gha chimangu ndi gha uneneska,

³¹kuti mazuŵa yagha gha Purimu ghakhozgeke mu nyengo yake yakutemeka, nge ndimo Mordikayi muYuda ndi fumukazi Estere ŵanguteme iwo, ndimo iwo ŵangujiteme ŵija ndi mphapo yawo, makani ghakunguzga kurgha ndi kutenje kwawo.

³²Dangu laku Estere lingukhozga makani yagha Purimu, ndipo lingulembeka mu buku.