Read gitonga Chituwa 1 Bible Online

Chituwa 1 - gitonga bible

Chituwa 1

¹Yagha ndi mazina gha ŵana ŵanthurumi ŵaku Yisraele wo ŵenga ku Egipiti pamoza ndi Yakobe; we yose ndi ŵamu nyumba yake:

²Rubene, Simeoni, Levi, Yuda,

³Isakara, Zebuluni Benjamini,

⁴Dani, Naftali, Gadi ndi Ashere.

⁵Wose ŵa mphapu yaku Yakobe ŵenga ŵanthu machumi ghankhonde ndi ghaŵi (70), Yosefe wenga kale mu Egipiti.

⁶Sono Yosefe wangufwa ndi ŵana ŵanyake wose ndi mgonezi wuwa wose.

⁷Kweni ŵana ŵaku Yisraele ŵangupapana ndi ŵangwandana ukongwa. Ŵangwandana ndi ŵangukuwa ndi nthazi kwakuruska, viyo charu chinguzazika ndi iwo.

⁸Sono kunguwa karonga munyake wa Egipiti, yo wengavi kuziŵa Yosefe.

⁹Ndipo wanguti ku mtundu wake, “Awonani ŵanthu ŵaYisraele ŵarutizga unandi ndi mbanthazi kwakuruska ifwe.

¹⁰Tiyeni tichite nawo kwakuchenje, vinu ŵangandana. Asani yatiwiya nkhondo, ŵakajisazganga ku ŵakupindikana ŵidu, ndipo ŵakarwanga nafwe; ndi ŵakathaŵangamo mu charu ichi.”

¹¹Viyo angumika nduna za ŵanchitu paku wo, ŵakuŵasuzga ndi mphingu zizitu. Ndipo ŵangumuzenge Farao mizi ya nyumba za mbiku, Pitomo ndi Ramsese.

¹²Kweni mo ŵaŵasuzgiyanga ukongwa ndimo ŵarutizgiyanga kwandana, ndi ŵarutizgiyanga kuzaza charu. Ndipo ŵaEgipiti ŵangutenthema ŵaYisraele.

¹³Chifukwa cho ŵangutataliska nchitu ŵaYisraele kwambura lisungu,

¹⁴ndipo ŵanguŵasuzga ukongwa, pakuŵagwiriska nchitu zizitu, kukasa dongo, ndi kuwumba ncherwa ndi mitundu yose ya nchitu zamu minda. Mu nchitu yawo yose ŵanguŵatataliska kwambura lisungu.

¹⁵Sono Farao wa Egipiti wanguti ku ŵazamba ŵa ŵaHebere, yumoza waku wo wenga Shifara ndi munyake Puwa,

¹⁶“Asani mupapizga ŵanthukazi ŵaHebere ndipo mutiŵawona pa mpando wakuchiriyapo, asani ndi mwana munthukazi mumureke wamoyo.”

¹⁷Kweni ŵazamba wo ŵawopanga Chiuta. Ndipo kuti ŵanguchita nge ndimo wanguŵalanguliya karonga wa Egipiti cha. Kweni ŵanguŵareka ŵamoyo ŵana ŵanthurumi.

¹⁸Viyo karonga wa Egipiti wangudana ŵazamba wo, ndi wanguti kwaku wo, “Chifukwa chine mwachita ichi, ndipo mwazomerezga ŵana ŵanthurumi kuŵa ŵamoyo?”

¹⁹Ŵazamba ŵanguti kwaku Farao, “Chifukwa ŵanthukazi ŵaHebere kuti ŵakozgana ndi ŵanthukazi ŵaEgipiti cha; pakuti mbanthazi ndipo ŵachira muzamba wenga wandaze kwaku wo.”

²⁰Viyo Chiuta wanguŵachitiya umampha ŵazamba ŵa; mtundu ungwandana ndi ungukuwa ndi kulimba.

²¹Ndipo chifukwa ŵazamba ŵangopa Chiuta wanguŵapaska ŵana.

²²Sono Farao wangulanguliya mtundu wake, “Mwana yose munthurumi wakupapika ku ŵaHebere mumutaye mu msinji Nile, kweni mwana munthukazi yose mumureke wamoyo.”