Read gitonga Chituwa 10 Bible Online

Chituwa 10 - gitonga bible

Chituwa 10

¹Sono Ambuya anguti kwaku Mosese, “Ruta, ukawere kwaku Farao; pakuti ndanonopeska mtima wake ndi mtima wa ŵaŵanda ŵake, alinga kuti ndirongo visimikizgu vyangu mukati mwawo.

²Ndipo unene mwana wako munthurumi ndi mzuku wako munthurumi, ndi uli mo ndachitiya ndi ŵaEgipiti, ndi visimikizgu vyo ndaŵawoneska alinga kuti muziŵe kuti ndine Ambuya.”

³Viyo Mosese ndi Aroni ŵangwachisere kwaku Farao ndi ŵanguti kwaku iyo, “Viyo atiti Ambuya, Chiuta wa ŵaHebere, ‘Mpaka zuŵanji ukakananga kujiyuyuwa paurongo pangu? Ŵazomerezge ŵarutenge ŵanthu ŵangu, alinga kuti ŵakanditataliyenge.

⁴Pakuti asani ukana kuŵazomerezga kuruta ŵanthu ŵangu, awona, lamawa ndikazanga ndi ŵazombe mu charu chako,

⁵ndipo ŵakaburumutizganga charu chose, mwakuti paulengevi yumoza wangawona charu; ndipo ŵakarghanga vyo vingumujariyanipo pavuli pa matalala, ndipo ŵakarghanga muti wako we wose weniwo ngwakume mu munda,

⁶ndipo ŵakazazanga mu nyumba zako ndi nyumba za ŵaŵanda ŵako wose ndi za ŵaEgipiti wose; ŵeniwo mbausu pamwenga ambuyako ŵengavi kuŵawona, kwamba pa zuŵa lo ŵangwazijariya pa charu chapasi kufika zuŵa lino.’ ” Sono ŵangung'anamuka ndi ŵangutuwamo mwaku Farao.

⁷Ndipo ŵaŵanda ŵaku Farao wanguti kwaku iyo, “Mpaka zuŵanji uyu munthu wakatiŵiyanga chiŵana ifwe? Muŵazomerezge yaŵa ŵanthu ŵarutenge, alinga ŵakatataliyenge Ambuya Chiuta wawo; kumbi ndasono undaziŵe kuti Egipiti wanangika?”

⁸Viyo Mosese ndi Aroni ŵanguŵawezge kwaku Farao; ndipo ŵanguti kwaku wo, “Rutaninge katatalyeni Ambuya Chiuta winu; kweni mbayani ŵakarutanga?”

⁹Ndipo Mosese wanguti, “Tikarutanga ndi ŵana ŵidu ndi makhongwe ghidu: tikarutanga ndi ŵana ŵidu ŵanthurumi ndi ŵanthukazi, ndipo ndi mberere zidu ndi ng'ombe zidu, chifukwa titenere kwachichitiya dghera Ambuya.”

¹⁰Ndipo wanguti kwaku wo “Ambuya ŵaŵe namwe, kuti ndikakuzomerezganinge nadi imwe ndi ŵana ŵinu kuruta cha! Nadi, mwendi kafukwa kaheni mu maghanaghanu ghinu.

¹¹Awa! Rutani, mwanthurumi pe mukati mwinu, ndi mukatataliye Ambuya, pakuti cho ndicho mukweŵeka.” Ndipo wanguŵadikiska pa maso paku Farao.

¹²Sono Ambuya anguti kwaku Mosese, “Tambaruliya janja lako pa charu cha Egipiti chifukwa cha ŵazombe alinga kuti ŵaze pa charu cha Egipiti, ndi kurgha chakume chose mu charu, chose cho chingusiyika ndi matalala.”

¹³Viyo Mosese wangutambaruliya ndodo yake pa charu cha Egipiti, ndipo Ambuya anguputiska mphepo yaku vuma pa charu zuŵa lose liya ndi usiku wose wuwa; ndipo kunguti kwacha ndi mlenji mphepo yiya yaku vuma yinguza ndi ŵazombe.

¹⁴Ndipo ŵazombe ŵanguza pa charu chose chaEgipiti, ndi ŵangubota pa charu chose cha Egipiti, mdima bi wa ŵazombe wo kale kuti ŵanguwonekapo cha, ndipo kuti ŵakawonekangapo so cha pavuli.

¹⁵Pakuti ŵanguburumutizga charu chose, ndipo charu chenga cha mdima bi ndipo ŵangurgha vyakume vyose mu charu chiya, ndi vipasi vyose vyamu miti vyeniyo matalala ghangusiya; palivi kaŵisi nanga nkhamoza kangujako, chingana ndi muti pamwenga chakupanda mu munda, mu charu chose cha Egipiti.

¹⁶Sono Farao wangudana Mosese ndi Aroni kwaruŵiruŵi, ndi wanguti, “Ndalakwiya Ambuya Chiuta winu, ndi imwe so.

¹⁷Iku sono, ndigowokiyeni ulakwi wangu, kenaka kamoza pe, ndipo ŵeyereni ku Ambuya Chiuta winu, kutuzgako nyifwa iyi kwangu.”

¹⁸Viyo ŵangutuwako kwaku Farao ndi ŵanguŵeyere Ambuya.

¹⁹Ndipo Ambuya angung'anamuwa mphepo ya nthazi ukongwa yaku zambwe, yeniyo yingusoska ŵazombe ndi kuŵaputiskiya mu Nyanja Yiyera, kuti mungusiyika zombe nanga njumoza cha mu charu cha Egipiti.

²⁰Kweni Ambuya angunonopeska mtima waku Farao, ndipo kuti wanguzomerezga ŵana ŵaku Yisraele kuruta cha.

²¹Sono Ambuya anguti kwaku Mosese, “Tambaruliya janja lako kuchanya kuti kuŵe mdima pa charu cha Egipiti, mdima uzitu.”

²²Viyo Mosese wangutambaruliya janja lake kuchanya ndipo kunguŵa mdima uzitu mu charu chose cha Egipiti mazuŵa ghatatu;

²³ŵengavi kuwonana yumoza ndi munyake nanga nkhuti yumoza wasokepo pa malo ghake kwa mazuŵa ghatatu; kweni ŵaYisraele wose ŵenga ndi ukweru mo ŵajanga.

²⁴Sono Farao wangudana Mosese, ndi wanguti, “Rutani, katataliyeni Ambuya, ŵana ŵinu nawo ŵarutenge namwe, kweni viŵetu vinu ndi miskambu yinu pe vijariye vuli.”

²⁵Kweni Mosese wanguti, “Utenere kutizomerezga kuto viŵetu vya sembe yakocha, kuti tikapereke ku Ambuya Chiuta widu.

²⁶Titinere kuruta ndi ng'ombe zidu viyo, kujako kanthu cha, nanga nchiŵeto chimoza, chifukwa titenere kwachipereka nge ndi nsembe ku Ambuya Chiuta widu ndipo kuti tiziŵa cha nchine cho titenere kumutataliya nacho mpaka penipo tafika kuwa.”

²⁷Kweni Ambuya angunonopeska mtima waku Farao ndipo kuti wanguzomerezga cha kuti ŵarutenge.

²⁸Sono Farao wanguti kwaku iyo, “Tuwako kwangu, uchenje kuti ungawonanga so chisku changu cha; chifukwa mu zuŵa lo wazamuwone chisku changu wazamkufwa.”

²⁹Mosese wanguti, “Nchamampha kuti ndiwonenge so chisku chinu cha.”