Read gitonga Chituwa 11 Bible Online

Chituwa 11 - gitonga bible

Chituwa 11

¹Ambuya anguti kwaku Mosese, “Kwaja childeru chimoza cho ndikatoliyanga paku Farao ndi pa Egipiti; pavuli paku cho wakakuzomerezganinga kutuwamo muno; wachikuzomerezgani kuruta wakakudikiyaninga limu.

²Sono kamba ku ŵanthu, kuti ŵapemphane munthurumi we yose ndi mzengezgani wake, munthukazi we yose ndi mzengezgani wake, vijewere vya siliva ndi vya golide”.

³Ndipo Ambuya anguchita wezi ku ŵanthu pa maso gha ŵaEgipiti. Ndipo so, Mosese wenga wakuzirwa ukongwa mu charu cha Egipiti, pa maso gha ŵaŵanda ŵaku Farao ndi pa maso gha ŵanthu.

⁴Ndipo Mosese wanguti, “Viyo atiti Ambuya, ‘Ndi usiku pakati ndikarutanga mukati mu Egipiti;

⁵ndipo ŵana ŵaumwali wose mu charu cha Egipiti ŵakafwanga, kwamba ku ŵaumwali ŵaku Farao mweniyo pa chitengo chake cha ufumo mpaka kwachifika ku ŵaumwali ŵa muŵanda munthukazi, mweniyo we kuvuli kwa mphe, ndi chaumwali chose cha ng'ombe.

⁶Ndipo kukaŵanga maliro ghakuru mu charu chose cha Egipiti ghenigho ghalivi kuŵapo kale, chingana nkhuti ghakaŵangapo so cha.

⁷Kweni pa munthu nanga njumoza wa ŵaYisraele manyi ndi munthu pamwenga ng'ombe, palivi garu yo wakalurumanga; mwakuti muziŵe kuti Ambuya achita mphambano pakati pa ŵaEgipiti ndi ŵaYisraele.’

⁸Ndipo ŵaŵanda ŵinu wose yaŵa ŵakasikiyanga kwangu, ndi kuŵeramiya ine, ndi kuti, ‘Tuwanimo, ndi ŵanthu wose wo ŵatikurondo’. Ndipo pavuli pake ine ndikatuwanga.” Ndipo wangutuwako kwaku Farao ndi mtima wakufya.

⁹Sono Ambuya anguti kwaku Mosese, “Farao kuti wakakutegherezganga cha; mwakuti vyakuziziswa vyangu vyandaniskike mu charu cha Egipiti.”

¹⁰Mosese ndi Aroni ŵanguchita vyakuziziswa ivi vyose paurongo paku Farao, kweni Ambuya angunonopeska mtima waku Farao ndipo kuti wanguŵazomerezga cha ŵaYisraele kutuwamo mu charu.