Read gitonga Chituwa 13 Bible Online

Chituwa 13 - gitonga bible

Chituwa 13

¹Ambuya anguti kwaku Mosese,

²“Undipatuliye waumwali wose, che chose cho nchakudanga kubanuwa chibali mukati mu ŵaYisraele, wose ŵa munthu ndi ŵa nyama, mbangu.”

³Ndipo Mosese wanguti ku ŵanthu, “Kumbukani zuŵa ili, mwaku lo mungutuliya mu Egipiti, kutuwa mu nyumba ya uŵanda, pakuti ndi nthazi ya janja Ambuya Angukutuzgani ku malo yagha: kuwulevi kurgha chiŵande cha mtupu.

⁴Zuŵa ili mukatuwanga, mu mwezi wa Abibi.

⁵Ndipo penipo Ambuya atikutoleni mu charu cha ŵaKanani, ŵaHiti, ŵaAmori, ŵaHivi, ndi ŵaYebusi cho angurapiya ku auskemwe kwachipaska imwe, charu chakutaŵala mukaka ndi uchi, mukasunganga uteŵeti uwu mu mwezi uwu.

⁶Mazuŵa ghankhonde ndi ghaŵi mukarghanga chiŵande chambura mtupu, ndipo pa zuŵa la chinkhonde ndi chiŵi kukaŵanga dghera laku Ambuya.

⁷Chiŵande chambura mtupu chikarghikanga mazuŵa ghankhonde ndi ghaŵi, chiŵande cha mtupu chireke kuwoneka mwinu mu charu chose.

⁸Ndipo mukamuneniyanga mwana winu munthurumi mu zuŵa lo, ‘Nchifukwa chaku cho Ambuya angundichitiya po ndingutuwa mu Egipiti.’

⁹Ndipo chikaŵanga kwaku imwe nge nchisimikizgu pa janja linu ndipo nge nchikumbusku pakati pa maso ghinu, alinga kuti dangu la Ambuya liŵenge mu mlomo winu; pakuti ndi janja la nthazi Ambuya akutuzgani mu Egipiti.

¹⁰Viyo mukasunganga dangu lenili pa nyengo yake yakutemeka chirimika ndi chirimika.

¹¹“Ndipo penipo Ambuya akutoliyani mu charu cha ŵaKanani uli ndimo angurapiya kwaku imwe ndi ku auskemwe, ndipo akachipaskanga kwaku imwe,

¹²mukapatuliyanga pade ku Ambuya chose cho chijura chibali. Chaumwali chose cha ng'ombe zinu cho nchinthurumi chikaŵanga cha Ambuya.

¹³Chaumwali chose cha mbunda mukawombonga ndi kamberere, pamwenga asani kuti muchiwombonge cha mukafyonga khosi lake. Waumwali yose wa munthu mu ŵana ŵinu ŵanthurumi mukawombonga.

¹⁴Ndipo asani mu nyengo yo yituza mwana winu munthurumi watikufumbani, ‘Ching'anamuwanji ichi?’ Mutinge kwaku iyo, ‘Ndi nthazi ya janja Ambuya angutituzga mu Egipiti, ku nyumba ya uŵanda,

¹⁵Pakuti penipo Farao wangukana ndi unonono kutizomerezga kuruta, Ambuya angubaya ŵaumwali wose mu charu cha Egipiti wose ŵaumwali ŵa munthu ndi ŵaumwali ŵa ng'ombe. Chifukwa cho ndipereka ku Ambuya ŵaumwali wose wo ŵajura chibali; kweni ŵaumwali wose ŵa ŵana ŵanthurumi ndiwombo.’

¹⁶Chikaŵanga nge nchakuteskiyapo pa janja linu pamwenga pa mbonekera pakati pa maso ghinu, pakuti ndi janja la nthazi Ambuya angutituzga mu Egipiti.”

¹⁷Penipo Farao wanguŵazomerezga ŵanthu kuti ŵarutenge, Chiuta kuti wanguŵarongozga mu nthowa ya charu cha ŵaFilisti cha, chingana kuwa kwenga kufupi, pakuti Chiuta wanguti, “Vinu ŵanthu ŵangang'anamuka ŵachiwona nkhondo, ndi ŵangawere ku Egipiti.”

¹⁸Kweni Chiuta wanguŵarongozga ŵanthu ŵa kwakuzunguliya mu nthowa ya ku bozwa kurazga ku Nyanja Yiyera. Ndipo ŵaYisraele ŵangukwera kutuwa mu charu cha Egipiti ŵakuskoma nkhondo.

¹⁹Ndipo Mosese wanguto viwanga vyaku Yosefe pamoza nayo, pakuti Yosefe wangurapiska kwakuneneska ŵaYisraele kuti, “Chiuta wakachezganga namwe, viyo mukapinganga viwanga vyangu pamoza namwe.”

²⁰Ndipo ŵanguruta ku nthazi kutuwa pa Sukoto, ndi ŵangugoŵa pa Etama pa umari wa bozwa.

²¹Ndipo Ambuya anguruta paurongo pawo ndi msana mu mzati wa mtambo kuŵarongozga mu nthowa, ndipo ndi usiku mu mzati wa moto kuwapaska ukweru, mwakuti ŵendenge ndi msana ndi so ndi usiku;

²²mzati wa mtambo ndi msana, ndi mzati wa moto ndi usiku, kuti vingutuwako cha kuurongo kwa ŵanthu.