Read gitonga Chituwa 24 Bible Online

Chituwa 24 - gitonga bible

Chituwa 24

¹Ndipo wanguti kwaku Mosese, “Kwere kuno ku Ambuya, iwe ndi Aroni, Nadaba, ndi Abihu ndi ŵaraŵara ŵa ŵaYisraele machumi ghankhonde ndi ghaŵi (70) ndi musope katatu.

²Mosese pe ndiyo wakazanga pafupi ku Ambuya; kweni ŵanyake kuti ŵakazanga kufupi cha, ndipo ŵanthu kuti ŵakakweriyangako pamoza nayo cha.”

³Mosese wanguza ndi wanguŵakambiya ŵanthu mazu ghose gha Ambuya ndi vyeruzgu vyose; ndipo ŵanthu wose ŵangwamuka ndi mazu ghamoza, ndi ŵanguti, “Mazu ghose gho Ambuya akamba tikachitanga.”

⁴Ndipo Mosese wanguremba mazu ghose gha Ambuya. Ndipo wangusoka ndi mlenjilenji, ndi wanguzenga jochero la sembe pa sina pa phiri ndi mizati chumi ndi yiŵi, kwakulingana ndi mitundu chumi ndi yiŵi ya ŵaYisraele.

⁵Ndipo wangutuma ŵanyamata ŵa ŵaYisraele, wo ŵangupereka mpasku wakocha ndi ŵanguchita visopo vya chimangu vya ng'ombe ku Ambuya.

⁶Ndipo Mosese wanguto chigaŵa chimoza cha ndopa ndi wanguziŵika mu zimbale, ndipo chigaŵa chinyake cha ndopa wanguwazgiya ku jochero la sembe.

⁷Sono wanguto buku la chipanganu, ndi wanguliŵerenga mu makutu gha ŵanthu; ndipo iwo ŵanguti, “Vyose vyo Ambuya akamba tikachitanga, ndipo tikaŵanga ŵakuvwiya.”

⁸Ndipo Mosese wanguto ndopa ndi wanguwazgiya ku ŵanthu ndi wanguti, “Awonani ndopa za chipanganu cho ŵachita ndi Imwe Ambuya kwakulingana ndi mazu yagha ghose.”

⁹Sono Mosese ndi Aroni, Nadaba, ndi Abihu ndi ŵaraŵara ŵa ŵaYisraele machumi ghankhonde ndi ghaŵi (70) ŵangukwera,

¹⁰ndipo ŵanguwona Chiuta wa ŵaYisraele, ndipo pasi pa marwayo ghake penga uli nkhanthowa ka mya yasangarawe, kukozgana ndi kuchanya iko kungweruka.

¹¹Ndipo kuti wanguŵika janja lake pa mikoku ya ŵaYisraele cha; ŵanguwona Chiuta, ndipo ŵangurgha ndi ŵangumwa.

¹²Ambuya anguti kwaku Mosese, “Kwere kuno kwangu pa phiri ndipo ukarindizge penipa, ndipo ndikakupaskanga magome gha mwa ndi dangu ndi langulu vyo ndakurembe kuŵarunguchizga.”

¹³Mosese wangusoka ndi mteŵeti wake Yoswa, ndipo Mosese wangukwere mu phiri laku Chiuta.

¹⁴Ndipo wanguti ku ŵaraŵara, “Mutirinde pano, mpaka penipo tawere so kwaku imwe. Aroni ndi Huru ŵe namwe pamoza; we yose wangaŵa ndi kanthu waye kwaku iwo.”

¹⁵Sono Mosese wangukwere pa phiri ndipo mtambo unguvimba phiri lo.

¹⁶Unkhankhu wa Ambuya unguma pa phiri Sinai, ndipo mtambo ungulivimba mazuŵa ghankhonde ndi limoza; ndipo pa zuŵa la chinkhonde ndi chiŵi wangudanilizga kwaku Mosese kutuliya mu mtambo.

¹⁷Sono kawonekedu ka unkhankhu wa Ambuya kenga uli ndi moto wakocha pachanya pa phiri mu maso gha ŵaYisraele.

¹⁸Ndipo Mosese wangusere mu mtambo ndi wangukwere pa phiri. Ndipo Mosese wenga pa phiri mazuŵa machumi ghanayi (40) ndi mausiku machumi ghanayi (40).