Read gitonga Chituwa 26 Bible Online

Chituwa 26 - gitonga bible

Chituwa 26

¹“Ndipo so mukachitanga chihema chakuwunganamo ndi saru zakuchinga chumi za saru yakuwolofoka, za bulu ndi ziyera, ndi zakufyuŵara; pamoza ndi ŵakerubi ŵakuchitika ndi lusu; ndimo muchitiyenge.

²Utali wa saru yakuchinga ye yose ukaŵanga mikono machumi ghankhonde ndi ghatatu (80) ndipo usani wa saru yose yakuchinga mikono yinayi, saru zose zakuchinga zikaŵanga zakuyana kapindilo kake.

³Saru zakuchinga zinkhonde zikayananga iyi ndi yinyake, ndipo saru zakuchinga zinyake zinkhonde zikayananga iyi ndi yinyake.

⁴Ndipo mukachitanga twakuzganga twa bulu mu mukano wa saru yakuchinga yakubwaro ukongwa yakuziya zakudanga ndipo kwakukozgana so mukachitanga twakuzganga mu mukano wa saru yakuchinga yakubwaro ukongwa yaku zo za chiŵi.

⁵Twakuzganga machumi ghankhonde (50) mukachitanga pa saru yakuchinga yimoza, ndipo twakuzganga machumi ghankhonde (50) mukachitanga mu mukano wa saru yakuchinga yo ye mwaku zo za chiŵi, twakuzganga to tukaŵanga twakulereskana.

⁶Ndipo mukachitanga twakukoloŵeke machumi ghankhonde (50) twa golide, ndipo mumangilizganenge saru zakuchinga yumoza ndi yinyake ndi twakukoloŵeke, alinga kuti chihema chiŵenge chimoza pe.

⁷“Mukachitanga vyakuchinga vya weya wa mbuzi, vya kuvunika pachanya pa chihema chakuwunganamo; mukachitanga vyakuchinga chumi ndi chimoza.

⁸Utali wa chakuchinga chimoza ndi chimoza ukaŵanga mikono machumi ghatatu (30), ndipo usani wa chakuchinga chimoza ndi chimoza mikono yinayi. Vyakuchinga vyo chumi ndi chimoza vikaŵanga ndi chipimu chakuyana.

⁹Ndipo mukalungang'anga pamoza pakuvija vyakuchinga vinkhonde, ndi vyakuchinga vinkhonde ndi chimoza pakuvija, ndipo cha chinkhonde ndi chimoza mukapetanga ku maso kwa hema.

¹⁰Ndipo mukachitanga vyakuzganga machumi ghankhonde (50) mu mukano; chakuchinga chakubwaro ukongwa cha unandi umoza, ndi vyakuzganga machumi ghankhonde mu mukano wachakuchinga chakubwero ukongwa cha mwaku vyo vya chiŵi.

¹¹“Ndipo mukachitanga twakukoloŵeke machumi ghankhonde twa mkuŵa, ndipo muŵikenge twakukoloŵeke to mu twakuzganga, ndipo mulungenge hema lo pamoza alinga kuti liŵe limoza pe.

¹²Ndipo chiŵaru cho chijapo cha vyakuchinga vya hema, chakuchinga cha nusu cho chijako, chikapayikikanga ku msana wa chihema chakuwunganamo.

¹³Ndipo mukono wa kuchiri kumoza, ndi mukono wa kuchiri kunyake, wa chakujapo mu utali wa vyakuchinga vya hema chikapayikikanga pa madera gha chihema chakuwunganamo, kuchiri kuno ndi kuchiri kuwa kuchivunikiriya.

¹⁴Ndipo mukalichitiyanga hema chivwinkhu cha vikopa vyakunyuka vya ŵabira ndi vikopa vya mbuzi.

¹⁵“Ndipo mukachitanga vikhozgero vya wima vya chihema chakuwunganamo vya muti wa mlombwa.

¹⁶Mikono chumi yikaŵanga utali wa chikhozgero, ndipo mukono umoza nusu usani wa chikhozgero chimoza ndi chimoza.

¹⁷Mukaŵanga twakuserezgamo tuŵi mu chikhogero che chose, pakuchimanga pamoza; viyo ndimo mukachitiyanga ndi vikhozgero vyose vya chihema chakuwunganamo.

¹⁸Mukachitanga vikhozgero vya chihema chakuwunganamo vikhozgero machumi ghaŵi kuchiri ku mwera,

¹⁹ndi viboboli vya siliva machumi ghanayi ndivyo mukachitiyanga vikozgero vyo machumi ghaŵi, viboboli viŵi pa chikhozgero chimoza pa twakuserezgamo tuŵi, ndi viboboli viŵi pa chikhozgero chinyake pa twakuserezgamo twake tuŵi;

²⁰ndi kuchiri kunyake kwachiŵi kwa chihema chakuwunganamo, ku nkhonde vikhozgero machumi chaŵi.

²¹Ndipo viboboli vyawo machumi ghanayi vya siliva, viboboli viŵi pa chikhozgero chimoza, ndi viboboli viŵi pa chikhozgero chinyake.

²²Ndipo kuvuli kwa chihema chakuwunganamo kuchiri ku zambwe mukachitiyangako vikhozgero vinkhonde ndi chimoza.

²³Ndipo mukachitanga vikhozgero viŵi vya nyondo za chihema chakuwunganamo kuvuli kwake;

²⁴vikaŵanga payijapayija kusi kweni vikumanenge pachanya, pa mphete yakudanga; viyo ndimo kukaŵiyanga ndi vikumanenge vyose viŵi ndivyo vikaŵanga visongo.

²⁵Ndipo pakaŵanga vinkhozgero vinkhonde ndi vitatu pamoza ndi viboboli vyake vya siliva; pamoza chumi ndi vinkhonde ndi chimoza: viboboli viŵi pa chikhozgero chimoza, ndipo viboboli viŵi pa chikhozgero chinyake.

²⁶“Ndipo mukachitanga mphazimba za muti wa mlombwa zinkhonde za vikhozgero vya kuchiri kumoza kwa chihema chakuwunganamo,

²⁷ndi mphazimba zinkhonde za vikhozgero vya kuchiri kunyake kwa chihema chakuwunganamo, ndi mphazimba zinkhonde za vikhozgero vya kuchiri kuvuli kwa chihema chakuwunganamo ku zambwe.

²⁸Mphazimba ya pakatikati yo nchikhozgero kukwere kuchanya yikaporotanga kutuwa ku umari mpaka ku umari unyake.

²⁹Vikhozgero muvizgangenge ndi golide, ndipo mukachitanga mphete zake za golide zakukhozgiyamo mphazimba, ndipo mukazganganga mphazimba ndi golide.

³⁰Ndipo mukajinthanga chihema chakuwunganamo kwakulingana ndi mululiko wake wo warongoreka kwaku imwe pa phiri lo.

³¹“Ndipo mukachitanga chivwinkhu cha saru ya bulu ndi yakuti fyu yiyera ndi yakuwolofoka yakupika, yakuchitika ndi lusu pamoza ndi ŵakerubi.

³²Ndipo mukayipayikanga pa mizati yinayi ya mlombwa yakuzgangika ndi golide, ndi mbeja za golide pachanya pa mphazimba zinayi za siliva.

³³Mukapayikanga chivwinkhu ku vyakukoloŵeke, ndipo mukatolenga bokosi la phanganu mukati mu chivwinkhu; ndipo chivwinkhu cho chikamupaturiyaninga malo ghakupaturika ku malo ghakupaturika kwakuruska.

³⁴Mukajarikanga chitengo cha lisungu pachanya pa bokosi la changanu, mu malo gho ghakupaturika kwakuruska ukongwa.

³⁵Ndipo mukajarikanga gome kubwalo kwa chivwinkhu, ndipo chakuŵikapo nyali kuchiri ku malaŵi kwa chihema chakuwunganamo kuthyana ndi gome ndipo mukajarikanga gome kuchiri ku nkhonde.

³⁶“Ndipo mukachitanga chakuchinga cha khomo la hema, cha bulu, chakufyuŵara, ndi chiyera, ndi saru yakuwolofoka yakupika, yakuzgangika ndi kusona kwa zingani.

³⁷Ndipo chakuchinga cho mukachichitiyanga mizati yinkhonde ya mlombwa, ndi muyizgangenge ndi golide; mbeja zake zikaŵanga za golide, ndipo mukazisuliyanga mphazimba zinkhonde za mkuŵa.