Read gitonga Chituwa 33 Bible Online

Chituwa 33 - gitonga bible

Chituwa 33

¹Ambuya anguti kwaku Mosese, “Tuwanipo, kwerani kutuwapo pano iwe ndi ŵanthu wo watole kuno kutuwa mu charu cha Egipiti, kuya ku charu cho ndingupangana kwaku Abrahamu, Yisaki, ndi Yakobe kuti, ‘Ndikachipaskanga ku mphapu zinu.’

²Ndipo ndikatumanga muthenga paurongo pinu, ndipo ndikadikiskangamo ŵaKanani, ŵaAmori, ŵaHiti, ŵaPerizi, ŵaHivi, ndi ŵaYebusi.

³Kweriyani ku charu chakutawala mukaka ndi uchi; kweni kuti ndikarutanga namwe cha mukati mwinu, vinu ndingakumalani mu nthowa, pakuti mwe ŵanthu ŵanonono mtima.”

⁴Penipo ŵanthu ŵanguvwa uthenga uwu uheni, ŵangutenje; ndipo pengavi munthu wanguvwara vyakujinozeska navyo.

⁵Pakuti Ambuya anguti kwaku Mosese, “Kamba ku ŵaYisraele, ‘Mwe ŵanthu ŵanonono mtima; asani pa nyengo yimoza ndingaruta kwenda mukati mwinu mphanyi ndingamumalani. Iku sono zuwani vyakujitozga navyo, alinga ndiziŵe nchine ndingachita namwe.’ ”

⁶Viyo ŵaYisraele ŵanguzuwa vyakujinozgeska vyawo, kwamba pa phiri Horebe kuya kuurongo.

⁷Sono Mosese wanguziŵiriya kuto hema ndi kulikhoma kubwalo kwa ugoŵi, kutali ndi ugoŵi. Wangulidana hema lakuwunganamo, lenilo lenga kubwalo kwa ugoŵi.

⁸Penipo pose Mosese wanguruta ku hema lo, ŵanthu wose ŵangusoka, ndipo muthu yose wanguma pa khomo lo lake, wangulereska pavuli paku Mosese, mpaka penipo wangusere mu hema.

⁹Mosese wati wasere mu hema mzati wa mtambo ungusika ndikuma pa khomo la hema, ndi Ambuya angukamba nayo Mosese.

¹⁰Ndipo penipo ŵanthu wose ŵanguwona mzati wa mtambo kuma pa khomo la hema, ŵanthu wose ŵasokanga ndi kulambiya, munthu we yose pa khomo la hema lake.

¹¹Viyo ndimo Ambuya arongoroliyanga ndi Mosese chisku ndi chisku, uli ndimo munthu warongorore ndi bwezi lake. Penipo Mosese wangusere so mu ugoŵi, muteŵeti wake Yoswa mwana munthurumi waku Nuni ndiyo munyamata, kuti wangutuwapo cha pa hema.

¹²Mosese wanguti ku Ambuya, “Awonani, mutiti kwaku ine, ‘Kwezga ŵanthu yaŵa’; kweni mulivi kundiziŵiska njani mweniyo mukanditumiyanga nane pamoza. Kweni mwakamba kuti, ‘Nditukuziŵa ndi zina, ndipo iwe so wasaniya wezi mu maso ghangu.’

¹³Sono chifukwa chenichi, nditukupemphani, asani ndasaniya wezi mu maso ghinu, ndilongoni nthowa zinu, alinga ndikuziŵeninge ndi kusaniya wezi mu maso ghinu. Ghanaghananipo so kuti khamu ili mbanthu ŵinu.”

¹⁴Ndipo iwo anguti, “Ndikarutanga nawe ndipo ndikakupumuzganga.”

¹⁵Ndipo wanguti kwaku iwo, “Asani kuti mukarutanga nane cha, mungatikwezganga kutuwapo pano cha.

¹⁶Pakuti kukaziŵikanga uli kuti ine ndasaniya wezi mu maso ghinu, ine ndi ŵanthu ŵinu? Si nchifukwa chakuruta nafwe pamoza imwe, kuti tiziŵikadi, ine ndi ŵanthu ŵinu, kuti tipambana nawo ŵanthu wose ŵanyake wo ŵe pa charu chapasi?”

¹⁷Ndipo Ambuya anguti kwaku Mosese. “Chinthu ichi warongoro, nditukuziŵa zina lako.”

¹⁸Mosese wanguti, “Nditukupemphani ndirongoni unkhankhu winu.”

¹⁹Ndipo iwo anguti, “Ndikachitanga kuti umampha wangu wose ukadumuwanga paurongo pako, ndipo ndikaziŵiskanga zina langu paurongo pako lakuti, ‘Ambuya,’ ndipo ndikaŵanga wawezi kwaku mweniyo ndikhumba kuŵa wa wezi ndipo ndikarongonga lisungu paku yo ndirongonge lisungu.

²⁰Kweni,” kuti, “ungawona chisku changu cha; pakuti munthu kuti wangawona ine cha ndi kuja wamoyo.”

²¹Ndipo so Ambuya anguti, “Awona pe malo pafupi nane penipo ukamanga pachanya pa jarawe;

²²ndipo penipo unkhankhu wangu udumuwapo ndikakuŵikanga mu lumwa la jarawe, ndipo ndikakuvunikiliyanga ndi janja langu mpaka penipo ndadumuwapo;

²³pavuli ndikatuzgangako janja langu, ndipo ukawonanga musana wangu; kweni chisku changu kuti chikawonekanga cha.”