Read gitonga Chituwa 35 Bible Online

Chituwa 35 - gitonga bible

Chituwa 35

¹Mosese wanguwungang'a mpingu wose wa ŵaYisraele, ndi wanguti kwaku wo, “Ivi ndivyo vinthu vyo Ambuya alanguliya imwe kuchita.

²Milimu yikachitikanga mazuŵa ghankhonde ndi limoza, kweni pa zuŵa la chinkhonde ndi chiŵi mukaŵanga ndi sabata lakupaturika lakupumuwa, ku Ambuya; we yose wakuchita mlimu mwaku lo wakabayikanga;

³kuti mukakozganga moto cha mu malo ghinu ghose pa zuŵa la sabata.”

⁴Mosese wanguti ku mpingu wose wa ŵaYisraele, “Ichi ndicho chinthu cho alangula Ambuya.

⁵Tonimo mukati mwinu mpasku ku Ambuya; we yose wakuŵa ndi mtima wakupaska, wazi ndi chaulera cha Ambuya, golide, siliva, ndi mkuŵa;

⁶saru za bulu, zakufyuŵara, ziyera, ndi saru zakuwolofoka zakupika, weya wa mbuzi;

⁷vikopa vyakunyuka vya mberere, ndi vikopa vya mbuzi, mathabwa gha mlombwa,

⁸mafuta gha nyali, vyakununkhira vya mafuta ghakupakiya, ndi vya chema vya fungu lamampha;

⁹mya yakuzirwa ndi mya yakumikiya efodo ndi chapachifuwa.

¹⁰“Ndipo munthurumi yose wanthazi mukati mwinu wazi kuzachizenga vyose vyenivyo Ambuya alangula: hema lakuwunganamo,

¹¹hema lake ndi vyakuvungiya vyake, mbeja zake ndi vikhozgero vyake, migoro yake, mizati yake, ndi viŵanja vyake;

¹²bokosi ndi vyakupingiya vyake, chitengu cha lisungu, ndi chivwinkhu cha chakuchinga;

¹³gome ndi vyakupingiya vyake ndi viyaŵi vyake vyose, ndi chiŵandi cha kuŵapo;

¹⁴chakumikapo nyali nacho chifukwa cha ukweru, ndi viyaŵi vyake ndi nyali zake, ndi mafuta ghakuchitiya ukweru;

¹⁵ndi chiguŵa cha vya chema, ndi miti yake, ndi mafuta ghakupakiya ndi vya chema vyakununkhira, ndi chakuchinga chakujara pa khomo la chihema chakuwunganamo.

¹⁶Jochero la sembe yakocha, ndi malo ghake gha moto gha mkuŵa, vyakupingiya vyake, ndi viyaŵi vyake vyose, chakusambiyamo ndi chiŵanja chake;

¹⁷vyakuchinga vya bwalo, mizati yake ndi viŵanja vyake, ndi chakuchinga chapa likomo la bwalo;

¹⁸mphanda za chihema chakuwunganamo ndi mphanda za bwalo ndi vingwe vyake;

¹⁹vivwalo vyakusoneka umampha vyakuteŵete mu malo ghakupaturika, vivwalo vyakupaturika vyaku Aroni mzukuru yo ndi vivwalo vya ŵana ŵake ŵanthurumi, vya uteŵeti wawo ŵazukuru.”

²⁰Sono mpingu wose wa ŵaYisraele ungutuwapo po wenga Mosese.

²¹Ndipo ŵanguza, yose yo mtima wake ungumutuntha ndi yose yo mzimu wake ungumusongono, ndipo ŵanguza ndi mpasku ya Ambuya yakuchitiya hema lakuwunganamo, ndi milimu yake yose, ndi ya vivwalo vyakupaturika.

²²Viyo ŵanguza, ŵanthurumi ndi ŵanthukazi so: wose ŵeniwo ŵenga ŵa mtima wakukhumba, ŵanguza ndi ŵaphini, ndi ndeŵereŵi, ndi mphete zakudikizgiya, ndi makoza, vinthu vyose vyakusiyanasiyana vya golide, munthu we yose wangupaturiya mpasku wa golide ku Ambuya.

²³Ndipo munthu yose yo wangusanirika ndi saru ya bulu, pamwenga yakufyuŵara, pamwenga yiyera, pamwenga saru yakuwolofoka pamwenga weya wa mbuzi pamwenga chikopa chakunyuka cha bira pamwenga chikopa cha mbuzi, wanguza navyo.

²⁴We yose yo wanguziŵa kuchita mpasku wa siliva pamwenga wa mkuŵa wanguza nawo kuŵa mpasku wa Ambuya: ndipo munthurumi we yose mweniyo wenga ndi mathabwa gha mlombwa ghakwenere mu nchitu wanguza nagho.

²⁵Ndipo ŵanthukazi wose wo ŵenga ŵakuziŵa, ŵanguwomba ndi manja ghawo, ndi ŵanguza ndi vyo ŵanguwomba vya bulu ndi vyakufyuŵara, ndi viyera, ndi saru yakuwolofoka yakutowa;

²⁶ŵanthukazi wose ŵazeru ŵanguwomba weya wa mbuzi.

²⁷Ndipo ŵarongozgi ŵanguza ndi mya ya kuzirwa ya efodo ndi ya chapachifuŵa,

²⁸ndi vyakununkhira vya mafuta gha nyali ndi vya mafuta ghakupakiya, ndi vya kocha.

²⁹Ŵanthurumi wose ndi ŵanthukazi, ŵaYisraele, wo ŵangukhumba kuza ndi kanthu ke kose ku mlimu wo Ambuya angulanguliya mwaku Mosese kuchitika ŵanguza nako kuŵa mpasku wa khumbu lawo ku Ambuya.

³⁰Ndipo Mosese wanguti ku ŵaYisraele, “Vwani, Ambuya adana zina laku Bezalele mwana munthurumi waku Uru mwana munthurumi waku Huru, wa mtundu waku Yuda;

³¹ndipo wamuzaza ndi Mzimu waku Chiuta, ndi kuziŵa, ndi kuwamo ndi chinjeru, ndi umisiri wose,

³²kwachirongo machitidu, kuchita mu golide ndi siliva ndi mkuŵa,

³³mukadumulidu ka mya yakuzirwa, ndi kusema kwa miti, kwachichita nchitu za umisiri.

³⁴Ndipo wamuziŵiska iyo kurunguchizga iyo pamoza ndi Oholiaba mwana munthurumi waku Ahisamaka wa mtundu waku Dani.

³⁵Waŵazaza ndi chinjeru kwachichita nchitu ya umisiri wose ya wakwata vyakupanga pamwenga ya wakusona saru za bulu, ndi zakufyuŵara, ndi ziyera ndi saru yakuwolofoka, pamwenga yakuwombaya wanchitu wa mtundu we wose pamwenga misiri wa vyakwata.