Read gitonga Chituwa 4 Bible Online

Chituwa 4 - gitonga bible

Chituwa 4

¹Sono Mosese wangwamuka, “Kweni ehe, kuti ŵamuvwana nane cha chingana nkhunditegherezga, pakuti ŵamunena kuti, ‘Ambuya kuti angukuwoneke cha.’ ”

²Ambuya anguti kwaku iyo, “Nchine cho che mu janja lako?” Iyo wanguti, “Ndodo.”

³Ndipo anguti, “Uyipong'e pasi.” Viyo wanguyipong'a pasi, ndipo yingusanduka njoka; ndipo Mosese wanguyithaŵa.

⁴Kweni Ambuya anguti kwaku Mosese, “Tambaruwa janja lako uyiko ku muchiya,” viyo wangutambaruwa janja lake ndi wanguyiko, ndipo yingusanduka ndodo mu janja lake.

⁵“Kuti ŵavwane kuti ndine Ambuya, Chiuta wa auskeu, Chiuta waku Abrahamu, Chiuta waku Yisaki, ndi Chiuta waku Yakobe, wakuwoneke iwe.”

⁶Ndipo so, Ambuya anguti kwaku iyo, “Ŵika janja lako mu chifuŵa chako.” Ndipo wanguŵika janja lake mu chifuŵa; ndipo penipo wangurituzgamo, awonani janja lake lenga ndi makhate, lingutuŵa nge ndi nyankhuŵinda.

⁷Sono Chiuta wanguti, “Werezge janja lako mu chifuŵa chako.” Viyo wanguliwezge mu chifuŵa janja lake; ndipo wanguti walituzga, awonani, linguweremo kuyana ndi liŵavu lake lose.

⁸“Asani kuti ŵamuvwana nawe cha,” wanguti Chiuta, “pamwenga kureka kutegherezga ku chisimikizgu chakudanga, akhumba ŵamuvwana ndi chisimikizgu cha pavuli.

⁹Asani ŵamuvwana cha chingana ndi mu visimikizgu ivi viŵi, nanga nkhuphwere mazu ghako, ukato maji gha mu msinji Nile ukaghadire pasi pa yumu; ndipo maji gho wangunegha mu Nile ghangusanduka ndopa pasi pa yumu.”

¹⁰Kweni Mosese wanguti ku Ambuya, “Owe Ambuya, ine kuti nde salala cha pakukamba kwamba kale; pamwenga po mwambiya kukamba kwaku ine, muŵanda winu; kweni kukamba chizitu-zitu ndi lilime nalo ndizitu.”

¹¹Sono Ambuya anguti kwaku iyo, “Njani yo wakuchita mlomo wa munthu? Njani watumuchita kuŵa wambuwu pamwenga mgota, pamwenga kulereska, pamwenga uchiburumutiya? Kuti ndine Ambuya cha?

¹²Viyo sono rutanga, ndipo ine ndikaŵanga ndi mlomo wako, ndi kukusambizga vyenivyo wamukamba.”

¹³Kweni iyo wanguti, “Owe Ambuya, ndipempha, tumani munthu munyake.”

¹⁴Sono Ambuya angumukalipiya Mosese ndi anguti, “Kumbi waliko cha Aroni mwana munyako, muLevi? Ndiziŵa kuti wangakamba umampha; ndipo awona watuza kuzachikumana nawe, ndipo wachikuwona wakakondwanga mu mtima.

¹⁵Iwe ukambenge nayo ndipo ukaŵikanga mazu gho mu mlomo wake; ndipo ine ndikaŵanga ndi mlomo wako ndi mlomo wake, ndipo ndikakusambizganinga chenicho mwamuchita.

¹⁶Iyo wamukukukambiya ku ŵanthu, ndipo wakaŵanga mlomo wako, ndipo iwe ukaŵanga nge ndi Chiuta kwaku iyo.

¹⁷Ndipo ukatolenga ndodo iyi mu janja lako, yeniyo wamuchitiya visimikazgu.”

¹⁸Mosese wanguwere kwaku Yetero musibweni wake, ndi wanguti kwaku iyo, “Ndipempha undizomerezge kuwere ku ŵabali ŵangu mu Egipiti kwachiwona vinu ŵachalipo ŵamoyo.” Ndipo Yetero wanguti kwaku Mosese, “Ruta mu chimangu.”

¹⁹Ndipo Ambuya anguti kwaku Mosese mu Midiani, “Were ku Egipiti; pakuti ŵa ŵanthu wose ŵakhumbanga kukubaya ŵakufwa.”

²⁰Viyo Mosese wanguto muwoli wake ndi ŵana ŵanthurumi ndi wanguŵajarika pa mbunda, ndi wanguwere ku charu cha Egipiti. Ndipo Mosese wangupinga nthonga yaku Chiuta mu janja lake.

²¹Ndipo Ambuya anguti kwaku Mosese, “Utakuti wawere ku Egipiti ukawone kuti wachita vya minthondwi vyose paurongo paku Farao vyenivyo ndaŵeka mu nthazi yako; kweni ndamunonopeska mtima wake, viyo wamuzomerezga cha kuti ŵaYisraele ŵakarutenge.

²²Ndipo iwe wamukamba kwaku Farao, ‘Viyo ndimo anene Ambuya, Yisraele ndi mwana wangu waumwali,

²³ndipo ndititi kwaku iwe, “Umuzomerezge mwana wangu warutenge alinga wakanditataliyenge.” Asani ukakananga kuti warutenge, ehe, ndikabayanga mwana wako munthurumi waumwali.’ ”

²⁴Pa malo ghakugonapo mu nthowa Ambuya angukumana nayo ndipo apenjanga kumubaya.

²⁵Sono Zipora wanguto mwa ndi wanguchinja khungu lakusongo la mwana wake munthurumi ndipo wanguko marundi ghaku Mosese ndi khungu lo, ndi wanguti, “Kwakuneneska we wanthengwa wa ndopa kwaku ine!”

²⁶Viyo Ambuya angumureka. Viyo iyo wanguti, “Iwe we wanthengwa wa ndopa,” chifukwa cha muchinju.

²⁷Ambuya anguti kwaku Aroni, “Ruta ku bozwa kwachikumana ndi Mosese.” Viyo wanguruta, ndipo ŵangukumana pa phiri laku Chiuta ndi wangumufyofyontha.

²⁸Ndipo Mosese wangumunene mazu ghose gha Ambuya ghenigho angumutuma ndi visimikizgu vyo angumulanguliya kwachichita.

²⁹Sono Mosese ndi Aroni wanguruta ndi ŵanguungang'a pamoza ŵaraŵara wose ŵa ŵaYisraele.

³⁰Ndipo Aroni wangukamba mazu ghose Ambuya angukambiya Mosese, ndi wanguchita visimikizgu pa maso pa ŵanthu.

³¹Ndipo ŵanthu ŵanguvwana, ndipo penipo ŵanguvwa kuti Ambuya anguchezga ndi ŵaYisraele ndi kuti wawona suzgu yawo, ŵangukotama mitu yawo ndi ŵangusopa.