Read gitonga Chituwa 7 Bible Online

Chituwa 7 - gitonga bible

Chituwa 7

¹Ndipo Ambuya anguti kwaku Mosese, “Wona, nditukuchita kuŵa nge ndi Chiuta kwaku Farao ndipo Aroni mwana munyako wamukuŵa mchimi wako.

²Wamukamba vyose vyenivyo ndakulanguliya ndipo Aroni mwana munyako wamunene Farao kuti wakazomerezge ŵaYisraele kutuwa mu charu chake.

³Kweni ndamunonopeska mtima waku Farao ndipo chingana ndamukwandaniska visimikizgu vyangu ndi vyakuziziswa mu charu cha Egipiti,

⁴Farao kuti wakumutegherezgani cha; pavuli ndikaŵikanga janja langu pa ŵaEgipiti ndi kutuzgamo maŵanja ghangu, ŵanthu ŵangu, ŵana ŵaku Yisraele mu charu cha Egipiti ndi nchitu zikuru za cheruzgu.

⁵Ndipo ŵaEgipiti ŵakaziŵanga kuti ndine Ambuya, ndichirongo nthazi zangu pa Egipiti ndi kutuzga ŵanthu ŵangu ŵaYisraele mukati mwawo.”

⁶Ndipo Mosese ndi Aroni ŵanguchitadi viyo; ŵanguchita uli ndimo Ambuya anguŵalanguliya.

⁷Mosese wenga wa virimika machumi ghankhonde ndi ghatatu (80) mu ura wake, ndipo Aroni wenga wa virimika machumi ghankhonde ndi ghatatu pachanya vitatu (83) mu ura wake pa nyengo yeniyo wakambanga ndi Farao.

⁸Ndipo Ambuya anguti kwaku Mosese ndi Aroni,

⁹“Farao wachamkamba namwe kuti, ‘Rongoni minthondwi mwakuti ndimugomezgeni sono,’ wangukuti kwaku Aroni. ‘To ndodo yako ndi uyipong'e pasi paurongo paku Farao, kuti yisanduke njoka.’ ”

¹⁰Viyo Mosese ndi Aroni wanguruta kwaku Farao ndi ŵanguchita uli ndimo Ambuya angulanguliya; Aroni wangupong'a pasi ndodo paurongo paku Farao ndi ŵaŵanda ŵake, ndipo yingusanduka njoka.

¹¹Sono Farao wangudana ŵazeru ndi ŵavyanusi, ndipo so, ŵakuwukwa ŵaEgipiti ŵanguchita kwakukozgana ndi mayera ghawo.

¹²Pakuti we yose wangupong'a pasi ndodo yake, ndipo yingusanduka njoka. Kwena ndodo yaku Aroni yingumeza ndodo zawo.

¹³Ungunonopa mbwenu mtima waku Farao; ndipo kuti wangukhumba kuvwiya cha, uli ndimo Ambuya angukambiya.

¹⁴Sono Ambuya anguti kwaku Mosese, “Mtima waku Farao wanonopeskeka, wakana kuŵazomerezga ŵanthu kuruta.

¹⁵Ruta kwaku Farao ndi mlenji, wachiruta ku maji; kamulindizge pa chimbumira cha msinji, ndipo pinga mu janja lako ndodo yeniyo yingusanduka njoka.

¹⁶Ndipo ukanene kwaku iyo, ‘Ambuya, Chiuta wa ŵaHebere, wandituma kwako, watiti, “Ŵareke ŵarutenge ŵanthu ŵangu, alinga, ŵakanditaliyenge mu bozwa, ndipo ehe, iwe ulivi kuŵavwiya.”

¹⁷Viyo atiti Ambuya, “Paku ichi ukaziŵanga kuti Ndine Ambuya, ehe, ndikakosonga maji gho ghemu Nile ndi ndodo yo yemu janja langu, ndipo ghakasandukanga ndopa,

¹⁸ndi somba zamu Nile zikafwanga, ndipo Nile wakaŵanga wakuvunda, ndipo ŵaEgipiti kuti ŵakaghakhumbanga cha maji ghamu Nile.” ’ ”

¹⁹Ndipo Ambuya anguti kwaku Mosese, “Kamba kwaku Aroni, ‘Uto ndodo yako ndipo utambaluriye janja lako ku maji gha Egipiti ku misinji yawo, ku ngalandi zawo, ku vipholi vyawo, ndi visima vyawo vya maji kuti viŵe ndopa, ndipo mukaŵanga ndopa mu charu chose cha Egipiti, mu viyaŵi vya miti ndi viyaŵi vya mya.’ ”

²⁰Mosese ndi Aroni ŵanguchita uli ndimo Ambuya anguŵalanguliya pa maso ghaku Farao ndi pa maso gha ŵaŵanda ŵake, wangusoska ndodo yo ndi wangupuma maji gho ghenga mu Nile ndi maji ghose gho ghenga mu Nile ghangusanduka ndopa.

²¹Ndipo somba za mu Nile zingufwa; ndipo Nile wanguvunda, viyo kuti ŵaEgipiti ŵanguziŵa kumwa mu Nile cha; ndipo mwenga ndopa mu charu chose cha Egipiti.

²²Kweni ŵavyanusi ŵaEgipiti ŵanguchita vyakukozgana navyo ndi mayera ghawo; viyo mtima waku Farao ungujaririya wakunonopa, ndipo kuti wangukhumba kuŵategherezga cha uli ndimo Ambuya angukambiya.

²³Farao wanguweko ndi wangusere mu nyumba yake, ndipo wanguphwere ichi cha.

²⁴Ndipo ŵaEgipiti ŵangukumba kwakuzunguliya Nile kupenja maji ghakumwa, pakuti ŵanguziŵa kumwa maji gha mu Nile cha.

²⁵Ghangukapo mazuŵa ghankhonde ndi ghaŵi Ambuya ati apuma maji gha Nile.