Read gitonga Jobu 10 Bible Online

Jobu 10 - gitonga bible

Jobu 10

¹“Ndavuka ndi umoyo wangu, ndikambenge pakwero zadinginyiko langu; nkhakambanga mu kuŵaŵa kwa mzimu wangu.

²Nkhatinge kwaku Chiuta, Rekani kundisuska; ndiziŵiskeni chifukwa cho murimbirana nane,

³kumbi chiwoneka kuŵa chamampha kwaku imwe kukandirizga, ndi kuyeya nchitu ya manja ghangu ndi kurumba fundu za ŵaheni?

⁴Kumbi mwe ndi maso gha liŵavu, kumbi muwona nge ndimo munthu wawone?

⁵Kumbi mazuŵa ghinu ghayana ndimazuŵa gha munthu, pamwenga virimika vinu vyenge ndi virimika vya munthu;

⁶po mupenja mamphuru ghangu ndi mphurupuru zangu.

⁷Chingana muziŵa kuti nde wakwananga cha ndipo palivi yumoza wangutaska ku janja linu?

⁸Manja ghinu ghangundichita ndi kundilunga, ndipo sono mung'anamuka ndi mukhumba kundiparghang'a.

⁹Kumbukani kuti mukundilenga ku dongo; kumbi mukandiwezgiyanga so ku fuvu?

¹⁰Kumbi kuti mungundidira nge ndi mkaka cha ndi kundilimbiska nge ndi masa?

¹¹Mungundivwalika ndi khungu ndi munofo ndi kundisona pamoza ndi viwanga ndi mikoli.

¹²Mungundipaska umoyo ndi chanju chikuru ndipo kuphwere kwinu kwasungirizga mzimu wangu.

¹³Kweni vinthu yivi mungubisa mu mtima winu, ndiziŵa kuti ili ndilo lenga khumbo linu.

¹⁴Asani ndilakwa mundiwona, ndipo kuti mundifwatuwa cha ku ulakwi wangu.

¹⁵Asani nde mulakwi, owe ine! Asani ndi murunji, ndingayunuska mutu wangu cha pakuti ndazazika ndi soni, ndipo ndilereska visuzgu vyangu.

¹⁶Ndipo asani nditijikwezge pachanya, imwe mutindiŵinga nge ndi nkharamu ndi kuchita vyakuziziswa kumikana nani;

¹⁷munozga so ŵakaboni ŵinu kundisuska, ndi kukuzga ukari winu paku ine, mutuza ndi maliŵanja gha nkhondo kumikana nani.

¹⁸“Chifukwa nchine mungundituzga mu nthumbo? Asani ndingufwa ndenga ndindabalike mphanyi panguŵavi jiso lingundiwona;

¹⁹ndi mphanyi ndinguŵa nge ndengave kupingikiya ku muunda kutuwa mu nthumbo.

²⁰Kumbi mazuŵa gha umoyo wangu ngamanavi gha? Mundireke kuti ndisaniye likondwa limanavi;

²¹ndenga ndindaruti ko kuti ndamuweko so cha, charu cha munkharwe ndi mdima ukuru,

²²charu cha munkhorwe ndi chautimbanizi kweniko ukweru we nge ndi mdima.”