Read gitonga Jobu 12 Bible Online

Jobu 12 - gitonga bible

Jobu 12

¹Viyo Jobu wangwamuka:

²“Kwambura kukangang'a mwe ŵanthu ŵeneko, ndipo mukafwanga ndi vinjeru vinu pamoza.

³Kweni nane nde nazo zeru nge ndimwe; kuti nde pasi kwaku imwe cha. Kumbi njani wareka kuziŵa vinthu nge ndi ivi?

⁴Nde wakusekeka ndi mabwezi ghangu; ine, ndamwenine ndinguromba kwaku Chiuta ndipo wangundamuka, munthu murunji ndi wakunyoroka, kweni nde wakusekeka.

⁵Maghanoghano ghaku yo we pakufwasa ngakuti, soka, nkhanthu cha, kweni le muchanya kuyuuwa wo marundi ghawo ghatelemuka:

⁶Mahema gha ŵapoki ghepa chimangu, ndi wo ŵasosomo Chiuta ŵaja umampha, wo ŵatuza ndi chiuta wawo mu manja ghawo.

⁷“Kweni fumba vinyama vikakusambizganga, viyuni vya mude vikakuneniyanga.

⁸Pamwenga mbeu zamu charu chapasi zikusambizgenge, pamwenga somba zamu nyanja zikakukonkhoskiyanga.

⁹Ndiyani mukati mwaku vyose ivi wareka kuziŵa kuti janja la Ambuya lachita ichi?

¹⁰Mu janja lake mwe umoyo wa chinthu chose cha moyo, ndi mvuchi wa ŵanthu wose.

¹¹Kumbi gutu kuti litesa mazu cha nge ndimo mlomo utese vyakurgha?

¹²Vinjeru vye ku ŵara ndi mu unandi wa mazuŵa mwe vinjeru.

¹³“Kwaku Chiuta kwe vinjeru ndinthazi, we ndi fundu ndi vinjeru.

¹⁴Asani wabwanganduliya pasi paulavi yumoza yo wangazenga so; asani watimujaliya munthu palivi yo wangamujuliyako.

¹⁵Asani wajaliya maji, ghatuphwa, asani watighajura ghagumuwa charu.

¹⁶Kwaku iyo kwe nthazi ndi zeru, ŵakupusika ndi ŵakupusikika wose mbake.

¹⁷Warongozge ŵazifundu kukuskoŵeka, ndi ŵeruzgi ŵatuŵapusika.

¹⁸Wafwatuwa magori gha ŵakaronga ndi watuŵamanga ndi nkhwambamu viwunu vyawo.

¹⁹Warongozge ŵazukuru kukuskoŵeka, ndi kuwiska pasi ŵamazaza.

²⁰Watuzgapo kakambidu ka ŵamagomekezgeka ndi watuzgapo vinjeru vya ŵara.

²¹Wapunguliya kuyeyeka pa ŵakaronga, ndi wafwatuwa lamba wa ŵanthazi.

²²Wavumbuwa vya pa ndimba mu mdima ndi wangweruska mdima wamunkhorwe.

²³Wakuzga mitundu ndi watiyibwanganduwa, watandaniska mitundu ndi watiyiparghang'a.

²⁴Watuzgako vinjeru ku mafumu gha ŵanthu ŵamu charu chapasi ndi kuŵayingiska mu mapopa mwambura nthowa.

²⁵Wapapaska mu mdima kwambura ukweru, watuŵazendeska zendeska nge ndi munthu wakauloŵe.