Read gitonga Jobu 15 Bible Online

Jobu 15 - gitonga bible

Jobu 15

¹Penipo Elifazi muTemani wangwamuka, wanguti,

²“Kumbi munthu wavinjeru wangamuka kwakuwayawaya nge ndi mphepu, ndi kuzaza nthumbu yake ndi mphepu yaku vuma?

³Kumbi nkhwakwenere kuti wasuskani ndi munyake mu makani gho kuti nga chanduwu cha? Pamwenga mu kakambidu keniko kuti watanduwa nako kanthu cha?

⁴Chofyo chaku Chiuta uchisanduska chawaka, ndi uja rizga maghanoghano ghako gha paku Chiuta.

⁵Chifukwa uheni wako usambizga mlomo wako ndipo usankha lilime la ŵarghargha.

⁶Mlomo waku wamweni utikususka, kuti ndine cha, mlomo wakuwamweni utikusimikizga.

⁷“Kumbi ndi we munthu wakudangakupapika? Pamwenga ungupapika mapiri ghenga ghandaŵeko?

⁸Kumbi ukuvwa vya muchindindi vyaku Chiuta?

⁹Kumbi vine vyo uziŵa, vyo ifwe kutitiziŵa cha? Nchine cho uwamo cho kuti nchakuziŵikwa cha kwaku ifwe?

¹⁰Ghose makhongwe gho ghe ndi nyivu ndi madoda ŵe mukati mwidu, ŵara ukongwa kuruska ausu.

¹¹Kumbi kusangaruska kwaku Chiuta nkhumana kwaku iwe, pamwenga mazu ghaniwo wakamba nawe wenguwengu?

¹²Kumbi mtima wako ukotoliyanji kutali, kumbi chifukwa nchine maso ghako ghaphaniriya,

¹³kuti mzimu wako ugarukiye Chiuta, ndi kuzomerezga mazu ghako kutuwa mu mlomo wako?

¹⁴Kumbi munthu nchine, kuti waŵe wakuphotoka, ndi yo wapapika ndi munthukazi kuti waŵe murunji?

¹⁵Ambuya kuti ŵagomekezga ŵanthu ŵawo ŵarunji cha, nanga ndi machanya kuti ngakuphotoka cha, mu maso ghawo;

¹⁶kwe uli ku munthu wakuchita vyaukazuzi ndi vyawaka, munthu yo watumwa kwananga nge ndi maji!

¹⁷“Nkhakurongonga, undivwe, ndipo cho ndawona nkhachikonkhoskanga

¹⁸(cho ŵazeru ŵakamba, ndi auskeu nawo kuti ŵabisa cha,

¹⁹kwaku ŵeniwo ŵija charu chingupaskika, ndipo kwengavi mlendo yo wangwenda mukati mwaku wo).

²⁰Mulakwi wakweŵeka ndi urwirwi mu mazuŵa ghake ghose, muvirimika vyose vyo vikumikikiya ŵankhaza.

²¹Kayowozi kakofya kavwika mu makutu ghake, mu usakati wakuparghang'a kakamufikiyanga,

²²kuti wagomezga cha kuti wakatuwangamo mu mdima, ndi kuti lipanga litumurindizga.

²³Wayingayinga kupenja chiŵande, watiti, ‘Chepani?’ Waziŵa kuti zuŵa la mdima laŵandika pa janja lake;

²⁴suzgu ndi chitima vitimofya, vitumuthereska nge ndi karonga yo wanozgeke nkhondo.

²⁵Chifukwa watambaruliya janja lake kumikana ndi Chiuta. Ndipo wajikhozga kumikana ndi Wanthazizose.

²⁶Wachimbiya kwakukhwima kumikana nayo ndi nguru yikhome,

²⁷chifukwa wabenekere chisku chake ndi mafuta ghake, ndi wamatika mafuta mu chiunu chake;

²⁸ndipo waja mu misumba yakupasuka mu nyumba zo munthu kuti wangajamu cha zenizo ze pafupi kuŵa viza;

²⁹kuti wakaŵanga msambasi cha, ndipo usambasi wake kuti ukajaliriyanga cha, pamwenga kuwufiska mu charu chapasi,

³⁰kuti wakathaŵanga mdima cha, mlipu wa moto ukamaliskanga mphanda zake, ndi maluŵa ghake ghakaputiskikanga kutali ndi mphepu.

³¹Wareke kugomezga mu vyawaka, wajipusika mweneko, chifukwa vyawaka ndivyo vikaŵanga mphoto yake.

³²Yiripikiyenge nkhani yose nyengo yake yindafike, ndipo mphanda yake kuti yiŵenge yiŵisi cha.

³³Wakayoyoskanga vipasi vyake vyambura kufya, nge ndi mphereska, ndi kuyoyoska maluŵa nge ndi muti wa maolive.

³⁴Mpingu wa ŵanthu ŵambura kuziŵa Chiuta ngwawaka, ndipo moto ukawochanga mahema gha ŵavumbwa;

³⁵ŵazuwuka masoka ndi ŵapapa uheni, ndi mitima yawo yinozge nkhani upusikizgi.”