Read gitonga Jobu 20 Bible Online

Jobu 20 - gitonga bible

Jobu 20

¹Ndipo Zophara muNamati wangwamuka:

²“Chifukwa ichi maghanoghano ghangu ghandamuka, chifukwa cha kuthaŵiriya ko kwe mwangu.

³Ndituvwa kususka ko kundipaska soni, ndipo mzimu wa vinjeru vyangu utindamuka.

⁴Kumbi ulivi kuziŵa ichi kale, kutuwa po munthu wanguŵikikiya pa charu.

⁵Kuti kujitukumuwa kwa munthu muheni nkhufupi mu charu, ndi likondwa la munthu wambura kuziŵa Chiuta nda kanyengo kafupivi?

⁶Chingana msinkhu wake ufika mpaka kuchanya, ndipo mutu wake ugota ku mitambo,

⁷ndipuuli wakamaranga nge ndi ulambwe wake; wo ŵatimuwona ŵakatinge, ‘Wepani?’

⁸Wakaphururukiyanga kutali nge ndi loto, ndi kuti wakasanirikanga cha; wakadikiskikiyanga kutali nge ndi chiwona cha usiku.

⁹Jiso lo lingumuwona kuti limuwonenge so cha, chingana ndi malo ghake kuti, ghamuwonenge so cha.

¹⁰Ŵana ŵake ŵakatataliyanga ŵakavu, manja ghake ghakawezganga usambasi wake.

¹¹Viwanga vyake vyakuzazika ndi nthazi za wanamana wake, kweni vikagonanga nayo pamoza mu fuvu.

¹²“Chingana uheni ungaŵa wakunowa mu mlomo wake, chingana watiubisakusi ku lilime lake,

¹³chingana watiusunga, ndipo kuti wakhumba kuwutaya cha, watiwusunga mu mlomo wake,

¹⁴kweni ndipuuli, kurgha kwake kuwezgeka kutuwa mu chifu chake; nduru ya chipiriri mwaku iyo.

¹⁵Wameza usambasi, ndipo watiwuwukuwa so; Chiuta watiwutuzga kutuwa munthumbo yake.

¹⁶Wakawonkhanga nduru ya njoka; lilime la chipi limubayenge.

¹⁷Kuti wakalereskanga pa misinji cha, tumusinji twakuzazika ndi uchi, ndi mafuta.

¹⁸Wakawezganga cho wangutakatakiya, ndipo kuti wakachimezanga cha; kuti wakakondwanga ndi chanduwu cha malonda ghake cha.

¹⁹Chifukwa waŵasuzga ndi kuŵajowo ŵakavu; waphanga nyumba yo kuti wanguzenga iyo cha.

²⁰“Chifukwa chirghoko chake nchikuru, ndipo kuti wakasunganga kanthu kekose cha mwaku ko wakondwere.

²¹Kwengavi kanthu kukujako pavuli wanguti wargha; chifukwa ichi usambasi wake kuti ukajaririyanga cha.

²²Mu uzari wakuguta kwake waŵenge mukavu, manja ghose ghakuwo ŵatimsuzga ghamziyenge,

²³po we pafupi kuguta, Chiuta wamutayiyenge ukari wake ukuru, ndi kuwung'iska paku iyo nge nkhurgha kwake.

²⁴Wakathaŵanga ku chidya cha chisulo; muvwi wa mkuŵa ukamurasanga.

²⁵Ukhweturika, kutuwa mu liŵavu lake songo lake lakugadima likhwetuka mu nduru yake; chofyo chiŵenge paku iyo.

²⁶Mdima ukuru usungikiya iyo nge ndi usambasi wake; moto wambura kuwuphuta ukamochanga ndi kumubaya; chose chakusiyika mu hema lake chikanyekanga.

²⁷Machanya ghakavumbuwanga ulakwi wake, ndipo charu chikamuyukiyanga.

²⁸Usambasi wamu nyumba yake wose ukatorekanga vyose viphangikenge pa zuŵa la ukari waku Chiuta.

²⁹Ili ndilo phande la munthu muheni lakutuwa kwaku Chiuta, chihara chakulangulikiya iyo ndi Chiuta.”