Read gitonga Jobu 21 Bible Online

Jobu 21 - gitonga bible

Jobu 21

¹Jobu wangwamuka, wanguti:

²“Vwani umampha mazu ghangu, ichi chiŵenge chisangarusku chinu.

³Mundizomerezge kuti ndikambe, ndipo pavuli pa ndakamba, hoyani.

⁴Kumbi dinginiku langu, ndidinginikiya munthu? Chifukwa nchine na ndireke kuŵa wakurongoro?

⁵Ndilereskeni ndi zizwani, ŵikani janja lino pa mlomo winu.

⁶Po, ndighanaghana nditopa, vimbwambwa viko liŵavu langu,

⁷nchifukwa uli ŵaheni ŵaja ndi umoyo, ŵafika ku ukhongwe, ndi ŵatuŵa ndi nthazi?

⁸Ŵana ŵawo ŵajarikika pa maso pa wo, ndi ŵaziku ŵawo nawo so viyo pa maso pawo.

⁹Nyumba zawo zija phe kwambura kopa, nanga ndi nthonga yaku Chiuta kuti yituŵakwaska cha.

¹⁰Nkhuzi yawo yikwera kweni kuti yitondeka cha; ng'ombe yawo yinthukazi nayo yibara umamphavi, kuti yiphoroza cha.

¹¹Ŵana ŵawo nge ndi muskambu wa mberere ŵachimbiya kwachiseŵe, ŵana ŵawo ŵavina.

¹²Ŵatumba vimbumbuli ndi ŵabangwe, ŵakondwa pakuvwa mungoli.

¹³Maumayo ghawo ngakusakata, mu chimangu, ŵasikiya ku muunda.

¹⁴Ŵatiti kwaku Chiuta, ‘Tuwaniko kwaku ifwe! Kuti tikhumba zeru za nthowa zinu cha.

¹⁵Wanthazizose ndiyani kuti timutataliye? Ndipo chanduwu nchine cho tironde pakumuromba?’

¹⁶Wonani, Asi usambasi wawo we mujanja lawo? Maghanaghano gha ŵaheni ghe kutali ndi ine.

¹⁷“Kumbi nyali za ŵaheni zizimwika kalinga? Nkhalinga masoka ghawo ghatuŵawiya? Nkhalinga Chiuta watuŵagaŵiya vitima mu ukari wake?

¹⁸Wenge ndi mapesi ghakuputa ndi mphepo,

¹⁹Imwe mutiti, Chiuta wawunjikiya ŵana ŵa munthu chilangu cha ubendezi wake. Kweni wakwenere kuŵachitiya yiwo ŵeneko kuti ŵachiziŵe.

²⁰Maso ghawo penipo ghawona pharghaniko lawo, ŵatumwako ukari wa Wanthazizose yiwo ŵeneko.

²¹Kumbi mutiti ŵaphwere zinyumba zawo, ŵafwenge iwo, penipo unandi wa myezi yawo wadumurizgika?

²²Kumbi ndiyani yo wangasambizga Chiuta vinjeru, pakuwona kuti Iyo ndiyo wakweruzga ŵapachanya?

²³Munyake watufwa weche ndi nthazi fikepo, we phe-e ndipo we bata,

²⁴mbali zake zazaza ndi mkaka, viwanga vyake vyamatirwa ndi wongo wamafuta.

²⁵Munyake watufwa mu kuŵaŵa kwa mzimu wake, kuti waturgha ndikukondwa cha.

²⁶Ŵagonenge pasi nge ndi fuvu, ndipo fusi ziŵatakenge.

²⁷“Wonani, ndiziŵa maghanaghano ghinu, ndi chiŵembu chinu cho mutindiyukiya nacho,

²⁸pakuti mutiti, ‘Kumbi nyumba ya karonga ye pani? Kumbi lepani hema lo, muheni wajangamo?’

²⁹Kumbi mulivi kuŵafumba wo mbakwenda muzinthowa, kumbi mulivi kuvwana nawo ukaboni wawo?

³⁰Kuti ŵabendezi ŵataskika muzuŵa la pharghaniko ndikutaskika mu zuŵa la ndewu?

³¹Ndiyani yo wangamwanduliya nthowa yake pamaso pake, pamwenga kumuwezge cho wachichita?

³²Penipo wapingikiya ku muwunda ndikuja mwenimo mumasano.

³³Mabuma ghamu dambo ngakunowa kwaku iyo; munthu yose ngwakumurondo, ndipo wo mbakwenda paurongo pake mbambura kuŵerengeka.

³⁴Viyo mungandisangaruska uli ndi vyaŵaka? Mukwamuka kwinu kulivi kujako kanthu kweni utesi pe.”