Read gitonga Jobu 24 Bible Online

Jobu 24 - gitonga bible

Jobu 24

¹“Chifukwa nchine nyengo za cheruzgu zilivi kumikika ndi Wanthazizose, ndi chifukwa nchine wo watumuziŵa wareka kuwona mazuŵa ghake?

²Ŵanthu ŵanderezga mphaka za charu; ŵaphanga miskambu ya viŵetu ndi kuviriska.

³Ŵakhweme kutali mbunda ya mranda wambura awiske; ŵaphanga ng'ombe ya choko kuti yiŵi chikoli.

⁴Ŵapatuska ŵakavu kuti ŵatuwemo mu nthowa; ŵasauchi ŵamu charu wose ŵajibisa ŵeneko.

⁵Wonani, nge ndi mbunda zamudondo, ŵaruta ku milimu yawo, ŵakupenja nyama mu lisuwa, kuŵa chakurgha cha ŵana ŵawo.

⁶Wavuna vyakurgha vyawo mu munda, ndi kukonkho mphereska zamu munda wa muheni,

⁷ŵagona ŵankhuli usiku wose, kwambura chivwaru, ndi ŵalive chakuvwinkha mu mphepo.

⁸Ŵazumbwa ndi vuwa yamu mapiri, ndi ŵabisama ku majarawi pakuti ŵalivi chakubisamamo chakukho.

⁹Ŵakwamphuwa mwana wambura awiske ku be, ndi ŵaphanga mwana wa mkavu kuŵa chikoli.

¹⁰Ŵatendatenda ndi nkhuli, ŵambura kuvwara maraya; ŵanja, ŵapinga nchinda za vyakurgha,

¹¹ŵabika mafuta mukati mu malinga gha ŵanthu ŵaheni, ndi ŵaponda mphereska pa mbuli, kweni ŵakomwa ndi nyota.

¹²Ŵabuwura kutali kubwaro kwamsumba nge ndi mubuwuru wa nyifwa, mzimu wa ŵakulasika uliriya chovyo. Ndipuuli Chiuta kuti waphwere pempho lawo cha.

¹³“Ŵalipo ŵanyake wo ŵagaruka kutuwa ku ukweru, wo ŵalivi kuziŵa nthowa zake, ndi kuti ŵaja mwaku zo cha.

¹⁴Wakubaya wayuka ndi usiku kuti wabaye ŵakavu ndi ŵasauchi, mu usiku watuŵa nge ndi munkhungu.

¹⁵Jiso la mureŵi lirindizga matandakucha, ndi kuti, ‘Palivi jiso lo lindiwonenge; wabulumutizga chisku chake.

¹⁶Mu mdima ŵakumba ndi kutoro nyumba; zo ŵazipachiya ndi msana; ukweru kuti ŵatiuziŵa cha.

¹⁷Pakuti usiku wa mdima ndi mlenji kwaku iwo wose, chifukwa ŵatopa cha vyakofya vyamu mdima ukuru.

¹⁸“Mutiti, ‘Ŵatoreka ruŵiruŵi pamaji, phande lawo ndakutembeka mu charu; palivi yumoza wa nchitu wangaruta kufupi ndi minda yawo.

¹⁹Chilala ndi chifundizi vikamuska maji gha chiwuvi; viyo ndimo uchitiya muunda ndiwo ŵalakwa.

²⁰Nyumba zamu muzi zaŵaruwa, zina lawo kuti likumbukika so cha. Viyo uheni wasweka nge ndi muti.’

²¹“Ŵasuzga munthukazi yo nchumba wambura mwana, ndi kuti ŵachita umampha ku choko cha.

²²Ndipuuli Chiuta wapereka utali wa umoyo ku vinkhara ndi nthazi zake; ŵayuka so chingana kuti ŵagomekezga umoyo wawo cha.

²³Watuŵapaska chimangu ndipo ŵakhozgeka, maso ghake ghe pa nthowa zawo.

²⁴Ŵakuzgika kanyengo kafupivi, ndi pavuli pake ŵaruta; ŵafota ndi ŵavumuka nge vyakusongo kwa trigu, ŵadumulika nge ndi songo za trigu.

²⁵Asani kuti ndi viyo cha, ndiyani wandisuskenge kuti nde mutesi, ndi kurongo kuti mulivi kanthu mwaku vyo ndikamba?”