Read gitonga Jobu 27 Bible Online

Jobu 27 - gitonga bible

Jobu 27

¹Ndipo Jobu wanguwerezgapo so nthanthi yake wanguti:

²“Chiuta wamoyo, yo watuzgapo urunji wangu, ndi Wanthazizose, yo wachita mzimu wangu kuŵa wakuŵaŵa,

³nyengo yose yo mvuchi wangu weche mwaku ine, ndi mzimu waku Chiuta wemu mphunu zangu,

⁴mlomo wangu kuti ukarongoronga utesi cha; ndi lilime langu kuti likakambanga upusikizgi cha.

⁵Nanga nkhamanavi kose kuti ndingazomerezga cha kuti ndimwe ŵarunji; kuti ndingataya chigomezgu changu cha mpaka ku nyifwa.

⁶Ndakoreska nganganga chigomezgu changu, ndipo kuti ndichitayenge cha, chifukwa chaku vyo vyachitika mu mazuŵa ghangu.

⁷“Murwani wangu waŵe nge ngwakwananga, ndi yose yo watindiyukiya waŵe nge ngwakulakwa.

⁸Kumbi chigomezgu cha wambura kuziŵa Chiuta nchine penipo Chiuta watuzgamo umoyo wake?

⁹Kumbi Chiuta wakavwanga kuriya kwake. Penipo masuzgu ghatuza paku iyo?

¹⁰Kumbi wakakondweriyanga mu Wanthazizose? Kumbi wakadananga pa zina laku Chiuta, nyengo zose?

¹¹Nkhakusambizganga ndi za janja laku Chiuta, ndipo chose cho che ndi Wanthazizose kuti nkhabisanga cha.

¹²Wonani, mose mwachiwona mwaŵeni, nanga chifukwa nchine mose pamoza mwaŵa ŵawakawaka?

¹³“Ili ndilo phande la munthu muheni kwaku Chiuta, ndi chihara cho ŵakusuzga ŵanyawo ŵaronde kutuwa kwaku Wanthazizose:

¹⁴Asani ŵana ŵake ŵatandana, ŵatandanirana kubayika ndi lipanga, ndipo ŵazuku ŵake ŵalivi vyakurgha vyakufikapo.

¹⁵Wo ŵamujariyapo ŵawundikenge ndi nthenda ya chideru, ndipo vyoko vyawo kuti vituŵatenjere cha.

¹⁶Chingana wangawunjika siliva ndundu nge ndi fuvu, ndi kuwunjika ndundu ya vyakuvwara nge ndi dongo,

¹⁷nanga wangaviwunjika kweni wo ŵakavivwaranga mbakurunjika, ŵambura kalema ndiwo ŵagaŵanenge siliva.

¹⁸Nyumba yo wazenga yiyana ndi mtatavu wa duŵiyuŵi, yiyana ndi msasa wo mlonda wazenga.

¹⁹Wagona pa chita wakusambasa, kweni kuti wakaŵanga viyo cha nyengo yose, pakujura maso ghake wawona kuti usambasi waruta.

²⁰Mantha ghatimuko nge ndi maji ghanandi, mu usiku kanthenga watimuputiskiya kutali.

²¹Mphepo yakuvuma yitimunyamuliya kutali, waruta; watimupeye kutali kutuwa ku malo ghake.

²²Yitimvungavunga kwambura kumchitiya lisungu, wathaŵa ruŵiruŵi kutuwa ku nthazi ya mphepo.

²³Mphepo yiwombe manja ghake paku iyo, ndi kujuma paku iyo kutuwa ku malo ghake.