Read gitonga Jobu 28 Bible Online

Jobu 28 - gitonga bible

Jobu 28

¹“Nadi ulipo mgodi wa siliva, ndi malo gha golide mweniyo ŵayengetuwa.

²Chisulo chitoreka mu charu, ndi mkuŵa usongonoreka kutuwa ku mwa.

³Ŵanthu ŵangweruska mdima, ndi ŵapenja mwa wa ndrama kutali kwakumariya mu mdima ukuru wamunkhorwe.

⁴Ŵakumba migodi mu chidika kutali ndi kumalo gho ŵanthu ŵajako; ŵaruwika ndi ŵanthu ŵakwenda, ŵatandala kutali ndi ŵanthu, ŵayingayinga uku ndi uku.

⁵Mu charu mutuwa chakurgha, kweni kusi kwake kugadabuka nge kwe moto.

⁶Mya yake ndi malo gha masafiri gha mtengo, ndi ghe ndi fuvu la golide.

⁷“Nthowa yiya kulivi chiyuni chakurgha chiyiziŵa, jiso la khuŵi nalo kuyiwona cha.

⁸Nyama zikari zilivi kukandamo, nkharamu nayo yilivi kujumphamo.

⁹“Munthu waŵika janja lake pa jarawi la ndrama, wagadabuwa mapiri ndi misisi yawo.

¹⁰Watuswa nthowa mu majarawi, maso ghake ghawona kanthu kose kakuzirwa.

¹¹Wajara tumisinji tose kuti tireke kuchapaliya, ndipo kanthu ko nkhakubisika watikatore kukweru.

¹²“Kweni nunkhu ko zeru zingasanirika, ndipo ndinunkhu ko kwe malo gha vinjeru?

¹³Munthu kuti waziŵa cha nthowa yakurutiyako, ndipo kuti yisanirika cha mu charu cha ŵamoyo.

¹⁴Ndimba ya maji yititi, ‘Kuti ze mwaku ine cha,’ ndipo nyanja nayo yititi, ‘Kuti ze ndi ine cha.’

¹⁵Kuti ziziŵa kugurika ndi golide cha, ndipo kuti zingaziŵa kupimika nge ndi mtengo wake cha.

¹⁶Kuti zingalinganizgika ndi golide waku Ofiri cha pamwenga onike wakuzirwa pamwenga safire.

¹⁷Golide ndi galasi kuti vingayana nazo cha pamwenga kuti zingaziŵa kusinthaniskika ndi vijewere vya golide lakwengeka cha.

¹⁸Kuti uteka wo ŵawomba saru, pamwenga mwa wakuzirwa utuŵa vyose vingazumbulika cha; chifukwa kuzirwa kwa chinjeru kuruska mya ya mtengo ukuru.

¹⁹Topazi waku Etiopia kuti wangaziŵa kulinganizgika ndi chinjeru cha, nanga nkhusinthaniskika ndi golide lakwengeka.

²⁰“Ndinunkhu nanga ko kutuliya zeru? Ndi ghepani malo gha vinjeru?

²¹Vikubisika ku maso gha ŵanthu ŵamoyo, ndi kujarika ku viyuni vyose vya mude.

²²Pharghang'iku ndi nyifwa vititi, ‘Tavwa mbiri yake ndi makutu ghidu.’

²³“Chiuta ndiyo waziŵa nthowa yakurata kwaku zo ndi waziŵa malo ghaku zo.

²⁴Chifukwa walereska kumpherekezgu za charu, ndi wawona kanthu kose ka panu pa charu.

²⁵Penipo wangupaska mphepu uzitu wake, ndi kupima maji ndi chipimiro;

²⁶penipo wangumikiya vuwa dangu, ndi nthowa ya limphezi lakugunda,

²⁷viyo wanguziwona zeru ndi wangumemeza zo; wanguzighanaghana ndi wanguzipenjeska.

²⁸Ndipo wanguti ku munthu, ‘Wona, chofyo cha Ambuya, chenicho ndi zeru; ndipo kupatuka ku uheni ndi vinjeru.’ ”