Read gitonga Jobu 29 Bible Online

Jobu 29 - gitonga bible

Jobu 29

¹Ndipo Jobu wanguwerezgapo so nthanthi yake, ndi wanguti:

²“Owe, asani ndenga mu myezi yo yarutapo, mu mazuŵa gho Chiuta wandilondanga;

³penipo nyali yake yinguŵara pa mutu wangu, ndipo ndi kungweruka kwake, ndingwenda mu mdima;

⁴mo ndinguŵiya mu mazuŵa gha uhurwa wangu, penipo ubwezi waku Chiuta wenga mu hema langu,

⁵penipo Wanthazizose wenga weche nani, penipo ŵana ŵangu ŵenga pafupi nani;

⁶penipo marundi ghangu ndichenda ghasukikanga ndi mkaka; ndipo majarawi ghandidiriyanga twa mafuta!

⁷Penipo ndingutuliya ku bwaro ku likomo la msumba, penipo ndingunozga chakujapo changu pa bwaro,

⁸ŵanyamata ŵangundiwona ndi ŵanguwerere, ŵaraŵara ŵangusoka ndi ŵanguma;

⁹mafumu ghanureka kurongoro, ŵanguko manja ghawo pa milomo yawo,

¹⁰zinduna zinguchetema, malilime ghawo ghangukaniriya kuchanya kwa milomo yawo.

¹¹Penipo gutu linguvwa, lingundidana kuti ndenga wakutumbikika, ndipo po jiso linguwona lingukhozga;

¹²chifukwa ndingutaska mkavu yo wanguriya, ndi wambura awiske yo wengavi wakumovya.

¹³Chitumbiku chaku yo wenga pafupi kufwa chinguza paku ine, ndipo ndinguchitiska mtima wa choko kumba ndi chimwemwe.

¹⁴Ndinguvwara urunji, ndipo nawo ungundivwarika, kweruzga kwangu kunguŵa nge ndi khanju ndi mphumphu yaku mutu.

¹⁵Ndenga maso ku ŵachiburumutiya, ndi marundi ku ŵakupunduka marundi.

¹⁶Ndenga wiske wa ŵakavu, ndingupenjapenja mrandu waku yo ndengavi kumziŵa.

¹⁷Ndinguswa vimangiro vya minyu gha muheni, ndikumuchita kuti wambotoske chavu cha minyu ghake.

¹⁸Viyo ndingughanaghana kuti nkhafwanga mu chivimbo changu, ndipo nkhandaniskanga mazuŵa ghangu nge ndi mchenga,

¹⁹misisi yangu yikafikanga ku maji, dungwe likawanga pa mphanda zangu usiku wose,

²⁰unkhankhu wangu ujenge wambura kukoropa mwaku ine, ndipo uta wangu ukaŵanga ufya nyengo zose mu janja langu.

²¹“Ŵanthu ŵangunditegherezga, ndi ŵangulindizga, ndi ŵanguja chisisi kuti ndiŵapaske fundu.

²²Ndati ndakamba, kuti ŵangurongoro so cha, mazu ghangu ghanguŵadikiya.

²³Wangundirindizga nge ndi vuwa: ndipo ŵangujura milomo yawo nge nkhu vuwa ya chizimwa malufya.

²⁴Ndinguŵaseka po ŵengavi chigomezgu, ndipo ŵengavi kuwiska kutowa kwa chisku changu,

²⁵ndingusankha nthowa yawo ndipo ndenga nge ndi fumu, ndinguja nge ndi karonga mukati mu maliŵanja ghake, nge ngwakusangaruska ŵachilirizi.