Read gitonga Jobu 3 Bible Online

Jobu 3 - gitonga bible

Jobu 3

¹Pavuli paku ichi Jobu wangubanuwa mlomo wake, ndi wangutemba zuŵa la kawi kake.

²Ndipo Jobu wanguti:

³“Litimbanike zuŵa lo ndinguwiya ndi usiku wo kunguneneke, ‘Wazuwuka mwana munthurumi.’

⁴Zuŵa lo liŵi mdima! Chiuta wa kuchanya wangaliphwerenga cha, nanga nkhuti ukweru uŵaliye paku lo.

⁵Mdima ukuru ndi mduzi wa nyifwa viliŵange kuŵa lawo. Mitambo yiwe pachanya pake, mdima wa zuŵa ulitenthemeske.

⁶Usiku uwa mdima wamunkhorwe ulibenekere! Lireke kukondwa mukati mu mazuŵa gha chirimika! Lireke kuŵerengeke pamoza ndi mwezi.

⁷Inya usiku uwa uŵe mayiyi, mureke kutuwamo kukambura kwalikondwa.

⁸Ŵawutembe wo ŵatemba zuŵa, wo ŵaziŵa kuyuska chinyama cha maji.

⁹Nyenyezi za kumatandakucha kwake zivirimitiya; upenje ukweru, kweni ureke kuŵa nawo chingana nkhuwona malazi gha mlenji.

¹⁰Chifukwa ungureka kujara makhomo gha nthumbo ya ama chingana nkhubisa suzgu ku maso ghangu.

¹¹“Chifukwa nchine ndingureka kufwa pakupapika kwangu, kutuwa mu nthombo ndi kufwa penipo?

¹²Kumbi chifukwa nchine chipakato chingundironde, pamwenga maŵe nagho kuti ndiwonkheko?

¹³Pakuti mphanyi ndingugona pasi ndi kuti chete; mphanyi ndagona tulo, viyo mphanyi ndingupumuwa,

¹⁴pamoza, ndi pamoza ndi ŵakaronga, ndi ŵamawupu ŵa charu wo ŵakujizenge so ŵeneko mahame.

¹⁵Pamwenga ndi ŵana ŵakaronga wo ŵenga ndi golide, wo ŵanguzaza nyumba zawo ndi siliva.

¹⁶Pamwenga chifukwa nchine ndingureka kupapika panyengo yambura kufikapo, yakubisika, nge mbamujedu wo kuti ŵawona ukweru cha?

¹⁷Ko ndiku ŵaheni ŵareka kusuzga ndipo ŵakuvuka ŵapumuwa.

¹⁸Ko ndiku ŵakumangika ŵapumuwa pamoza kuti ŵatuvwa mazu gha ŵakapitawo ŵanchitu cha.

¹⁹Ŵamana ndi ŵara ŵe kweniko, ndipo muŵanda ngwakufwatulika, ku mbuyake.

²⁰“Chifukwa nchine ukweru upaskika ku munthu yo ngwakusuzgika ndi umoyo kwaku wo mbakupwetekeka mu mitima.

²¹Wo ŵakhumba kuti nyifwa yiŵaziye, kweni kuti yituza cha, ŵatiyikhumba ukongwa kwakuruska usambasi wakubisika;

²²mbayane wo ŵasekere ukongwa, ndi kukondwa pakusaniya muunda.

²³Chifukwa nchine ukweru upaskika ku munthu mweniyo nthowa yake nja kubisika, mweniyo Chiuta wamuŵighiriya?

²⁴Pakuti kusiska mtima wangu nchakurgha changu, ndipo mitamanthu yangu yipungulika nge ndi maji.

²⁵Pakuti chinthu cho nditopa ndicho chitindiziya, ndipo cho nditenthema ndicho chitindiwiya.

²⁶Kuti ndifwasa cha, nanga nkhuja chisisi, masuzgu ghatindi ziya ndipo ndilive chipumulu.”