Read gitonga Jobu 31 Bible Online

Jobu 31 - gitonga bible

Jobu 31

¹“Ndachita phanganu ndi maso ghangu, ndingalereska uli nanga pa mwali?

²Phande langu lakutuwa kwaku Chiuta kuchanya lingaŵa chine, ndi chihara changu chakutuwa ku Wanthazi zose kuchanya chingaŵa chine?

³Kumbi kuti soka liwiya ŵakulakwa cha, ndi masuzgu kuti ghawiya ŵakuchita ubendezi cha?

⁴Kumbi iyo kuti wawona nthowa zangu cha, ndi kuŵerenga michapo yangu yose?

⁵“Asani ndenda ndi utesi, ndipo rundi langu lathaŵiriya ku upusikizgi;

⁶(ndipimike pa mweso wakusukunika umampha, mwakuti Chiuta wawone urunji wangu!)

⁷Asani muchapo wangu wapatuka mu nthowa, ndipo mtima wangu warondo maso ghangu, ndipo asani kadontho kabatika pa manja ghangu;

⁸viyo rekani ndipande, ndi munyake warghe, ndipo cho chandimere chizuwike.

⁹“Asani mtima wangu warandizgikiya ku munthukazi, ndipo ndagona pa khomo la mzengezgani wangu;

¹⁰viyo ipo muwoli wangu wasilire munyake, ndipo ŵanyake ŵasindamiye paku iyo.

¹¹Chifukwa uwu ndi mrandu uheni ukongwa, uwu ndi ubendezi wakulangikiya nawo ndi ŵeruzgi;

¹²uwu ndi moto wakunyeka mpaka ku pharghaniko, ndipo uwochenge mbeu zangu ndi misisi yake viyo.

¹³“Asani ndakana mrando wa wanchitu wangu munthurumi ndi wanchitu wangu munthukazi, penipo ŵanguza ndi dandaulu lakumikana ndi ine;

¹⁴nkhachitanga chine pa Chiuta wayuka, wachifumba nkhamumukanga chine?

¹⁵Kumbi yo wangulenga ine mu nthumbo, kuti ndiyo wangulenga iyo cha? Asi njumoza pe yo wangutiwumba mu nthumbo?

¹⁶“Asani ndakaniriya chinthu cho mkavu wanguchikhumba, pamwenga kupaska mdima ku maso gha choko,

¹⁷pamwenga ndargha chakurgha changu ndija, mranda wambura awiske walive kurghako

¹⁸(penipo kwamba ku wana wake warereka ndi ine nge mbawiske, ndamurongozga kutuwa ku nthumbo ya anyina),

¹⁹asani ndawona munthu kusuzgika chifukwa chakuŵavi chakuvwara, pamwenga munthu mkavu wambura chakudinkha,

²⁰asani viwunu vyake vyanditumbika cha, ndipo asani kuti wangufundiskika cha ndi chakudika cha weya wa mberere;

²¹asani ndasoske janja langu pa mranda wambura awiske, chifukwa ndawona chovyo mu likomo,

²²iku mkono wangu upanthukeko ku phewa langu, ndi ufyoke mu malunga ghake.

²³Chifukwa ndenga mu chofyo chakutuwa kwaku Chiuta, ndipo ndingutondeka kuma pa maso pa ukuru wake.

²⁴“Asani ndaŵika chigomezgu changu mu golide, pamwenga golide lakwenga kuti liŵe chigomezgu changu,

²⁵asani ndasekere chifukwa usambasi wangu ngukuru, pamwenga chifukwa manja ghangu ghangusaniya vinandi;

²⁶asani ndalereska pa lumwe penipo linguŵara, pamwenga pa mwezi po wendanga ndi kugadima,

²⁷ndi mtima wangu ungunyengeka muubende, mlomo wangu wafyofyontha janja langu;

²⁸uwu nawo mbubendezi wakulangikiya ndi mweruzgi, chifukwa mphanyi ndaŵa mtesi kwaku Chiuta wa kuchanya.

²⁹“Asani ndakondwere ndi soka laku yo wangunditinkha, pamwenga kujitukumuwa po wangusanirika ndi uheni

³⁰(kuti ndazomerezga mlomo wangu kunanga cha pakumukhumbiya thembo mu umoyo wake);

³¹asani ŵanthu ŵa hema langu kuti ŵachikamba cho cha, ‘Ndiyani yo wareka kuguta ndi nyama yake?’

³²(Mlendo kuti wagona mu mseu cha; ndamujuriya mlendo khomo langu);

³³asani ndabisa kwananga kwangu ku ŵanthu, ndi kubisa ubendezi wangu mu chifuŵa changu,

³⁴chifukwa ndinguma mu chofyo chikuru cha mzinda, ndi muyuyu wa mbumba vingunditenthemeska, viyo kuti ndinguma cheti, ndengavi kuturiya kubwaro.

³⁵Owe! Mphanyi wengapo wakundivwa! (Chidindu changu ndi ichi! Wanthazizose wandimuke!) Kuti mphanyi wanguremba cha buku murwani wangu!

³⁶Nadi ndingulipinga pa phewa langu, mphanyi ndingulimangiriya ku mutu wangu nge nchifuku cha ufumu,

³⁷mphanyi ndingumupaska makani gha kayendero kangu kose, mphanyi ndingumufika nge ndi karonga.

³⁸“Asani charu changu chiriya kumikana nani, ndi mugando yake nayo yariya pamoza nacho;

³⁹asani ndargha vipasi vyake kwambura kulipa ndrama, ndi kuŵatayiska umoyo ŵeneko ŵaku vyo;

⁴⁰iku mphanyi minga yakuwa mu malo gha trigu, ndi limamba mu malo gha barile.” Mazu ghaku Jobu ghamara.