Read gitonga Jobu 33 Bible Online

Jobu 33 - gitonga bible

Jobu 33

¹“Sono vwani kakambidu kangu, A! Jobu, ndi tegherezgani ku mazu ghangu ghose.

²Wonani, ndijura mlomo wangu; lilime mu mlomo wangu lirongoro.

³Mazu ghangu gharongo kurunjika kwa mtima wangu, ndipo cho milomo yangu yiziŵa, yichikamba kwakuneneska.

⁴Mzimu waku Chiuta wandilenga, ndipo mvuchi wa Wanthazizose utindipaska umoyo.

⁵Undamuke, asani ungaziŵa kwamuka; nozgani mazu ghinu mu mururiku panthazi pangu ndipo mujikhozge.

⁶Wonani, ndilereska kwaku Chiuta nge ndimo imwe namwe mulereske kwaku iyo ine nani ndinguwumbika ku dongo.

⁷Wonani, kulivi chofyo chaku ine chakuti chikofyeni imwe, kuzotofya kwangu kuti kukaŵanga kuzitu cha kwaku imwe.

⁸“Nadi, mwarongoro mu makutu ghangu, ndipo ndavwa kayowozi kamasu ghinu.

⁹Mutiti, ‘Nde wakuphotoka, wambura ubendezi; nde wambura kalema, mulivi ulakwe mwaku ine.

¹⁰Wonani, wasaniya nyengo zakumikiyana nani, watindipima nge nde murwani wake,

¹¹waŵika marundi ghangu mu matangaja, ndi walereska kenderu kangu kose.’

¹²“Wonani, mwaku ichi kuti muneneska cha. Ndikumukeninge, Chiuta ndi mukuru kuruska munthu.

¹³Kumbi chifukwa nchine upindana nayo, kuti, ‘Wakamukanga nanga ngamoza gha mazu ghangu cha’?

¹⁴Pakuti Chiuta wakamba kamoza, pamwenga kaŵi, nanga munthu kuti watumuvwa cha.

¹⁵Mu roto, mu chiwona chaku usiku, penipo tulu tukuru tituŵako ŵanthu, penipo ŵasiwa pa vita vyawo,

¹⁶penipo ndipo wajura makutu gha ŵanthu, ndi kuŵatenthemeska ndi vichenjezgu,

¹⁷mwakuti wamutuzgeko munthu ku nchitu yake, ndi kutuzgako kujikuzga ku munthu;

¹⁸wawezga umoyo wake kuti ureke kusere mu zenje, umoyo wake kuti ureke kukomwa ndi lipanga.

¹⁹“Munthu walangika so ndi vyakuŵaŵa pa chita chake, ndipo so viwanga vyake vipwetekeka rutaruta;

²⁰viyo mtima wake useruka ndi chiŵande ndi umoyo wake kuti ukhumba vyakurgha vyakunowa cha.

²¹Munofu wake wamara ndikuti uwoneka so cha, ndipo viwanga vyake vyo kuti vyawonekanga cha sono viwoneka pakwero.

²²Mzimu wake undere ku muunda, ndi umoyo wake kwaku wo wabaya.

²³Asani wakamuŵiyangako mungelo, mwendapakati, yumoza waku wo chikwi, (1,000) wakukunene munthu cho nchakurunjika kwaku iyo;

²⁴ndipo ngwalisungu kwaku iyo, ndi watiti, ‘Mutaskeni wangasikiya ku muunda, ndasaniya chakumuwombore nacho;

²⁵munofu wake uŵe nge ngwa uhurwa; wawere ku mazuŵa gha uhurwa wake.’

²⁶Viyo munthu waromba kwaku Chiuta, ndipo watimuronde, watuza pa maso ghake ndi chimwemwe. Wanene ŵanthu ndi kutaskika kwake,

²⁷ndi ŵatumba paurongo pa ŵanthu, ndi watiti: ‘Ndingulakwa, ndi ndingutimbanizga cho chenga chakurunjika, ndipo kuti chingundanduliya kanthu cha.

²⁸Wataska umoyo wangu kureka kuya ku muunda, ndipo umoyo wangu ukawonanga ukweru.’

²⁹“Wonani, Chiuta wachita vinthu vyose ivi kaŵi, katatu, ndi munthu,

³⁰kuwezga mzimu wake ku muunda, mwakuti wawoni ukweru wa umoyo.

³¹Chenje, O! Jobu, tegherezga kwaku ine, uje chisisi, ndipo nkhakambanga.

³²Asani we ndi kanthu kukamba ndamuke; kamba, chifukwa ndikhumba kukurunjiska.

³³Asani cha, tegherezga kwaku ine, uje chisisi, ndipo nkhakusambizganga zeru.”