Read gitonga Jobu 34 Bible Online

Jobu 34 - gitonga bible

Jobu 34

¹Ndipo Elihu wanguti:

²“Vyani mazu ghangu, imwe ŵanthu ŵazeru, ndi tegherezgani kwangu, imwe muziŵa,

³pakuti gutu litesa mazu nge ndimo mlomo ulaŵiya chakurgha.

⁴Tiyeni tisankhe cho nchakurunjika, tiyeni tikhozge cho nchamampha mukati mwidu.

⁵Pakuti Jobu wanguti, ‘Ndine murunji; ndipo Chiuta watuzgapo urunji wangu,

⁶mu malo gha urunji wangu, ndapimika mutesi; chironda changu nchambura kuchizgika, chingana nde wambura kulakwa.’

⁷Ndiyani munthu yo wayana ndi Jobu, yo watumwa chakurgha nge ndi maji,

⁸yo wasungana ndi ŵaheni, ndi watenda ndi ŵabendezi?

⁹Chifukwa wanguti, ‘Kutanduliya munthu kanthu cha kuti wakondweriyenge mwaku Chiuta.’

¹⁰“Chifukwa ichi, mundivwe, imwe mwa ŵanthu ŵavinjeru, chiŵe kutali ndi Chiuta kuti iyo wachiti ubendezi, ndipo chiŵe kutali ndi Wanthazizose kuti wabudi.

¹¹Chifukwa wamuwezgiyenge munthu kwakuyana ndi nchitu yake, ndi wakamuchitiyanga munthu kwakuyana ndi kayendero kake.

¹²Nadi, Chiuta kuti wakananganga cha, ndipo Wanthazizose kuti wabendezgenge cheruzgu cha.

¹³Ndiyani yo wamupaska charu kuchilereska, ndipo ndiyani wangularika paku iyo charu chose?

¹⁴Asani wanguwezge kumweneko mzimu wake, ndi kuwunjika ku mweneko mvuchi wake.

¹⁵Mphanyi nyama zose zatinge zikomwiyenge pamoza, munthu watinge waweriyenge ku fuvu.

¹⁶“Asani mwendi zeru, vwani ichi; tegherezgani kwaku cho ndikamba.

¹⁷Kumbi yo watinkha urunji wangawusa? Kumbi mukamsuskanga murunji, wanthazi zikuru?

¹⁸Mweniyo watiti ku karonga, ‘Waŵaka iwe,’ ndi ku zinduna, ‘Mwaŵanthu ŵaheni imwe;’

¹⁹mweniyo wareka kurumba chisku nanga ndi mukati mu mafumu, nanga nkhuphwere ŵaromba kuruska ŵakavu, chifukwa wose mba nchitu ya manja ghake!

²⁰Mu kanyengo kafupivi ŵatufwa, pa usiku pakati ŵasuzgika ndi ŵaruta yi, ndi ŵanthazi ŵatoreke kutali ndi janja la munthu cha.

²¹“Pakuti maso ghake ghe pa nthowa za munthu ndipo ghawona mendero ghake ghose.

²²Kulivi mduzi, pamwenga mdima wamunkhorwe mwaku weniwo ŵakuchita uheni ŵangabisama.

²³Chifukwa walivi kumumikiya nyengo munthu, kuruta paurongo paku Chiuta kwacheruzgika.

²⁴Waphwanyenge vinkhara kwambura kupenjapenja ndi kuŵika ŵanyake mu malo ghawo.

²⁵Viyo pakuziŵa zinchitu zawo, wati ŵagadabuwa mu usiku ndi ŵephwanyika.

²⁶Wati ŵapuma pakweru pa maso pa ŵanthu chifukwa cha uheni wawo,

²⁷chifukwa ŵangureka kumurondo, ndipo ŵengavi kuphwere nanga njumoza ya nthowa zake.

²⁸Viyo wanguchitiska kuti kuriya kwa ŵakavu kufike kwaku iyo, ndipo wanguvwa kuriya kwa ŵakusuzgika.

²⁹Pa iyo waja cheti, ndiyani wangasuska? Pa wabisa chisku chake, ndiyani wangamuwona; pamwenga ungaŵa mtundu pamwenga munthu,

³⁰kuti munthu wambura kuziŵa Chiuta wangawusa cha, mwakuti wareke kuwiriska ŵanthu mu chiŵana.

³¹“Kumbi walipo munyake yo wakunena kwaku Chiuta, ‘Ndapinga chilangu, kuti ndinangenge so cha;

³²ndisambizgeni cho kuti ndiwona cha, asani ndalakwa, kuti nkhalakwanga so cha’?

³³Kumbi chilangu chaku Chiuta chiŵe nge ndimo imwe mutichikhumbiya, pakuti mutichikana? Chifukwa imwe ndimwe mutenere kusankha, ine cha; chifukwa ichi rongoni cho muziŵa.

³⁴Ŵanthu ŵa vinjeru ŵakanenanga kwaku ine, ndipo munthu wazeru yo watindivwa wakatinge:

³⁵‘Jobu wakamba kwambura kuziŵa, mazu ghake ngambura vinjeru.’

³⁶Mphanyi Jobu wanguyeseka mpaka ku umari, chifukwa wamuka nge mbanthu ŵalakwi.

³⁷Chifukwa wasazgako chigaruka ku ulakwi wake, wawomba manja ghake mukati mwidu, ndi watandaniska mazu ghake ghakumikana ndi Chiuta.”