Read gitonga Jobu 35 Bible Online

Jobu 35 - gitonga bible

Jobu 35

¹Ndipo Elihu wanguti:

²“Kumbi mughanaghana ichi kuŵa chakurunjika? Kumbi mughanaghana kuti, ‘Mburunji wangu pamaso ghaku Chiuta,’

³kuti mufumbi, ‘Kumbi nchanduwu uli cho nde nacho? Pakureka kwananga ndanduwa chine kuruska chanduwu cho ndatinge ndiŵi nacho asani ndingwananga?’

⁴Ndikakumukaninga penipo ŵanyino mwenawo pamoza.

⁵Lereskani kuchanya, ndi wonani; wonani mitambo, yo ye pachanya kwakuruska imwe.

⁶Asani mwananga, nchine cho mwamuchitiya iyo? Ndipo asani kwananga kwinu kwandana, nchine cho muchita kwaku iyo?

⁷Asani mwe ŵarunji, nchine cho mutumpaska iyo, pamwenga nchine cho waronde kutuwa ku janja linu?

⁸Uheni winu uziŵa kunangiska munthu munyake nge ndimwe, ndi urunji winu uziŵa kukondweska mwana wa munthu.

⁹“Chifukwa cha unandi wa vyakuzitiska ŵanthu ŵariya; wadana kuti ŵawovyeke chifukwa cha janja la wanthazi.

¹⁰Kweni palivi yo watiti, ‘Wepani Chiuta Mlenge wangu, mweniyo wapaska sumu pa usiku pakati,

¹¹mweniyo watitisambizga kwakuruska vinyama vya mu charu, ndi watitichita kuŵa ŵavinjeru kuruska viyuni vya mude?’

¹²Kwenikuwa viriya kweni kuti wativimuka cha, chifukwa chakujikuzga kwa ŵanthu ŵaheni.

¹³Nadi Chiuta kuti watuvwa kuriya kwaŵaka cha, nanga ndi Wanthazizose kuti waphwereko cha.

¹⁴Nanga mutiti mutimuwona cha, nanga mutiti mrandu we paurongo pake, ndi kuti mutimurindizga!

¹⁵Kweni sono pakuti ukari wake kuti ulanga cha, ndipo kuti iyo waghanaghanako ku ulakwi cha;

¹⁶Jobu wajura mlomo wake ndi waŵereŵeta vyaŵaka, watandaniska mazu kwambura zeru.”