Read gitonga Jobu 37 Bible Online

Jobu 37 - gitonga bible

Jobu 37

¹“Paku ichi nacho mtima wangu unjenjeme, ndipo upuma paŵaka ndi malo ghake.

²Tegherezgani ku mphomo ya mazu ghake, ndi mlindu wo utuwa mu mlomo wake.

³Watuwuyendeska mu charu chose chapasi, ndi limphezi lake lifika mpaka ku mpherere kezgu ya charu.

⁴Pavuli pake, mazu ghake ghakoroma; waguluruska ndi mazu gha ufumu wake, ndipo kuti warekeska limphezi cha po mazu ghake ghavwika.

⁵Chiuta waguluruska kwakuziziswa ndi mazu ghake; wachita vinthu vikuru vyo ifwe kuti tingaviziŵa cha.

⁶Pakuti ku nyankhuŵinda watiti, ‘Ying'a pa charu’; ndi ku vuwa yimana ndi yikuru, watiti, ‘Ng'ani ukongwa.’

⁷Wajara ndi chizighiriyo janja la munthu we yose, mwakuti ŵanthu wose ŵaziŵe nchitu yake.

⁸Viyo vinyama viruta mu malo ghawo, ndi vija mu mphanji zawo.

⁹Muchipinda chake mutuwa kanthenga, ndi kuzizira kutuwa mu mphepo yakuparghanika.

¹⁰Mvuchi wakututa kwaku Chiuta upaska nyakhuŵinda, ndi maji ghanandi ghakhoma ruŵiruŵi.

¹¹Wapingizga mtambo ufipa maji, mitambo yiparghang'a malimphezi ghake.

¹²Yizunguriyazunguriya kwakuyana ndi urongozgi wake, kufiska vyose vyo wayilanguliya pa charu chakujamo ŵanthu.

¹³Pamwenga nchifukwa chakuyirunjiska, pamwenga nchifukwa cha charu chake, pamwenga nchifukwa cha chanju chake, wativichita kuti viŵeko.

¹⁴“Vwani ichi, A! Jobu; chetamani ndi tegherezgani ndi ghanaghanani ndi nchitu zakuziziswa zaku Chiuta.

¹⁵Kumbi muziŵa mo Chiuta waŵikiya marangu ghake paku zo, ndimo wachitiya limphezi la mitambo yake kuti lingweruke?

¹⁶Kumbi muziŵa kapimikidu ka mitambo, nchitu zakuziziswa zaku yo ngwakuziŵa ukongwa,

¹⁷mwaŵenimwe maraya ghinu ngakufunda, penipo charu chaja ŵaka cheti chifukwa cha mwela?

¹⁸Kumbi imwe mungaziŵa kutandika mitambo nge ndimo iyo wachitiya; yakuti gwa nge ndi kayilore wakuwumbika?

¹⁹Mutisambizge cho tikakambanga kwaku iyo, tingaziŵa kurongoro mrandu widu cha chifukwa kwe mdima.

²⁰Kumbi kukanenekanga kwaku iyo kuti ndikakambanga? Kumbi munthu wangaŵa ndi khumbu kuti wamezeke?

²¹“Sono ŵanthu kuti ŵangalereska pa ukweru cha penipo kwaŵara ukongwa mu mitambo, penipo mphepo yakapo ndipo yatuzgapo mdima.

²²Kuŵala kwakung'anima nge ndi golide kutuliya ku nkhonde; Chiuta wakunwalikika ndi unkhankhu ukuru.

²³Wanthazizose kuti tingaziŵa kumusaniya cha; ndi mukuru mu nthazi ndi mu cheruzgu, ndi uzali wa urunji kuti wakasuskanga cha.

²⁴Mu chifukwa ichi ŵanthu ŵatumopa, kuti ŵaphwere wose wo mbazeru mu mtufu wa ŵeneku cha.”