Read gitonga Jobu 4 Bible Online

Jobu 4 - gitonga bible

Jobu 4

¹Viyo Elifazi muTemani wangwamuka:

²“Asani munthu watesa kurongoro nawe, kumbi ukaripenge? Ndipuuli ndiyani wangajikanizga kureka kurongoro?

³Wona wasambizga ŵanandi ndi walimbiska manja ghakurombotoka.

⁴Mazu ghako ghamufighiriya yo waguŵanga ndi walimbiska makongono ghakulopwa.

⁵Kweni sono chaza kwaku iwe, ndi wadeuka nthazi, chikukwaska ndipo usuzgika.

⁶Asi kuthamika Chiuta kwako ndiku kukhwima mtima kwako, ndipo kulereze kwako ndicho chigomezgu chako?

⁷“Kumbuka, kumbi ndiyane yo wakuparghang'ika wambura kwananga? Pamwenga, kumbi ndi nunkhu ko ŵakunyoroka mitima ŵakubayika?

⁸Nge ndimo ndawone wo ŵalima kwananga ndi kuseŵa suzgu, ŵavuna vyenivyo.

⁹Ŵaparghang'ika ndi kututa kwaku Chiuta ndipo ndi mvuchi wa ukari wake ŵamara.

¹⁰Kukoroma kwa nkharamu, mazu gha nkharamu yakofya, minyu ghankharamu zampupuka ghafyoka.

¹¹Nkharamu yanthazi yitufwa chifukwa chakusoŵeka nyama, ndipo twana twa nkharamu taparghang'ika.

¹²“Sono mazu ghangundiziya ku ubende, makutu ghangu ghangutegherezga kutokotezga kwake.

¹³Mukati mu maghanoghano gha viwona vya usiku penipo tulu tituŵako ŵanthu,

¹⁴mantha ndi kunjenjeme vingundiwiya vyenivyo vingusukuniska viwanga vyangu.

¹⁵Mzimu unguka pa chisku changu, cheya cha mu liŵavu langu chinguma pholi.

¹⁶Ungumiliriya pholi kweni kuti ndinguziŵa kuwamo kawonekedu kake cha. Panguŵa muzguka pa maso pangu, penga chisisi viyo ndinguvwa mazu:

¹⁷‘Kumbi munthu wachifweni wangaziŵa kuŵa murunji pa maso paku Chiuta? Kumbi munthu wangaziŵa kuŵa wambura kalema paurongo pa mlengi wake?

¹⁸Wati ŵagomezga cha nanga mbateŵeti ŵake, ŵangelo ŵake nawo watiti mbakubuda;

¹⁹iku kukaŵanga kukuru limu ku ŵanthu wo ŵaja mu nyumba za dongo zenizo viŵanja vyake vye mu mafuvu zo zirghika ndi fufuzi.

²⁰Pakuti ku mlenji ndi ku mazulo ŵaphwanyika. Ŵamariya nkhani wose teteti kwambura yumoza wakuŵaphwere.

²¹Asani umampha wawo wa mukati uponthorekamo mwaku wo, kumbi kuti ŵatufwa cha kwambura vinjeru?’ ”